ஸ்ரீகிருஷ்ணா கமிட்டி அறிக்கைக்கு தெலுங்கானா அரசியல் கட்சிகள் எதிர்ப்பு: பஸ்கள் எரிப்பு

ஐதராபாத், ஜன.7- ஸ்ரீகிருஷ்ணா கமிட்டி அறிக்கையை முற்றிலும் நிராகரிப்பதாக சந்திரசேகர ராவ் தலைமையிலான தெலுங்கானா ராஷ்டிரிய சமிதி கட்சி உட்பட பல்வேறு அரசியல் கட்சிகளும் அறிவித்துள்ளன.

ஸ்ரீகிருஷ்ணா கமிட்டி அறிக்கை

ஆந்திர மாநிலத்தை இரண்டாக பிரித்து தெலுங்கானா தனி மாநிலம் உருவாக்க வேண்டும் என்ற கோரிக்கை நீண்ட காலமாக நீடித்து வருகிறது. தெலுங்கான தனி மாநிலம் அமைப்பதாக மத்திய அரசு உறுதி அளித்த போதிலும் அதை நிறைவேற்றுவதில் சிக்கல் எழுந்தது. ஆந்திராவை பிரிப்பதற்கு வேறொரு பிரிவினர் கடும் எதிர்ப்பு தெரிவித்தனர்.

இந்த விவகாரத்தால் ஆந்திராவில் பலத்த வன்முறை வெடித்ததாலும், தெலுங்கானா ராஷ்டிரிய சமிதி கட்சியின் தலைவர் சந்திரசேகர ராவ் மேற்கொண்ட காலவரையற்ற உண்ணாவிரதம் காரணமாகவும் தனி மாநில கோரிக்கை குறித்து ஆய்வு செய்ய நீதிபதி ஸ்ரீகிருஷ்ணா கமிட்டியை மத்திய அரசு அமைத்தது. மத்திய அரசிடம் அந்த கமிட்டி அளித்த அறிக்கை நேற்று வெளியானது.

பட்ஜெட் கூட்டத்தில் சட்டம்

அதில், தனி தெலுங்கானா மாநிலம் அமைப்பது தொடர்பாக 6 விதமான பரிந்துரைகளை ஸ்ரீகிருஷ்ணா கமிட்டி தெரிவித்துள்ளது. ஆனால், ஸ்ரீகிருஷ்ணா கமிட்டியின் அறிக்கையை தெலுங்கானா பகுதியை சேர்ந்த அனைத்து அரசியல் கட்சிகளும் முற்றிலுமாக நிராகரித்துள்ளன.

தெலுங்கு தேசம் கட்சியின் தெலுங்கானா பகுதி ஒருங்கிணைப்பாளர் நாகம் ஜனார்த்தன ரெட்டி கூறுகையில், "ஆறு பரிந்துரைகளும் குழப்பத்தையை ஏற்படுத்துகின்றன. தெலுங்கான பகுதி மக்களின் உணர்ச்சிகளை அவர்கள் அவமதித்து விட்டனர். தனி தெலுங்கானா மாநிலத்தை உருவாக்கி மக்களின் உணர்வுக்கு மதிப்பளிப்பதை தவிர மத்திய அரசுக்கு வேறு வழி இல்லை. பாராளுமன்ற பட்ஜெட் கூட்டத்தொடரின்போது, தெலுங்கானா தனி மாநிலம் குறித்த சட்டம் கொண்டு வரப்பட வேண்டும்'' என்றார்.

மத்திய அரசின் உறுதிமொழி

தெலுங்கானா ராஷ்டிரிய சமிதி கட்சியின் எம்.எல்.ஏ.வும், அதன் தலைவர் சந்திரசேகர ராவின் மகனுமான ராமாராவ் கூறுகையில், "ஆறு பரிந்துரைகளை கமிட்டி அளித்திருக்கிறது. மத்திய அரசும் 600 பரிந்துரைகளை முன் வைக்கலாம். ஆனால், தெலுங்கானா மக்களின் முன்பு உள்ள ஒரே பரிந்துரை, தனி மாநிலம் உருவாக்க வேண்டும் என்பது மட்டுமே. ஐதராபாத்தை உள்ளடக்கிய தனி தெலுங்கானா மாநிலத்துக்கு குறைவான எந்தவொரு திட்டத்தையும் நாங்கள் ஏற்க மாட்டோம். ஏற்கனவே அளித்த உறுதிமொழியை மத்திய அரசு நிறைவேற்ற வேண்டும்'' என்றார்.

