இந்து ஆன்மிகக் கண்காட்சி: 4 லட்சம் பேர் திரண்டனர்

அன்பு தளபதி · அன்பு தளபதி Wed 2 Feb 2011 - 13:39

சென்னை, ஜன. 30: சென்னை திருவான்மியூரில் ஞாயிற்றுக்கிழமை நிறைவடைந்த இந்து ஆன்மிக, சேவை கண்காட்சிக்கு 4 லட்சம் பேர் வருகை தந்துள்ளதாகத் தெரியவந்துள்ளது. கண்காட்சி நிறைவு நாளில் பக்தர்கள் கூட்டம் அலைமோதியது.

உலக கலாசார இணக்க மையம் சார்பில் 3-வது இந்து ஆன்மிக சேவை இலவச கண்காட்சி திருவான்மியூரில் கடந்த 25-ம் தேதி தொடங்கியது. இந்து ஆன்மிக நிறுவனங்கள் மக்களுக்கு ஆற்றும் பல்வேறு தொண்டுகளையும், அறநெறிக் கருத்துகளையும் விளக்கும் வகையில் இந்த இலவச கண்காட்சி நடைபெற்றது.

காஞ்சி காமகோடி பீடம், சிருங்கேரி மடம், சுவாமி தயானந்த சரஸ்வதி, ராமகிருஷ்ண மடம், ஈஷா யோகா மையம், வாழும் கலை அமைப்பு, மாதா அமிர்தானந்த மயி மடம், தர்ம ரக்ஷன சமிதி, திருப்பதி-திருமலை தேவஸ்தானம், ஸ்ரீபுரம் நாராயணி பீடம், ஆரிய சமாஜம், அரவிந்தர் ஆசிரமம், பேரூர் ஆதீனம் சாந்தலிங்க அடிகளார் திருமடம், அய்யா வைகுண்டர் நற்பணி சங்கம், அகத்தியர் சன்மார்க்க சங்கம், ராஷ்ட்ர சேவிகா சமிதி உள்ளிட்ட 100-க்கும் மேற்பட்ட நிறுவனங்கள் அரங்குகள் அமைத்திருந்தன.

இந்த அமைப்புகள் தங்களது கல்வி, சமய, சமுதாயப் பணிகளையும் விளக்கியதோடு, ஸ்படிக மாலை முதல், சாமி சிலைகள், விளக்குகள், மூலிகை மருந்துகள், ஆன்றோரின் நூல்கள் ஆகியவற்றையும் விற்பனை செய்தன. 20-க்கும் மேற்பட்ட பதிப்பகங்கள் ஆன்மிக, ஜோதிட, தத்துவ நூல்களையும், பக்தி இசைப் பாட்டல் குறுந்தகடுகளையும், விசிடிக்களையும் விற்பனை செய்தன.

மொத்தமுள்ள 146 அரங்குகளிலும் பக்தர்கள் கூட்டம் நிரம்பி வழிந்தது. சைவ சித்தாந்த நூல் பதிப்புக் கழகம் உள்ளிட்ட பல்வேறு பதிப்பகங்களில் ஆன்மிக, வழிபாட்டு நூல்களை வாங்க பக்தர்கள் ஆர்வம் காட்டினர். மாணவர்களுக்கு வழிகாட்டும் நூல்கள், ஜோதிட நூல்களும் அதிக அளவில் விற்பனையானது.

வலங்கைமானில் உள்ள வேதபாடசாலையின் சின்னஞ்சிறு மாணவர்கள் குழுவினர் வேத மந்திரங்களை உச்சரித்து பயிற்சி வகுப்புகளையும் நடத்தினர்.

பல்வேறு அரங்குகளில் பார்வையாளர்களுக்கு இலவசமாக யோகா பயிற்சி அளிக்கப்பட்டது. இதேபோல இலவச கண் மருத்துவ சோதனையும் நடத்தப்பட்டது. காஞ்சி காமகோடி அறக்கட்டளை குழந்தைகள் நல மருத்துவமனை சார்பில் குழந்தைகளுக்கு இலவச மருத்துவப் பரிசோதனையும் நடைபெற்றது.

பாம்பன் சுவாமிகள் அறக்கட்டளை சார்பில் வாகன விபத்துகளில் இருந்து காக்க இயந்திர படங்களும், சேமித்த தொகை நிலைக்கவும் மந்திர மூலிகை பாக்கெட்டுகளும் பக்தர்களை மிகவும் கவர்ந்தன.

இலங்கையில் போரினால் பாதிக்கப்பட்ட பகுதிகளில் நிவாரணப் பணிகளை மேற்கொண்டு வரும் சேவா இன்டர்நேஷனல் அமைப்பு பிரத்யேக அரங்கை அமைத்திருந்தது.

கண்காட்சியின் நுழைவு வாயிலில் அரிய மூலிகைகளின் சிறப்பையும், அவற்றின் நோய் தீர்க்கும் தெய்வீகத் தன்மைகளையும் விளக்கும் வகையில் மூலிகையில் தயாரிக்கப்பட்ட பல்வேறு பொருள்கள் விற்பனை செய்யப்பட்டன.

கண்காட்சி வளாகத்தில் அமைக்கப்பட்டிருந்த குறைந்த விலை உணவகமும், ஆன்மிக சொற்பொழிவு அரங்கமும் தினமும் நிரம்பி வழிந்தது.

நன்றி தினமணி