இண்டர்லோக் ஆசிரியரை பெர்காசா கௌரவித்தது

தேசிய இலக்கியவாதி அப்துல்லா ஹூசேன், தமது இலக்கியப் படைப்புக்காக, கடந்த பல வாரங்களாக கடுமையான குறைக்கூறல்களுக்கு ஆளாகியுள்ள வேளையில், இப்போது பொது மக்களின் குறிப்பாக மலாய் உரிமைகள் அமைப்பான பெர்காசாவின் மதிப்பையும் கவனத்தையும் ஈர்த்துள்ளார்.

நேற்று மாலை, பெர்காசா தலைவர் இப்ராகிம் அலி தலைமையிலான குழுவொன்று, பெட்டாலிங் ஜெயாவில் உள்ள அப்துல்லாவின் இல்லத்துக்கு வருகை புரிந்தது. அந்த இலக்கியவாதிக்கு, அக்குழுவினர் தங்களது ஆதரவைப் புலப்படுத்தி, அந்த அமைப்பின் இரண்டாவது மிகப்பெரிய விருதான ‘ஜாசா பஹ்லவான நெகாரா’ விருதையும் வழங்கிச் சிறப்பித்தது.

அவர், ‘Jasa Pahlawan Negara’ என்ற வாசகங்களைக் கொண்ட ஓர் அங்கி, பெர்காசாவின் அதிகாரப்பூர்வ சின்னமான ‘கிரிஸ்’ மற்றும் நிதி நன்கொடையையும் பெற்றுக் கொண்டார்.

சுமார் 20 பெர்காசா உறுப்பினர்கள், அப்துல்லாவின் குடும்ப உறுப்பினர்கள் மற்றும் ஊடகவியாலாளர்கள் அந்த நிகழ்ச்சியில் கலந்து கொண்டனர். அவர்களில் அப்துல்லாவின் மனைவி சித்தி சரோஜா பாஸ்ரி, அவரது சகோதரரும் கப்பெனா (Gapena) தலைவருமான இஸ்மாயில் ஹூசேன், அவரது புதல்வர் ஆகியோரும் அடங்குவர்.

விருதளிப்பு நிகழ்ச்சி அவரது வீட்டின் முன்புறம் நடத்தப்பட்டது. நடமாட முடியாததால், சக்கர நாற்காலியில் அப்துல்லா அங்கு கொண்டு செல்லப்பட்டார். மேலும் அவருக்கு கேட்கும் சக்தியும் குறைவானதால் விருந்தினர்களுடன் எழுத்துப்பூர்வ செய்திகளால் கலந்துரையாடி தமது மகிழ்ச்சியையும் நன்றியையும் தெரிவித்துக் கொண்டார்.


அப்துல்லாவின் ‘இண்டர்லோக்’ நாவல் பள்ளிக்கூடங்களுக்கு பாட நூலாகத் தெரிவு செய்யப்பட்டதை தொடர்ந்து, பல இந்திய அமைப்புக்கள் கடும் கண்டனங்களைத் தெரிவித்ததுடன் கடந்த வாரம் அப்புத்தகத்துக்கும் எரியூட்டப்பட்டது.

அதில் இடம் பெற்றுள்ள ‘பறையா’ என்ற சொல், இந்தியர்களை அவமதிக்கின்றது எனக் கூறப்பட்டது. ஆனால் அப்துல்லாவும் மற்றவர்களும் அதனை வரலாற்றுபூர்வ கூற்று என்றும், இன உணர்வைத் தூண்டும் நோக்கத்தைக் கொண்டிருக்கவில்லை என்றும் வாதிடுகின்றனர்.

இப்போது பெர்காசாவும் அவர்களுடன் சேர்ந்துள்ளது, நிலைமையை மேலும் தீவிரப்படுத்தலாம் என எதிர்பார்க்கப்படுகிறது.

மலேசியாஇன்று!

சுயநலம் கொண்ட தீவிரவாதிகளைக் கொண்ட ஒர் அமைப்பு தனது விளம்பரத்திற்காக செய்து கொண்ட நிகழ்வு அது.