தெலுங்கானா பகுதியை சேர்ந்த காங்கிரஸ் எம்.எல்.ஏ.க்களும் இதே கருத்தை தெரிவித்தனர். அவர்கள் கூறும்போது, "தெலுங்கானா மாநிலத்தை நாங்கள் விரும்புகிறோம். வேறு எதுவும் தேவையில்லை. மக்களின் விருப்பத்துக்கு மத்திய அரசு மதிப்பளிக்கும் என நம்புகிறோம். தனி மாநிலம் உருவாக்குவதாக கடந்த 2009-ம் ஆண்டு டிசம்பர் 9-ந் தேதி அன்று மத்திய அரசு வெளியிட்ட அறிக்கையின்படி நடந்து கொள்ள வேண்டும்'' என்றார்.

பா.ஜனதா எதிர்ப்பு

ஐதராபாத்தில் சுற்றுப்பயணம் மேற்கொண்டுள்ள பா.ஜனதா மூத்த தலைவர் வெங்கையா நாயுடு கூறுகையில், "ஆந்திராவை பிரிப்பது மட்டுமே தீர்வு என பா.ஜனதா கூறி வருகிறது. அதற்கான நடவடிக்கைகளை காங்கிரஸ் கூட்டணி அரசு மேற்கொள்ள வேண்டும். 2004-ம் ஆண்டு பொதுத் தேர்தலிலேயே தெலுங்கானா மாநிலம் உருவாக்குவதாக காங்கிரஸ் கட்சி சார்பில் தேர்தல் வாக்குறுதி அளிக்கப்பட்டது. அந்த தேர்தலில் வெற்றி பெற்று ஆட்சியும் அமைத்தது. ஆனால், 2009-ம் ஆண்டு அடுத்த பொதுத் தேர்தலும் முடிந்து விட்டது. இன்னமும் தெலுங்கானா கோரிக்கை நிறைவேறவில்லை. ஸ்ரீகிருஷ்ணா கமிட்டி அறிக்கையை பா.ஜனதா ஏற்காது'' என்றார்.

இதுபோல, லோக்சத்தா உள்ளிட்ட சில கட்சிகளும் எதிர்ப்பு தெரிவித்துள்ளன. ஆந்திர மாநில மார்க்சிஸ்ட் தலைவர் கூறுகையில், `இப்போதைக்கு தற்போதைய நிலைமையே நீடிக்கலாம். ஆனால், அடுத்த அனைத்துக் கட்சி கூட்டத்தின்போது, நிச்சயமாக ஒரு தீர்வை மத்திய அரசு கொண்டு வர வேண்டும்' என்றார்.

அரசு பஸ்சுக்கு தீ

இதற்கிடையே, ஸ்ரீகிருஷ்ணா கமிட்டி அறிக்கைக்கு எதிர்ப்பு தெரிவித்து தெலுங்கானா பகுதியில் மாணவர் போராட்டம் வலுவடைந்துள்ளது. ஐதராபாத் நகரில் நேற்று முன்தினம் இரவில் அரசுக்கு சொந்தமான டவுண்பஸ் ஒன்று தீ வைத்து கொளுத்தப்பட்டது. நேற்று அறிக்கை வெளியான நிலையில், உஸ்மானியா பல்கலைக்கழக வளாகத்துக்குள் அரசு பஸ் எரிக்கப்பட்டது.

தெலுங்கானா கோரிக்கையை வலியுறுத்தி உஸ்மானியா பல்கலைக்கழகத்தில் இருந்து கவர்னர் மாளிகை நோக்கி மாணவர்கள் பேரணியாக புறப்பட்டனர். அவர்களை போலீசார் தடுத்து நிறுத்தியதால் மாணவர்கள் கற்களை வீசி ரகளையில் ஈடுபட்டனர். இதையடுத்து, மாணவர்களை கலைக்க போலீசார் கண்ணீர் புகை குண்டுகளை வீசினர். கல்வீச்சில் சுமார் 5 மாணவர்கள் காயமடைந்தனர். தற்போது, பல்கலை கழக வளாகத்துக்குள்ளேயே போராட்டம் தொடருகிறது.

ஆந்திராவில் பதற்றம் அதிகரித்துள்ளதால் மாநில போலீசாருடன் இணைந்து 50 கம்பெனி துணை ராணுவப்படையினரும் பாதுகாப்பு பணியில் ஈடுபட்டுள்ளனர். ஐதராபாத் நகரில் மட்டும் 18 கம்பெனி படையினர் முகாமிட்டுள்ளனர்.

தினதந்தி!