மெழுகுவர்த்தி

mkamal · mkamal Fri 21 Jan 2011 - 12:49

மெழுகுவர்த்தி(பி.எம். கமால், கடையநல்லூர்)

மெழுகுவர்த்தி-
இருளைத் தின்னும்
ஒற்றை நாவு !

அணையப் போகும்
தீபத்திற்கு
மெழுகுக் குச்சியின்
கண்ணீர் அஞ்சலி !

மெழுகுக் கணவனின்
வரதட்சணைக்
கொடுமை வாட்டியதால்
திரியின் தற்கொலைத்
தீவிரத் தாக்குதல் !

காதலித்த மெழுகு
கைவிட்ட காரணத்தால்
திரி குளிக்கும்
தீக்குளிப்பு !

வானம் பார்த்து
எரியும் சுடர்
ஞானம் தேடும்
உயிரின் தவம் !

இந்த
ஒற்றை இறகுப் பறவை
உட்கார்ந்து
பறக்கிறதோ ?

மெழுகுவர்த்தி-
இருட்டுக் குருடனை
வழி நடத்திச்
செல்லுகின்ற
சுடர்க் கோலா ?

சுடரே ! நீ
எதைத் தேடி
ஒற்றைக் காலில்
ஊர்கோலம் போகிறாய் ?
உன்னைத் தேடியா ?
அல்லது உன்
மறு பக்க
இருளைத் தேடியா ?

கலைவேந்தன் · கலைவேந்தன் Fri 21 Jan 2011 - 13:13

அருமை அருமை... பாராட்ட வார்த்தைகள் இல்லை கமால்..!

சாதாரண மெழுகுத்திரிக்கு இருளின் ஒற்றை நாவு , மெழுக்குக்கணவன் , வரதட்சினைக்கொடுமைக்கு தீக்குளிக்கும் பெண் , ஞானம் தேடும் ஞானி , ஒற்றை இறகுப் பறவை , சுடர்க்கோல் என பல பெயர்களை அளித்துப் பெருமைப் படுத்தி இருக்கும் பாங்கினை வியக்கிறேன்.

இருட்டுக்குருடனை வழிநடத்தும் கோல் - மிக அழகிய உருவகம்..!

பாராட்டுக்கள் கவிஞரே...!

ARR · ARR Fri 21 Jan 2011 - 15:40

mkamal wrote:மெழுகுவர்த்தி(பி.எம். கமால், கடையநல்லூர்)

மெழுகுக் கணவனின்
வரதட்சணைக்
கொடுமை வாட்டியதால்
திரியின் தற்கொலைத்
தீவிரத் தாக்குதல் !

காதலித்த மெழுகு
கைவிட்ட காரணத்தால்
திரி குளிக்கும்
தீக்குளிப்பு !

இந்த உவமேயத்தை ஒப்புக்கொள்ள மனம் மறுக்கிறது..

எனினும் கவிஞரின் கற்பனை உரிமையை மதிக்கிறேன்.. அதிலும்,

மெழுகுவர்த்தி-
இருளைத் தின்னும்
ஒற்றை நாவு !

என்னும் துவக்கம் மிக அசத்தல்.. பாராட்டுகள் கமால்..!