2050ல் பெட்ரோல் கிடைக்காது : மாநாட்டில் அதிர்ச்சி தகவல்

சென்னை : ""மின் உற்பத்திக்கு, மரபுசார்ந்த எரிபொருட்களுக்கு மாற்றாக, புதுப்பிக்கத்தக்க எரிசக்தி பயன்பாட்டை பரவலாக்குவது அவசியம்,'' என, தமிழ்நாடு எரிசக்தி மேம்பாட்டுக் கழக தலைவர் கிருஸ்துதாஸ் காந்தி பேசினார்.

லயோலா கல்லூரியின் ஆராய்ச்சி மையம் சார்பில், "சுற்றுச்சூழல் பாதுகாப்புடன் கூடிய நிலையான வளர்ச்சி' எனும் தலைப்பில், தேசிய அளவிலான இரண்டு நாள் மாநாடு, கல்லூரி வளாகத்தில் நேற்று துவங்கியது.

மாநாட்டு மலரை, அண்ணா பல்கலை துணைவேந்தர் மன்னர் ஜவகர் வெளியிட, தமிழ்நாடு எரிசக்தி மேம்பாட்டுக் கழகத்தின் தலைவர் கிருஸ்துதாஸ் காந்தி பெற்றுக் கொண்டார்.

மாநாட்டு துவக்க விழாவில், கிருஸ்துதாஸ் காந்தி பேசியதாவது: சுதந்திரம் அடைந்தபோது வெறும் 40 மெகா வாட்டாக இருந்த மின் தேவை இன்று, ஒரு லட்சத்து 50 ஆயிரம் மெகாவாட்டாக அதிகரித்துள்ளது. மின் உற்பத்திக்கு, மரபுசார்ந்த எரிபொருட்களான நிலக்கரி மற்றும் பெட்ரோலிய தாதுப் பொருட்களையே நாம் பெரிதும் நம்பியுள்ளோம்.வரும் 2035 ஆண்டிற்குப் பின் நிலக்கரியும், 2050ம் ஆண்டிற்குப் பின் பெட்ரோலும் கிடைக்காது என, ஆய்வு தகவல்கள் தெரிவிக்கின்றன. புவி வெப்பமயமாதல், பருவநிலை மாற்றம் போன்ற சுற்றுச்சூழல் பாதிப்பிற்கு மரபுசார்ந்த எரிபொருட்களை அதிகளவில் பயன்படுத்துவதும் முக்கிய காரணமாகின்றன.சுற்றுச்சூழலுக்கு பாதிப்பு ஏற்படுத்தாத சூரியன், காற்று, இயற்கை எரிவாயு போன்ற புதுப்பிக்கத்தக்க எரிசக்திகள் மூலம் மின் உற்பத்தி செய்யப்படுவதை பரவலாக்க வேண்டியது தற்போது அவசியமாகிறது. இம்முறையில், தேவையான இடத்திலேயே மின் உற்பத்தி செய்யப்படுவதால், மின்பகிர்மானமும் எளிதாகிறது. தமிழ்நாடு எரிசக்தி மேம்பாட்டு கழகத்தின் சார்பில், "புதுப்பிக்கத்தக்க எரிசக்திகள்' குறித்த சர்வதேச மாநாடு, வரும் 14ம் தேதி துவங்கி மூன்று நாட்கள், சென்னை, நந்தம்பாக்கம் வர்த்தக மையத்தில் நடைபெற உள்ளது.இவ்வாறு கிருஸ்துதாஸ் காந்தி பேசினார்.

அண்ணா பல்கலை துணைவேந்தர் மன்னர்ஜவகர் பேசும்போது, ""புதுப்பிக்கத்தக்க எரிசக்தி துறையில், எதிர்காலத்தில் நிறைய வேலைவாய்ப்புகள் உள்ளன. இதுகுறித்து ஆராய்ச்சி மாணவர்கள் நிறைய ஆய்வுகள் செய்து, இத்துறை குறித்த விழிப்புணர்வை கிராமப்புறங்களில் ஏற்படுத்த வேண்டும்,'' என்றார்.

மாநாட்டின் துவக்க விழாவில், லயோலா கல்லூரி தலைவர் அமல், முதல்வர் ஜெயராஜ், சென்னை ஐகோர்ட் வக்கீல் ஐசக் மோகன்லால், பள்ளி, கல்லூரி மாணவர்கள் உள்ளிட்டோர் பங்கேற்றனர்.

மாநாட்டில் இன்று : புதுப்பிக்கத்தக்க எரிசக்தி பயன்பாட்டை மையமாகக் கொண்டு, மாநில அளவில் 200 பள்ளி மாணவர்கள் பங்கேற்கும் ஓவியம், அறிவியல் கண்காட்சி, வினாடி - வினா ஆகிய போட்டிகள் நடக்கின்றன. தமிழகம், கர்நாடகத்தைச் சேர்ந்த கல்லூரி மாணவர்களின் 12 ஆய்வுக் கட்டுரைகளும் சமர்ப்பிக்கப்படுகின்றன.

இப்படி தான் போகனுமா?