தைப்பொங்கல் : பொதுமக்கள் உற்சாகம்!

**சிவா** · **சிவா** Sat 15 Jan 2011 - 15:37

தமிழர் திருநாளாம் தைப்பொங்கல் நாளை உற்சாகமாக கொண்டாடப்படுகிறது. இதனால் பஸ், ரயில்கள் வெளியூர்களுக்கு ஹவுஸ்புல்லாக செல்கின்றன.

ஆண்டுதோறும் தை முதல்நாள் பொங்கல் பண்டிகை கொண்டாடப்படுகிறது. அன்றைய தினம் புத்தரிசி கொண்டு புதுப்பானையில் பொங்கலிட்டு குடும்பத்தாருடன் உற்றார், உறவினர், நண்பர்களுடன் உண்டு மகிழ்வது வழக்கம். வழக்கமாக காலையிலேயே அனைவரும் பொங்கலிடுவது வழக்கம். ஆனால் இந்த ஆண்டு பொங்கல் வைக்க காலை 7.30 மணிக்கு உகந்த நேரம் என்று அறிவிக்கப்பட்டுள்ளது.

தை பொங்கலை கொண்டாட பொதுமக்கள் உற்சாகமாகி வருகின்றனர். பள்ளி, கல்லூரிகளுக்கு இன்று முதல் 17ம் தேதி வரை விடுமுறை விடப்பட்டுள்ள நிலையில் பஸ், ரயில்களில் கூட்டம் நிரம்பி வழிகிறது. அனைத்து வாகனங்களும் முன்பதிவு செய்யப்பட்டு வெளியூர்களுக்கு ஹவுஸ்&புல்லாக செல்கின்றன. பொதுமக்கள் நலன்கருதி கூடுதல் பஸ்களை அரசு போக்குவரத்து கழகங்கள் இயக்குகின்றன.

தைப் பொங்கல் தமிழ்புத்தாண்டாக அறிவிக்கப்பட்டதால் அனைவரும் சாதிமத பேதமின்றி பண்டிகையை கொண்டாடி வருகின்றனர். பொங்கல் விற்பனைக்காக கடைவீதிகளில் கரும்பு கட்டுகள், வெல்லம், பச்சரிசி, மஞ்சள், பனங்கிழங்கு, காய்கறிகள், பழங்கள் குவிந்து கிடக்கின்றன.

அவற்றை வாங்க பொதுமக்கள் கூட்டம் கூட்டமாக கடைகளுக்கு சென்று வருகின்றனர்.

கடந்த ஆண்டைவிட பொங்கல் பொருட்களின் விலை சற்று அதிகரித்திருந்தாலும் அதை பொருட்படுத்தாமல் தங்களுக்கு தேவையான பொருட்களை பொதுமக்கள் ஆர்வமுடன் வாங்கிச் சென்றனர். நாளை மறுநாள் காணும் பொங்கல் கொண்டாடப்படுவதால் சிறுவர்& சிறுமிகள் குதூகலம் அடைந்துள்ளனர்.

அன்றைய தினம் பூங்கா, பீச், தியேட்டர்களுக்கு சென்று அவர்கள் பொழுதை கழிப்பது வழக்கம். காலையில் பெற்றோர், உறவினர், நண்பர்களுடன் உணவு பொருட்களை கட்டிக் கொண்டு புறப்படுவர்கள். மாலை வரை அங்கேயே விளையாடி மகிழ்வர். இதனால் பொழுதுபோக்கு இடங்களில் பாதுகாப்பு பலப்படுத்தப்பட்டுள்ளது.

ஊருக்கு ஊர், வீதிக்கு வீதிகளில் பொங்கல் விளையாட்டு விழாக்கள் நடத்தப்பட்டு வெற்றி பெறுபவர்களுக்கு பரிசுகள் வழங்கப்படுகின்றன. வீரவிளையாட்டான ஜல்லிக்கட்டு, சிலம்பாட்டம் ஆகியவையும் நடத்தப்படுகிறது. பொங்கலையொட்டி பொதுமக்களுக்கு அரசியல் தலைவர்கள் வாழ்த்து தெரிவித்துள்ளனர்.

பொங்கலுக்கு முந்தைய தினமான போகி இன்று கொண்டாடப்பட்டது. வீடுகளிலிருந்த பழைய பொருட்களை ரோட்டில் போட்டு அனைவரும் தீயிட்டு கொளுத்தினர். பழையன கழித்து புதியன புகுவோம் என்ற பழமொழிக்கேற்ப போகியை கொண்டாடினர். மேலும் ஒவ்வொரு பெண்களும் தங்கள் வீட்டு வாசலில் பலவண்ண கோலங்களை வரைந்தனர்.

தைப் பொங்கலையொட்டி அனைத்து கோயில்களிலும் சிறப்பு வழிபாடு நடத்தப்படுகிறது. இதில் பக்தர்கள் குடும்பத்துடன் கலந்து கொண்டு சாமிதரிசனம் செய்கின்றனர். புதுவையில் சீனியர் எஸ்பி அதுல்கத்தாரி தலைமையில் பாதுகாப்பு தீவிரப்படுத்தப்பட்டுள்ளது.

இதேபோல் கடலூர், விழுப்புரம், பண்ருட்டி, விருத்தாசலம், நெய்வேலி, கள்ளக்குறிச்சி, திருக்கோவிலூர், திண்டிவனம், மரக்காணம் உள்ளிட்ட அனைத்துப் பகுதிகளிலும் பொங்கலை கொண்டாட பொதுமக்கள் தயாராகி வரும் நிலையில் பதற்றமான பகுதிகளில் பாதுகாப்பை தீவிரப்படுத்த காவல்துறை முடிவு செய்துள்ளது.

நக்கீரன்