அரசு சாரா மலாய் அமைப்புக்கள் இந்திய வேட்பாளர்களை எதிர்க்கின்றன

இனிமேல் எந்த ஓர் அரசியல் கட்சியையும் சார்ந்த இந்திய வம்சாவளித் தலைவருக்கும் பொதுத் தேர்தலில் ஆதரவு அளிப்பது இல்லை என்று மலாய் ஆலோசனை மன்றத்தில் அங்கம் பெற்றுள்ள நூற்றுக்கும் மேற்பட்ட அரசு சாரா அமைப்புக்கள் சூளுரைத்துள்ளன.

இந்தியர் தலைவர்களும் போராளிகளும் “இண்டர்லோக்” நாவல் மீதான சர்ச்சையில் திரித்துக் கூறி, மருட்டல்களுக்கும் நெருக்குதல்களுக்கும் அரசாங்கத்தை அடிபணியச் செய்து விட்டது அந்த நடவடிக்கைக்குக் காரணம் என அந்த கூட்டமைப்பு கூறியது.

“இந்தப் பொதுத் தேர்தல் தொடக்கம் எந்த ஓர் இந்திய வம்சாவளித் தலைவருக்கும் அவர் பிஎன்னாக இருந்தாலும் அல்லது எதிர்த்தரப்பைச் சார்ந்திருந்தாலும் மலாய்க்காரர்கள் ஆதரவு அளிக்கக் கூடாது என்ற விழிப்புணர்வைப் பரப்புவதற்கு இது எங்களது முதல் நடவடிக்கை”, என்று நேற்று பிரதமர் நஜிப் அப்துல் ரசாக்கிடம் சமர்பிக்கப்பட்ட மகஜரில் அந்த கூட்டமைப்பு தெரிவித்துள்ளது.

மஇகாவும் மற்ற அரசு சாரா அமைப்புக்களும் தெரிவித்த ஆட்சேபத்தைத் தொடர்ந்து தேசிய இலக்கியவாதியான அப்துல்லா ஹுசேன் எழுதிய அந்த நாவலின் சில பகுதிகள் திருத்தப்படுவதற்கு அரசாங்கம் உத்தரவிட்டதை எதிர்த்து கோலாலம்பூரில் நேற்று மலாய் ஆலோசனை மன்றமும் தேசிய எழுத்தாளர் சங்கமும் மகஜர் ஒன்றை வழங்கின.

அந்த மகஜர் சமர்பிக்கப்பட்ட நிகழ்வில் அந்த சங்கத்தின் தலைவர் முகமட் சலீஹ் ரஹாமாட்டும், ஆலோசனை மன்றத்தின் நடவடிக்கைக்குழு உறுப்பினர்களான கமரூதின் கச்சாரும் ஹெல்மி இஸ்மாயிலும் உடன் இருந்தனர்.

மொத்தம் 138 அரசு சாரா அமைப்புக்கள் அந்த கூட்டமைப்பில் இடம் பெற்றுள்ளன. அவற்றில் கலைஞர்கள், அறிவாளிகள், வணிகர்கள், மாணவர்கள், ஆசிரியர்கள் அமைப்புக்களும் இடம் பெற்றுள்ளன.

அரசாங்கத்தின் மீது தொடுக்கப்பட்ட நெருக்குதலைத் தொடர்ந்து அரசாங்கம் எல்லா வகையான மருட்டல்களுக்கும் செல்வாக்கிற்கும் இசைந்து விடும் என்ற எண்ணத்தைத் தோற்றுவித்து விட்டதாக அந்த மகஜரில் குறிப்பிடப்பட்டுள்ளது.

“இது, அரசாங்கம் எவ்வளவு பலவீனமாக இருக்கிறது என்பதைக் காட்டுகிறது. அவர்களுடைய மருட்டல்களையும் கோரிக்கைகளையும் ஏற்றுக் கொள்ளும் பொருட்டு அரசாங்கம் நியாயமான ஆய்வைப் புறம் தள்ளும் அளவுக்கு அந்த மக்களுடன் அரசாங்கம் மிக அதிகமாக சமரசம் செய்து கொண்டு விட்டது”, என்றும் அந்த ஏழு பக்க மகஜர் கூறியது.

என்றாலும் தங்களுடைய நோக்கம் இன வெறுப்பைத் தூண்டி விடுவதில்லை என்றும் அச்சுறுத்தலுக்கு அடிபணிந்த அரசாங்கத்தின் பலவீனம் குறித்து ஏமாற்றம் தெரிவிப்பதே தங்கள் எண்ணம் என்றும் அந்த கூட்டமைப்பு வலியுறுத்தியது.

“துரதிர்ஷ்டவசமாக இண்டர்லோக் நாவலின் பிரதிகளையும் அதன் ஆசிரியரின் படங்களையும் எரித்தவர்கள் மீது எந்த நடவடிக்கையும் எடுக்கப்படவில்லை.” அந்தச் செயல்கள் தேச நிந்தனைக்குரியவை என்றும் அந்த மகஜர் கூறியது.

தங்களது வேண்டுகோள்,”‘மலாய்க்காரர்களின் குரலை” தெரிவிக்கின்றது என்றும் தீய நோக்கம் கொண்டதோ அல்லது அரசாங்கத்துக்கு மருட்டல் விடுப்பதோ அல்ல என்று முகமட் சலீஹ் கூறினார்.

“மேலாண்மை பெற்ற மக்கள் (pemilik ketuanan),என்ற முறையில் மலாய்க்காரர்களின் நலன்களையும் கௌரவத்தையும் இந்த நாட்டின் கௌரவத்தையும் (the dignity) மட்டுமே நாங்கள் நிலை நிறுத்துகிறோம்”, என அவர் கூறியதாக பெரித்தா ஹரியான் தகவல் வெளியிட்டுள்ளது.

மலேசியாஇன்று