மகாதிரின் கருத்துக்களுக்கு சிங்கப்பூர் மலாய்க்காரர்கள் சினம்

டாக்டர் மகாதிர் மொகமட், சிங்கப்பூரில் உள்ள மலாய்ச் சமூகம் குறித்து தெரிவித்த கருத்துக்கள், அந்த குடியரசில், கொந்தளிப்பை ஏற்படுத்தியுள்ளது.

அந்த தீவில் உள்ள மலாய்க்காரர்கள், ஓரங்கட்டப்பட்டுள்ளனர் என்றும், பிற சமூகங்களைக் காட்டிலும் பின்தங்கியுள்ளனர் என்றும் கூறியதற்காக, அந்த முன்னாள் பிரதமர் மீது, சிங்கப்பூர் பெரித்தா ஹரியான் வாசகர்கள் பலர் வெறுப்பை உமிழ்ந்துள்ளனர்.

மகாதிர் எழுதிய கண்ணோட்டத்தை அந்த பத்திரிக்கை வெளியிட்டபோது, பல வாசகர்கள் அதற்குப் பதிலடி கொடுத்தனர். சிலர் காட்டமாகவும் எழுதியுள்ளனர்.

சாலிம் சாலே என்ற ஒரு வாசகர், இப்படி எழுதியுள்ளார். அதாவது “சிங்கப்பூரில் உள்ள மலாய்க்காரர்கள் இவ்வுலகின் இறுதி வரைக்கும் ஓரங்கட்டப்பட்டு வருகின்றனர்,” என்று கூறுவதே மகாதிரின் கருப்பொருளாக இருந்து வருகிறது என்றார்.

“ஆனால் இங்குள்ள மலாய்க்காரர்கள் எவ்விதஉதவித் தொகையுமின்றி, ஏற்றம் கண்டு வருகின்றனர்; அதிகாரப்பூர்வமான சமயமாக இல்லாதபோதிலும் இசுலாத்தின் தகுதி பாதுகாக்கப்படுகிறது,” என்றாரவர்.

மற்றொரு வாசகரான கமாரியா லிம் லி ஹுவா, சிங்கப்பூர் மலாய்ச் சமூகம் குறித்து மகாதிர் அறிக்கை விடுக்கும்
முன்னர் , நமது வாழ்வியல் நிலையை ஆராய வேண்டும் எனக் கேட்டுக் கொண்டார்.

“சிங்கப்பூர் மலாய்க்காரர்களாகிய நாங்கள் சௌகர்யமாக இருக்கிறோம். மேலும் சிங்கப்பூர் ஆட்சியாளர்கள்,
வெளிப்படையான போக்குடன் நமது நம்பிக்கையை மேலோங்கச் செய்வதற்கு நாங்கள் நன்றியுடையவர்களாகவும் இருக்கிறோம்,” என்றாரவர்.

“சிங்கப்பூர் மலாய்க்காரர்கள் சுக போகமாக, மற்ற சமூகங்களுக்கு இணையாக வாழ்வதாக,” யுசோப் முசவாவின் கடிதமொன்று வலியுறுத்தியது.

“எவ்வாறு ஏற்றநிலை காண்பது என்பது குறித்து, சிங்கப்பூர் மலாய்க்காரர்களிடமிருந்து கற்றுக்கொள்ளும்படி, மலேசிய மலாய்க்காரர்களுக்கு, டாக்டர் மகாதிர் ஆலோசனை கூற வேண்டும்,” என்றாரவர்.

மற்ற வாசகர்கள், மகாதிரை அவமதிக்கும் சொற்களைப் பயன்படுத்தி மரியாதை குறைவாக எழுதியுள்ளனர்.

மகாதிரை தற்காத்து ஒருவர்

ஆனால், வாலிட் ஜும்லாட் அப்துல்லா என்ற ஒரு நபர், மற்ற வாசகர்களைப் போலன்றி மாறுபட்ட கருத்துக்களைத் தெரிவித்தார்.

சிங்கை மலாய்க்கார்கள், மகாதிர் கூறியதை மறுத்து, உடனுக்குடன் சூடாக பதிலடி கொடுத்துள்ளது குறித்து தாம் மகிழ்ச்சி அடைவதாக அவர் கூறினார்.

“குடும்பச் சீர்கேடு, ஒழுக்கச் சீர்குலைவு, பிற இனங்களைக் காட்டிலும் கல்வி அடைவு நிலையில் அதிருப்தி அளிக்கும் தாழ்வான நிலை முதலான பிரச்னைகளுக்கு இதே உத்வேகத்துடன் சிங்கப்பூர் மலாய்க்கார்கள் செயல்பட்டால் அது எத்தனை மகிழ்ச்சியைக் கொடுக்கும் என்றாரவர்.

மகாதிரும் தமது பலவீனங்களைக் கொண்டுள்ளார். ஆனால் அந்த முன்னாள் மலேசியப் பிரதமர் – சிலர் அவரை ‘மூப்படைந்த கிழவன்’ என்றழைக்கின்றனர் – ஆசிய பொருளாதார வல்லரசுகளில் ஒன்றாக மலேசியாவை உருவெடுக்கச் செய்துள்ளார்.

உலகப் புகழ் பெற்றவரும், இசுலாமிய உலகில் அவர் பெரிதும் போற்றப்படுபவருமான ஒரே தலைவர் மகாதிராவார்.
நோபல் அமைதிப் பரிசுக்காக, நான்கு அரசு சாரா அமைப்புக்கள், அவற்றில் இரண்டு கிறிஸ்த்துவ அமைப்புக்கள், மகாதிரை முன்மொழ்ந்துள்ளதாக வாலிட் தெரிவித்தார்.

“என்னைப் பொறுத்தவரை, அந்த பரிசுக்கு நியமனம் செய்யப்பட்டுள்ள முதலாவது மலாய்த் தலைவர் அவராவார்,” என்கிறார் வாலிட்.

– பெர்னாமா & மலேசியாஇன்று!