வாய் துர்நாற்றம் - Halitosis

சிலர் வாயை திறந்தாலே உங்களுக்கு மூச்சு முட்டுகிறதா? ஆ... துர்நாற்றம் என்று ஓடத் தோன்றுகிறதா? இதற்காக கவலைப்பட வேண்டாம். வராமல் தடுக்கவும், வந்தால் போக்கவும் சிகிச்சை இருக்கிறது. நம் உடல் நிலையை சீராக வைத்துக் கொள்ள சில முன்னெச்சரிக்கை நடவடிக்கைகளை எடுத்து வந்தாலே போதும், வாய் துர்நாற்றம் எட்டிக் கூட பார்க்காது.

வாய் துர்நாற்றம் பொதுவாக எல்லா வயதினருக்கும் வரக்கூடியதுதான். பற்களை சுத்தமாக வைத்திருக்காதவர்களுக்கு வெகு சுலபமாக வந்துவிடும். 20 வயதுக்கு மேல் உள்ளவர்களுக்கு அதிகமாக வரும். குழந்தைகளுக்கு வருவது அரிது. வாய் துர்நாற்றம் நான்கு வகைகளில் ஏற்படுகிறது.

1) வாயை சுத்தமாக கழுவி பற்களை பாதுகாக்காமல் இருப்பதால் வருகிறது. நாம் எத்தனையோ வகை உணவு பொருட்களை சாப்பிடுகிறோம். காபி, டீ குடிக்கிறோம். மசாலா, பூண்டு போன்ற வாசனை பொருட் களை கொண்ட உணவு வகைகளை சாப்பிடு றோம். பலருக்கு இனிப்பு மீது அதிக மோகம்.

ஒரு பக்கம் குளோப் ஜாமூன் சாப்பிடுவர். இன்னொரு பக்கம் பல வித சாக்லெட், ஐஸ் கிரீம்களையும் சாப்பிடுவர். இத்துடன் நின்று விடுவார்களா? சிலர் வெற்றிலை பாக்கு போடுவர். சிலர் பீடா, சிலர் சிகரெட், பீடி. இப்படி என்ன சாப்பிட்டாலும் நாம் உள்ளே தள்ளும் பொருட்கள் வாய் வழியாக வயிற்றுக்கு போகிறது. வாயில் மென்று விழுங்கும் போது சில வகை பானங்களின் ரசக் கலவை, பற்களிலும், பற்களின் இடுக்குகளிலும் ஒட்டியும் காரை போல படிந்து விடுகிறது. சில உணவு துகள்கள் பற்களின் இடுக்குகளில் சேர்ந்து விடுகிறது. இவற்றை சேராதபடி பற்களை சுத்தமாக வைத்திருக்க வேண்டும். இல்லையேல் இந்த துகள்கள், உணவு படிவங்கள் நாளுக்குநாள் அழுக்கடைந்து பாக்டீரியா தொற்று கிருமிகளை எளிதில் தொற்றிக் கொண்டு விடுகின்றன. இதனால் உள்ளேயிருந்து வெளியேறும் காற்று துர்நாற்றம் அடிக்கிறது. காரணம், இந்த கிருமிகள் கலந்த பொருட்களின் நாற்றம் அவற்றில் கலக்கிறது.

2) சிகரெட் பிடிப்பவர்களுக்கு சிகரெட்டில் உள்ள நிகோடின், வாய் துர்நாற்றத்தை ஏற்படுத்துகிறது.

3) இதே போல வயிறு, குடல் சம்பந்தப்பட்ட வியாதி இருக்கும் போதும் சுவாசக் குழாயில் கோளாறு இருக்கும் போதும் வாய் துர்நாற்றம் எடுக்கும்.

4) சில வகை இனிப்பு பண்டங்கள் ஜீரணமாகாது. இதனால் சுவாசக் காற்று நாற வாய்ப்புண்டு.

இப்படி நான்கு வகை காரணங்கள் வாய் நாற்றத்தை உருவாக்குகிறது. சுவாசக் குழாய் வழியாக காற்று வெளியேறுகிறது. அது தொண்டை வாய், மூக்கு வழியாக போகிறது. காற்று சில சமயம் வாய் வழியாக வெளியேறுகிறது. பொதுவாக எப்போதும் மூக்கு வழியாக தான் வெளியேறும். வயிற்றில் கோளாறு காரணமாக நாற்றம் அடிக்கும் போது வாய், மூக்கு எந்த வழியாக காற்று வெளியேறினாலும் துர்நாற்றம் அடிக்கும். வாய் வழியாக வெளியேறும் போது அந்த காற்று பற்களை பாதிக்கிறது. வயிற்றை சரி செய்து பற்களை சுத்தமாக வைத்தால் எந்த கோளாறும் வராது.

இப்படி வயிற்றுக் கோளாறு இன்றி வாயில் பொதுவாக துர்நாற்றம் எடுக்க நாமே காரணம் ஆகிறோம். அதை நாமே தடுத்துவிடலாம். வாயில் உணவு துகள்கள் பற்களுக்கு இடையே சிக்கிக் கொள்கிறது. தினமும் பல் துலக்கும் போது நன்றாக சுத்தம் செய்து துகள்களை அகற்ற வேண்டும். அது அகற்றப்படாமல் இருந்தால் அது நாளடைவில் அழுகிப் போய் விடுகிறது. அத்துடன் வாயில் எச்சில் நீர் சேருகிறது. இப்படி ஒன்றுடன் ஒன்று சேர்ந்து காரையாக மாறுகிறது. இதனால் வாய் துர்நாற்றம் எடுக்கிறது.

இதன் அறிகுறி என்ன?:

வாய் துர்நாற்றம் இருந்தால் சாப்பிடவே பிடிக்காது. வாய் நாற்றம் எடுத்தால் குடல், வாய் தொடர்பான கோளாறுதான் என்பதை உணர்ந்து முன்னெச்சரிக்கையாக இருக்க வேண்டும். இல்லாவிட்டால் பற்களை இழக்கும் அபாயம் கூட வரலாம்.


பற்களை சுத்தமாக வைத்திருக்க சில மருத்துவ யோசனைகள்:

* துர்நாற்றத்தை தடுக்க தினமும் காலை இரவு வேளைகளில் பற்களை சுத்தமாக துலக்குங்கள்.

* பற்களிடையே உணவு இருந்தால் நன்றாக தேய்த்து அகற்றுங்கள். "மவுத் வாஷ்' கொண்டு வாயை கொப்பளிக்கலாம்.

* இரண்டு மாதத்துக்கு ஒரு முறையாவது பல் டாக்டரிடம் சென்று உங்கள் பற்களை காட்டி பரிசோதனை செய்து கொள்வது நல்லது.