தமிழகம் முழுவதும் பால்உற்பத்தியாளர்கள் போராட்டம் தீவிரம்

பால் கொள்முதல் விலையை உயர்த்தித் தர வலியுறுத்தி, பால் உற்பத்தியாளர்கள் மேற்கொண்டுள்ள போராட்டம் தீவிரமடைந்துள்ளது. போராட்டத்தை கைவிடுமாறு அமைச்சர் வேண்டுகோள் விடுத்தும், அதை பால் உற்பத்தியாளர் சங்கத்தினர் ஏற்கவில்லை. நான்காவது நாளாக தொடரும் போராட்டம் காரணமாக, தமிழகம் முழுவதும் பால் சப்ளை இன்று முதல் கடுமையாக பாதிக்கும் நிலை ஏற்பட்டுள்ளது.

தமிழகத்தில் பாலுக்கான கொள்முதல் விலையை உயர்த்தக்கோரி, 7ம் தேதி முதல் பால் உற்பத்தியாளர்கள் காலவரையற்ற பால் உற்பத்தி நிறுத்தப் போராட்டத்தை நடத்தி வருகின்றனர். மாநிலம் முழுவதும் பால் உற்பத்தியாளர்கள் கறவை மாடுகளுடன் சாலை மறியல், பாலை தரையில் கொட்டிஎதிர்ப்பைக் காட்டுவது, கூட்டுறவு சங்கங்களுக்கு பாலை வழங்காமல் இருப்பது உள்ளிட்ட போராட்டங்களில் ஈடுபட்டு வருகின்றனர். பால் உற்பத்தியாளர்கள் போராட்டத்தால், மாநிலம் முழுவதும் உள்ள 17 ஒன்றியங்களுக்கு உட்பட்ட 8,000 பிரதம பால் கூட்டுறவு சங்கங்களுக்கு வரவேண்டிய பால் வரவில்லை. மற்ற ஒன்றியங்களில் இருந்து, சென்னை இணையத்துக்கு அனுப்பப்படும் 10 லட்சம் லிட்டர் பாலில், இரண்டு லட்சம் லிட்டர் பால் மட்டுமே தற்போது அனுப்பப்படுகிறது. பால் தட்டுப்பாட்டை போக்க, தமிழகத்தில் உள்ள 17 ஒன்றியங்களிலும், பவுடர் மூலம் தயாரிக்கப்பட்ட பால், விற்பனைக்குஅனுப்பப்படுகிறது.

சென்னை இணையத்தில் இருந்து சேலம் ஆவின் ஒன்றியத்துக்கு நேற்று, 30 டன் பால் பவுடர் கொண்டு வரப்பட்டது. கடலூர் மாவட்டத்தில் 14 ஆயிரம் லிட்டர் பால் கொள்முதல் செய்யப்பட்டு வந்தது. இது நேற்று 8,000 லிட்டராக குறைந்தது. கோவை, ஈரோடு, தர்மபுரி, சேலம், திருச்சி உள்ளிட்ட மாவட்டங்களிலும் பால் கொள்முதல் பெருமளவு குறைந்துள்ளது. பால் கொள்முதல் குறைந்ததால், உள்ளூர் தேவைக்கு வழங்கப்படும் பால் அளவை ஆவின் நிர்வாகம் குறைத்துள்ளது. ஏஜன்டுகளுக்கு, 50 சதவீதம் வரை பால் பாக்கெட்கள் குறைக்கப்பட்டுள்ளதால், வீடுகள், கடைகளுக்கு பால் வழங்க முடியாத நிலைக்கு ஆவின் ஏஜன்டுகள் தள்ளப்பட்டுள்ளனர்.

பால் நிறுத்தப் போராட்டம் தீவிரமடைந்துள்ளதால், தனியார் பால் நிறுவனங்களில் இருந்து கொள்முதல் செய்து, அதை சென்னை இணையத்துக்கு அனுப்பும் முயற்சியில் அந்தந்த மாவட்ட கலெக்டர், தாசில்தார், வி.ஏ.ஓ., உள்ளிட்ட அதிகாரிகள் ஈடுபட்டுள்ளனர். இதனிடையே, "பால் உற்பத்தியாளர்களுடன் பேச்சு நடத்த ஏற்பாடு செய்யப்படும்' என, அமைச்சர் மதிவாணன், சட்டசபையில் நேற்று கூறியுள்ளார். ஆனால், உற்பத்தியாளர் சங்கத்தினருக்கு அழைப்பு விடுக்கவில்லை. இதனால், பால் உற்பத்தியாளர்கள் போராட்டத்தை தொடர முடிவெடுத்துள்ளனர். பிரதம பால் கூட்டுறவு சங்கப் பணியாளர்களை பணி நிரந்தரம் செய்யும் அதிகாரம் தமிழக அரசுக்கு இல்லை' என அமைச்சர் மதிவாணன், சட்டசபையில் கூறியதால், கூட்டுறவு சங்கப் பணியாளர்கள் இரண்டு நாள் தற்செயல் விடுப்பு எடுத்து போராட்டம் நடத்துகின்றனர். அவர்களுக்கு ஆதரவாக, ஒன்றியம், இணையங்களில் பணியாற்றுவோரும் ஈடுபட உள்ளதால், பால் சப்ளை முற்றிலுமாக தடைபடும் அபாயம் ஏற்பட்டுள்ளது.

கறவை மாடுகளுடன் சிறை நிரப்புவோம்: தமிழ்நாடு பால் உற்பத்தியாளர் நலச்சங்கத் தலைவர் செங்கோட்டுவேல் வெளியிட்டுள்ள அறிக்கையில், "பால் விலை உயர்வு மற்றும் கூட்டுறவு சங்கப் பணியாளர்கள் பணி நிரந்தரம், பணிப்பாதுகாப்பு உள்ளிட்ட கோரிக்கைகளை அரசு நிறைவேற்றித் தர வலியுறுத்தி, தமிழகத்தில் மூன்றாவது நாளாக பால் நிறுத்தப் போராட்டம் தீவிரமாக நடந்து வருகிறது. இன்று காலை 10 மணியில் இருந்து 12 மணி வரை, தமிழகத்தில் உள்ள அனைத்து நெடுஞ்சாலைகளிலும், உற்பத்தியாளர்கள் கறவை மாடுகளுடன் மறியல் போராட்டத்தில் ஈடுபட வேண்டும்.போலீசார் கைது செய்தால், மாடுகளுடன் சிறை செல்லவும் தயங்க வேண்டாம் அரசு பேச்சு நடத்த முன்வரும் வரை போராட்டம் தொடரும்' என்று, தெரிவித்துள்ளார்.

தினமலர்

மு.க நிச்சயம் மு.க தேர்தல் நலன் கருதி கொடுப்பர் .... 150 கோடி கடன் உள்ள போக்குவரத்து துறை இன்னும் போக்குவரத்து கட்டணம் உயர்த்தபட வில்லை இது எல்லாம் தேர்தல் நலன் கருதி ..