இதுவும் விலகிப்போகும்

மன்னர் வீரமல்லர், போர்க்களத்தில் இருந்து மின்னல் வேகத்தில் குதிரையில் தப்பித்து வந்து கொண்டிருந்தார். களைப்பு தாங்காமல் அடர்ந்த காட்டிலிருந்த அந்த மரத்தடியில் அமர்ந்து இளைப்பாறினார்.

`அப்பாடா! இனி எதிரிப்படைகளால் எனக்கு எந்த ஆபத்தும் இல்லை' என்று சொல்லி நிம்மதிப் பெருமூச்சு விட்டார்.

"இதுவும் விலகிப்போகும்'' என்று பக்கத்து ஆசிரமத்தில் இருந்து வந்த குரலைக் கேட்டு, ஆசிரமத்துக்குள் நுழைந்தார் மன்னர்.

"சூரியனைக் கண்டு தாமரை இதழ் விரிக்கும், நிலவைக் கண்டு அல்லி இதழ் விரிக்கும். இது நிலையன்று. இதுவும் விலகிப்போகும். வெற்றியும் விலகும், தோல்வியும் விலகும்'' என்று தன் சீடர்களுக்கு விளக்கம் சொல்லிக் கொண்டிருந்தார் குரு. மன்னர் நிற்பதைப் பார்த்த அவர், மன்னரின் அருகே வந்தார்.


"குருவே, வணக்கம். நான் மருத நாட்டு மன்னன். போரில் தோற்று நாடிழந்து இங்கே தப்பி வந்துள்ளேன்'' என்று வேதனையோடு சொன்னார் வீரமல்லர்.

"இதுவும் விலகிப்போகும்'' என்று ரத்தினச் சுருக்கமாக ஆறுதல் சொல்லி, குடிலுக்கு அழைத்துச் சென்றார் குரு.

மன்னருக்கு உணவளித்து இளைப்பாற வைத்தார். அப்போது எதிரிப்படை வந்து மன்னரைக் கைது செய்தது.

குரு மன்னரைப் பார்த்து, "இதுவும் விலகிப்போகும்'' என்று புன்னகைத்தபடி வழி அனுப்பி வைத்தார்.

வீரமல்லரை, தங்களை மன்னர் தங்கி இருக்கும் இடத்திற்கு காவலர்கள் அழைத்துச் சென்றனர். அப்போது எதிரி மன்னர் தன்னைத் துரத்தும் சிங்கத்திடம் இருந்து தப்பித்து ஓடி வந்து கொண்டிருந்தார். அதைக்கண்ட படை வீரர்கள் தாங்கள் உயிர் தப்பினால் போதும் என்று வீரமல்லரை விட்டுவிட்டு ஓடினர்.

"என்னைக் காப்பாற்றுங்கள்...'' என்று வீரமல்லர் பின் மறைந்து நின்றார் எதிரி மன்னர்.

சிங்கத்தைக் கொன்று எதிரி மன்னரைக் காப்பாற்றினார், வீரமல்லர்.

"நான் உன் பகையாளி. உன்னுடைய நாட்டையே அபகரித்தவன். இருந்தும் என் உயிரைக் காத்த நீயே உயர்ந்த மனிதர். கைப்பற்றிய உன்னுடைய நாட்டை திருப்பி அளிக்கிறேன். இனி நாம் நண்பர்களாக இருப்போம்'' என்று கூறி, வீரமல்லரை கட்டிக் கொண்டார் எதிரி மன்னர்.

"இதுவும் விலகிப்போகும்'' என்று குரு சொன்னதன் பொருள் வீரமல்லருக்கு இப்போது தெளிவாகப் புரிந்தது.

- தா. ஆறுமுகம்

இதையே தான் நானும் சொல்லிக்கிட்டு இருக்கேன்.. ரொம்ப வருஷமா..

நல்ல பயனுள்ள பதிவு.. நன்றி சிவா

துரோகமும் வஞ்சகமும் வறுமையும் பிணியும் பகட்டு வாழ்வும் படோடோபமும் எல்லாமே சில காலம் தான்... விட்டு விலகும் என்னும் அருமையான தத்துவம் தரும் கதை... மிக்க நன்றி சிவா...!

எதுவும் நிரந்தரம் இல்லை... அருமை