கருப்புப் பணம்-அம்பலப்படுத்துமா மத்திய அரசு?

ஜெர்மனியின் எல்டிஜி வங்கியில் கருப்புப் பணத்தைக் குவித்து வைத்திருப்போர் குறித்த விவரத்தை வெளியிட முடியுமா, முடியாதா என்பது குறித்து இன்று உச்சநீதிமன்றத்தில் தெரிவிக்கவுள்ளது மத்திய அரசு.

பாஜகவைச் சேர்ந்த ராம்ஜெட்மலானி உள்ளிட்டோர் இதுதொடர்பாக உச்சநீதிமன்றத்தில் வழக்கு தொடர்ந்துள்ளனர். அதில், வெளிநாட்டு வங்கிகளில் ரூ. 70 லட்சம் கோடி கருப்புப் பணத்தை இந்தியர்கள் குவித்து வைத்துள்ளனர். இவற்றை மீட்க மத்திய அரசு நடவடிக்கை எடுக்காமல் உள்ளது. வெளிநாட்டு வங்கிகளில் எவ்வளவு கருப்புப் பணம் குவித்து வைக்கப்பட்டிருக்கிறது என்பதை மத்திய அரசு வெளியிட வேண்டும்.

குறிப்பாக ஜெர்மனியின் எல்டிஜி வங்கியில் குவித்து வைக்கப்பட்டிருக்கும் கருப்புப் பணம் குறித்த தகவலை மத்திய அரசு வெளியிட வேண்டும் என்று கோரப்பட்டிருந்தது.

இந்த மனுவை கடந்த முறை உச்சநீதிமன்றம் விசாரித்தபோது, இதுகுறித்து பகிரங்கமாக தெரிவிக்க முடியாது. இதைத் தெரிவிப்பதும், தெரிவிக்காமல் இருப்பதும் அரசின் உரிமையாகும் என்று மத்திய அரசு கூறியது. ஆனால் இதற்கு உச்சநீதிமன்றம் கடும் கண்டனம் தெரிவித்தது.

கருப்புப் பணத்தைக் குவித்து வைத்திருப்போர் குறித்த விவரத்தை சொல்வதில் உங்களுக்கு என்ன அவ்வளவு கஷ்டம். உடனடியாக யார் யார் பணத்தைப் போட்டு வைத்திருக்கிறார்கள் என்ற விவரத்தை மத்திய அரசு வெளியிட வேண்டும். அதை உச்சநீதிமன்றத்தில் சமர்ப்பிக்க வேண்டும்.இது மிகவும் முக்கியமான விஷயம் என்று கூறியது.

இதையடுத்து சீலிட்ட கவரில் ஒரு பெயர்ப் பட்டியலை வைத்து அதை உச்சநீதிமன்றத்தில் மத்திய அரசு சமர்ப்பித்தது. ஆனால் இதை உச்சநீதிமன்றம் ஏற்கவில்லை. முழுமையான பட்டியலை சமர்ப்பிக்க வேண்டும் என உத்தரவிட்டிருந்தது.

இந்த நிலையில் உச்சநீதிமன்றம் கோரியபடி பட்டியலை சமர்ப்பிக்க முடியுமா என்பது குறித்து இன்று மத்திய அரசு உச்சநீதிமன்றத்தில் பதிலளிக்க உள்ளது.
தட்ஸ்தமிழ்