எம்.எல்.ஏ., குத்திக்கொலை: ஆசிரியை கொன்றதின் பின்னணி எது?

புர்னியா : பீகாரில் பா.ஜ., எம்.எல்.ஏ., ராஜ் கிஷோர் கேசரி, பொதுமக்கள் முன்னிலையில், பள்ளி ஆசிரியை ஒருவரால், கத்தியால் குத்திக் கொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது. எம்.எல்.ஏ., தன்னை பாலியல் துன்புறுத்தலுக்கு உள்ளாக்கி வந்ததாக, இந்த ஆசிரியை ஏற்கனவே புகார் தெரிவிருந்த நிலையில், இந்த அதிர்ச்சி சம்பவம் நடந்துள்ளது.

பீகார் மாநிலம், புர்னியா சட்டசபை தொகுதியின் எம்.எல்.ஏ., ராஜ் கிஷோர் கேசரி (51); பா.ஜ., கட்சியைச் சேர்ந்தவர். புர்னியா பகுதியில் மக்கள் செல்வாக்கு இவருக்கு உள்ளது.இதே பகுதியைச் சேர்ந்தவர் ரூபம் பதக் (45) என்ற பள்ளி ஆசிரியை. ஆறு மாதங்களுக்கு முன், ராஜ் கிஷோர் கேசரி எம்.எல்.ஏ., தன்னை பாலியல் துன்புறுத்தலுக்கு ஆளாக்கியதாக, போலீசில் ரூபம் பதக் புகார் செய்தார். எம்.எல்.ஏ.,வுக்கு எதிரான புகார் என்பதால், போலீசார் அதை பெரிதாக கண்டுகொள்ளவில்லை.இந்நிலையில், புர்னியாவில் சிபாலி டோலா என்ற இடத்தில் உள்ள தனது வீட்டில், ராஜ் கிஷோர் கேசரி நேற்று காலை பார்வையாளர்களை சந்தித்துக் கொண்டு இருந்தார்.அவரை காண்பதற்காகவும், மனு அளிப்பதற்காகவும் ஏராளமான பார்வையாளர்கள் மற்றும் கட்சித் தொண்டர்கள் வரிசையில் நின்றிருந்தனர்.

இந்த வரிசையில், பள்ளி ஆசிரியை ரூபம் பதக்கும் நின்றிருந்தார். அவரை, அங்கிருந்த யாருக்கும் அடையாளம் தெரியவில்லை.ஒவ்வொருவராக சந்தித்துக் கொண்டிருந்தபோது, ரூபம் பதக்கின் முறை வந்தது. அப்போது திடீரென மறைத்து வைத்திருந்த கத்தியை எடுத்து, கிஷோர் எம்.எல்.ஏ.,வின் வயிற்றை குறிவைத்து, பலமாக குத்தினார் ரூபம் பதக்.அலறிக் கொண்டே ரத்த வெள்ளத்தில் துடிதுடித்து கீழே சாய்ந்தார் ராஜ் கிஷோர் கேசரி. அங்கிருந்தவர்கள் உடனடியாக அவரை மருத்துவமனைக்கு கொண்டு சென்றனர். அங்கு கூடி நின்ற மற்றவர்கள், ரூபம் பதக்கை சூழ்ந்து கொண்டு, சரமாரியாக அடித்து, உதைத்தனர். இதனால், அவர் மயக்கம் அடைந்தார். அங்கு வந்த போலீசார், ரூபம் பதக்கை மீட்டு, கைது செய்து, போலீஸ் ஸ்டேஷனுக்கு கொண்டு சென்றனர்.

இதற்கிடையே, மருத்துவமனைக்கு கொண்டு செல்லப்பட்ட கிஷோரை, டாக்டர்கள் பரிசோதித்தனர். ஆனால், வரும் வழியிலேயே அவரது உயிர் பிரிந்து விட்டதாக டாக்டர்கள் தெரிவித்தனர். பகல் நேரத்தில், ஏராளமானோர் கண்ணுக்கு எதிரில் எம்.எல்.ஏ.,வை, கத்தியால் குத்தி, ஒரு பெண் கொலை செய்த சம்பவம், பீகாரில் பெரும் பரபரப்பை ஏற்படுத்தியுள்ளது.

