வாழ்க்கைப்பாடம்

**சிவா** · **சிவா** Thu Jan 06, 2011 10:45 am

அன்று அந்த அரசுப் பள்ளிக்கூடம் சுறுசுறுப்பாக இயங்கிக் கொண்டிருந்தது. காரணம், இன்ஸ்பெக்ஷன். பள்ளிக்கல்வி ஆய்வாளர் வருகையினால் எல்லா ஆசிரியர்களும் தங்களுடைய வகுப்பு மாணவர்கள் நல்ல பெயர் எடுக்க வேண்டும் என்ற முனைப்புடன் செயல்பட்டுக் கொண்டிருந்தனர்.

காலை 10 மணிக்கு ஆறாம் வகுப்பு `ஆ' பிரிவுக்குள் தலைமை ஆசிரியருடன் நுழைந்தார் ஆய்வாளர். வகுப்பு ஆசிரியர் ரமேஷ் மிகவும் திறமையானவர். படிப்பு மட்டுமின்றி, பல நல்ல விஷயங்களையும் சொல்லித் தருபவர். அவருடைய வகுப்பில் படிக்கும் ரகு மிகவும் திறமையானவன். நன்கு படிக்கக் கூடியவனும் கூட. எல்லா மாணவர்களும் சுத்தமான உடை உடுத்தி பள்ளிக்கூடம் வர வேண்டும் சொல்லி இருந்தார் ரமேஷ். எல்லோரும் அதன்படியே குறித்த நேரத்தில் வந்து இருந்தனர். ஆனால், ரமேஷ் எதிர்பார்த்த ரகு மட்டும் 10 மணியாகியும் வரவில்லை. கதவையே பார்த்துக் கொண்டு இருந்தார் ஆசிரியர். ஆனால் இதோ ஆய்வாளரும், தலைமை ஆசிரியரும் அவர்கள் வகுப்புக்குள் வந்து விட்டனர்.

"வணக்கம் அய்யா...'' என்று எல்லா மாணவர்களும் அவர்களுக்கு வணக்கம் சொல்லவும், வகுப்புக்கு வெளியில் இருந்து, "உள்ளே வரலாமா ஐயா?'' என்று ரகுவின் குரல் கேட்கவும் சரியாக இருந்தது. ஆசிரியரும், மற்றவர்களும் வெளியே பார்க்க, ரகு அழுக்குச் சட்டையுடன் களைப்பாக நின்று கொண்டிருந்தான். வகுப்பாசிரியருக்கு `பக்'கென்றது. `ஆய்வாளர் வந்த அன்று இப்படி அழுக்காகவும், தாமதமாகவும் வந்து விட்டானே...' என்று கவலையாகவும் இருந்தது.

"என்ன தம்பி, இப்படி அழுக்காகவும், நேரம் கழிச்சும் வந்திருக்கிறாய்?'' என்றார் ஆய்வாளர்.

"மன்னிக்கணும் ஐயா! நான் வீட்டில் இருந்து பள்ளிக்கு நடந்து வரும்பொழுது ஒரு சிறுவன் குளத்தில் தவறி விழுந்து விட்டான். அவன் அம்மா கதறி அழுது கொண்டு இருந்தார். நான் உடனே குளத்தில் குதித்து நீந்தி அவனைக் காப்பாற்றி முதல் உதவி செய்தேன். நல்லவேளையாக அவன் கண் விழித்து விட்டான். உடனே அவனை மருத்துவமனைக்கு அழைத்துக் கொண்டு போகும்படி அவன் அம்மாவிடம் சொல்லி விட்டு, நீங்கள் இங்கு வர இருப்பதால் ஓடோடி வந்தேன்'' என்றான் ரகு.

"எப்படி தம்பி முதல் உதவி செய்தாய்?''

"குளத்தில் குதித்து அவன் முடியைப் பற்றி இழுத்து கரை சேர்த்தேன். அவன் தாயின் உதவியால் அவன் முகத்தில் இருந்த சேறைத் துடைத்து விட்டு, குப்புறப்போட்டு நெஞ்சை மெதுவாக அழுத்தி நீரை வெளியேற்றியதும் அவன் கண் விழித்து விட்டான்''.

"உனக்கு யார் இதையெல்லாம் சொல்லித் தந்தது?''

"எங்க வகுப்பாசிரியர் தான். ஒவ்வொரு விடுமுறையின் போதும் கட்டாயம் நீச்சல் கத்துக் கொள்ள வேண்டும் என்று கூறுவார். முதல் உதவி செய்வது பற்றியும் அவர்தான் எங்களுக்குக் கற்றுக் கொடுத்தார். அடிக்கடி சிறு சிறு நாடகங்கள் மூலம் எங்களுக்கும் பயிற்சி அளிப்பார்''.

ஆய்வாளர் மகிழ்ந்து போனார். "மாணவர்களே, எல்லோரும் ரகுவைப் பாராட்டி பலமா கை தட்டுங்க!'' என்றார்.

"உங்களைப் பார்த்தால் எனக்கு மிகவும் பெருமையாகவும், உற்சாகமாகவும் இருக்கிறது. படிப்பு மட்டும் இல்லாமல் வாழ்க்கைக்கல்வியையும் புகட்டும் உங்களால் இந்தப் பள்ளிக்கே பெருமை. பசுமரத்தாணி போல் இந்த இளங்குழந்தைகளிடம் நல்ல பழக்கங்களையும், ஒழுக்கத்தையும் கற்றுத்தரும் உங்களைப் போன்ற ஆசிரியர்கள் தான் நம் பாரத நாட்டிற்குத் தேவை. ஒரு உயிரையே காப்பாற்றிய ரகுவின் செயலுக்கு ஈடு இணையே இல்லை'' என்று வகுப்பாசிரியரைப் பாராட்டிய ஆய்வாளர், ரகுவிற்கும், ஆசிரியருக்கும் விலை உயர்ந்த பேனாக்களைப் பரிசளித்தார்.

- நா. நளினாதேவி