நிறம் மாறும் பிள்ளையார்

**சிவா** · **சிவா** Sat Feb 05, 2011 1:15 pm

விக்கிரமாதித்தன் காடு ஆறு மாதம், நாடு ஆறு மாதம் என்று மாறி மாறி ஆட்சி செய்ததாக கூறுவார்கள். இதேபோன்று, ஓர் ஆண்டில் முதல் ஆறு மாதம் வெள்ளையாகவும், அடுத்த ஆறு மாதம் கறுப்பாகவும் காட்சித் தருகிறார் ஒரு அதிசய பிள்ளையார்.

கன்னியாகுமரி மாவட்டம் பத்மநாபபுரம் அருகே உள்ள கேரளபுரம் என்ற ஊருக்குச் சென்றால் இந்த விநாயகரை நாமும் தரிசிக்கலாம்.

`தட்சாயணம்' என்பது சூரியன் தெற்கு நோக்கி நகரும் ஆறு மாதம். `உத்தராயணம்' என்பது சூரியன் வடக்கு நோக்கி நகரும் ஆறு மாதம். இதில் ஆடி அமாவாசை முதல் தை அமாவாசை வரை உள்ள ஆறு மாதகாலத்தை தட்சாயணம் என்றும், தை அமாவாசை முதல் ஆடி அமாவாசை வரை உள்ள காலத்தை உத்தராயணம் என்றும் குறிப்பிடுவர். இந்த இரண்டு காலத்தில் தான் விநாயகரின் நிறம் மாறுகிறது. இந்த அதிசய விநாயகர் சிலை சந்திரகாந்தக்கல்லில் வடிக்கப்பட்டுள்ளது.

இந்த விநாயகரை வணங்கும் கன்னிப் பெண்களுக்கு திருமணம் நடக்கிறது என்றும், குழந்தையில்லாத பெண்களுக்கு குழந்தை வரம் கிடைக்கும் என்றும் பக்தர்கள் கூறுகின்றனர்.