மருத்துவமனையில் அனுமதிக்கப்பட்டுள்ள ரூபம் பதக் கூறுகையில், "எம்.எல்.ஏ.,வை கத்தியால் குத்தியதற்காக நான் கவலைப்படவில்லை. நீண்ட நாட்களாக என்னை அவர் குறிவைத்து துன்புறுத்தி வந்தார். இனிமேல், என்னை தூக்கில் போட்டால் கூட எனக்கு திருப்தி தான்' என்றார்.இந்த கொலை சம்பவம் காரணமாக, புர்னியா பகுதியில் பதட்டம் நிலவுகிறது. பாதுகாப்புக்காக போலீசார் குவிக்கப்பட்டுள்ளனர்.

அமைதி காக்க முதல்வர் வேண்டுகோள்: இந்த சம்பவம் குறித்து கடும் அதிர்ச்சி தெரிவித்துள்ள பீகார் முதல்வர் நிதிஷ் குமார், "இதுகுறித்து உயர் போலீஸ் அதிகாரிகளை கொண்ட குழு அமைத்து, முழு அளவிலான விசாரணை நடத்த வேண்டும்' என, போலீசாருக்கு உத்தரவிட்டுள்ளார்.

மேலும், துணை முதல்வர் சுஷில் குமார் மோடியை, உடனடியாக சம்பவ இடத்துக்கு செல்லும்படியும் கேட்டுக் கொண்டார். புர்னியா பகுதி மக்கள் அமைதி காக்க வேண்டும் என்றும் அவர் வலியுறுத்தினார்.

துணை முதல்வர் சுஷில் குமார் மோடி கூறுகையில், "ராஜ் கிஷோர் கேசரி கொலை செய்யப்பட்ட சம்பவம் அதிர்ச்சி அளிக்கிறது. இந்த சம்பவத்தை, சட்டம் ஒழுங்கு பிரச்னையுடன் தொடர்பு படுத்தி கூற முடியாது. எம்.எல்.ஏ.,வை கொலை செய்த பெண், மனரீதியான பாதிப்பிற்கு ஆளானவரா என்பது விசாரணையில் தெரிய வரும்' என்றார்.

காங்., வலியுறுத்தல்: பீகார் மாநில காங்., செய்தி தொடர்பாளர் பிரேமச்சந்திர மிஸ்ரா கூறுகையில், "இந்த கொலை சம்பவத்தை கடுமையாக கண்டிக்கிறோம். இதுகுறித்து நீதி விசாரணைக்கு உத்தரவிட வேண்டும். சம்பந்தப்பட்ட பெண் கொடுத்திருந்த பாலியல் புகாரின் மீது, போலீசார் முறையாக நடவடிக்கை எடுத்திருந்தால், இதுபோன்ற விபரீதம் நடந்திருக்காது' என்றார்.

இந்த கொலைக்கு, ராஷ்டிரிய ஜனதா தளம் தலைவர் லாலு பிரசாத் யாதவும் கண்டனம் தெரிவித்துள்ளார்.

அவர் கூறுகையில், "இந்த கொலை குறித்து உயர்மட்ட அளவிலான விசாரணைக்கு உத்தரவிட வேண்டும். பள்ளி ஆசிரியை ரூபம் பதக் கொடுத்த பாலியல் புகார் குறித்தும், விசாரணைக்கு உத்தரவிட வேண்டும். எம்.எல்.ஏ.,வை இம்மாதிரிக் கொல்வது மாநில அரசின் பெயரைக் கெடுக்கும் சம்பவம்' என்றார்.

தினமலர்

பெண்கள் மிக பெரிய சக்தி.... ஹாட்ஸ் ஆஃப்