சாதி துவேச “இண்டர்லோக்” இலக்கிய நாவல் ஏன் இன்னும் மீட்டுக் கொள்ளப்படவில்லை?, சேவியர்

“சாதி துவேசத்தைத் தூண்டும், இந்து சமயப் பண்பாடுகளைச் சாடும் “இண்டர்லோக்” இலக்கியப் பாடநூல் ஏழு நாட்களில் மீட்டுக் கொள்ளப்பட வேண்டும் என்று கடந்த டிசம்பர் 16ஆம் தேதி பிரதமர்துறை துணை அமைச்சர் முருகையா விடுத்தக் கோரிக்கையை கல்வியமைச்சு கண்டுக் கொள்ளாதது ஏன்?”, என்று சிலாங்கூர் மாநில ஆட்சிக்குழு உறுப்பினர் டாக்டர் சேவியர் ஜெயக்குமார் கேட்கிறார்.

அம்னோ பாருவின் அரசாங்கத்தில் இந்திய சமூகத்தைச் சார்ந்த அமைச்சர் துணை அமைச்சர்களுக்கு கட்டளை இட அதிகாரமில்லையா? அல்லது பழைய பாணியிலேயே இந்திய தலைவர்கள் ஐந்து ஆண்டுகளுக்கு மகஜர் சமர்பிப்பார்கள் என்று எதிர்பார்க்கிறார்களா என்றும் அவர் கேட்கிறார்.

“பாரிசான் அரசாங்கத்தில் இந்திய சமூகம் அதன் உரிமையை பெறுவதில் மட்டும் இழுப்பறி நிலை இல்லை; அதன் தன்மானத்தைக் காக்கவும் கடுமையாகப் போராடவேண்டும் என்பது வெட்கப்பட வேண்டிய விசயமாகும்”, என்று சேவியர் கூறுகிறார்.

“பள்ளிப்பாட புத்தகமாக அப்புத்தகத்தை அங்கீகரிக்கும் முன் கல்வி அமைச்சின் அதிகாரிகள் அந்த புத்தகத்தை ஆய்வு செய்திருக்க வேண்டும். அது முறைப்படி ஆய்வுச் செய்யப்பட்டதா? அல்லது இந்திய சமுதாயத்தை புண்படுத்தும் வார்த்தைகளை ஆய்வாளர் ஒருப்பொருட்டாக கருதவில்லையா?

“கல்வி அமைச்சின் அதிகாரிகள் பாட புத்தகங்களில் சேர்க்கப்படும் தகவல்கள் அம்னோவிற்கு அனுகூலமானவைகளாக இருப்பதை மட்டும் உறுதி செய்யும் மனப்பான்மையை கைவிட்டு பல இன, சமய நாடான மலேசியாவின் அனைத்து மக்களின் பண்பாட்டுக் கூறுகளுக்கும் மதிப்பளிக்கும் வண்ணம் அமைவதை உறுதிப்படுத்த வேண்டும். அதை மீறி எழுதப்படும் புத்தகங்களுக்கு கல்வி அமைச்சு அதிகாரிகள் அதனை பள்ளிப்பாட புத்தகமாக்க அனுமதியளித்திருக்கூடாது. பள்ளிகளில் இதுபோன்ற புத்தகங்கள் பயன்படுத்தப்பட்டால், ஒற்றுமையல்ல இன வேற்றுமையே உருவாகும்”, என்று அவர் மேலும் கூறுகிறார்.

1மலேசியா என்பது ஒருவரை ஒருவர் மதித்து, இன,சமய, மொழிப் பாகுபாடின்றி இரண்டரக் கலந்து இயற்கையாக உருவாகவேண்டிய ஒரு புது மலேசிய இனத்தின் தோன்றலாக இருக்க வேண்டும். அதற்கு கல்விக்கூடங்கள் சிறந்த பங்காற்ற வேண்டும். ஆனால் கல்வி அமைச்சு இனத் துவேசங்களையும், சாதி மத பேதங்களையும் வளர்க்கும் புத்தகங்களின் வழி நாட்டின் அடிப்படையான ஒற்றுமைக்கே வேட்டு வைத்துக் கொண்டிருப்பது வேதனைக்குறிய ஒன்று என்றாரவர்.

இன ஒற்றுமைக்கு பள்ளிகளின் பங்கை வலியுறுத்திய சேவியர், “இந்நாட்டின் இன ஒற்றுமையில் கல்வி அமைச்சுக்கு அக்கறையிருந்தால் உடனடியாக இப்புத்தகத்தை திரும்பப் பெற கல்வித்துறை அதிகாரிகளுக்கு துணைப் பிரதமர் முகைதின் யாசின் கட்டளையிட வேண்டும்”, என்றார்.

மலேசியாஇன்று!

யாரை சொல்லி என்ன பயன்? நம்மிடையே ஒற்றுமை இல்லாமையே மற்ற இனத்தார்
வாய்ப்பாக ஏற்படுத்திக் கொள்கின்றனர். ஒட்டு மொத்த இந்திய சமுதாயத்தை
பிரதிநிதிக்கிறோம் என்று உரக்க கூறிகொள்ளும் ம. இ. கா. என்ன செய்து
கொண்டிருகின்றது… அது என்ன செய்ய முடியும், பணம் பதவி மட்டுமே கிடைத்தால்
போதும் என்று தானே அவர்கள் பதவியில் இருகிறார்கள்… பாவம் நம் தமிழினம்,
காப்பாற்ற யாரும் இல்லை… காலம் தான் பதில் சொல்ல வேண்டும்…