பாக்கு போட்டதால் சதை இறுகிய வாய், 20 ஆண்டுகளுக்கு பின் வாய் திறந்த பெண்

**சிவா** · **சிவா** Fri Dec 31, 2010 9:04 am

மதுரை : தூக்கம் வராமல் இருக்க, அடிக்கடி பாக்கை மென்ற, பழநி கீரனூரை சேர்ந்த பொன்னுத்தாய் என்பவருக்கு, வாயின் உட்பகுதி சதை இறுகியதால், வாய் திறக்க முடியவில்லை. மதுரை கே.கே.நகர், "டைமென்ஷன் 4' மருத்துவமனையில், ஆபரேஷன் மூலம் வாயை திறக்க செய்து, டாக்டர்கள் சாதனை படைத்தனர்.

இவரது கணவர் சேகர், பூ கட்டும் தொழில் செய்கிறார். இவருக்கு உதவியாக இருந்த பொன்னுத்தாய், தூக்கம் வராமல் இருக்க, அடிக்கடி பாக்கு, மூக்குப்பொடி பயன்படுத்தினார். ஒரு மாதத்திற்கு முன், வாயின் உட்பகுதி இறுகிக்கொண்டதால், வாயை திறக்க முடியவில்லை; திரவ உணவை மட்டும் எடுத்து வந்தார். இவருக்கு டாக்டர் வெங்கடாசலபதி தலைமையில், டாக்டர்கள் ஈஸ்வரி, விஜயசந்திரன், பழனிராஜா, கண்ணன் ஆகியோர் ஆபரேஷன் செய்தனர். வாயின் ஒரு பகுதியில் உள்ள சதையை எடுத்து, இறுகி போன சதைக்கு பதில் பொருத்தி, மீண்டும் வாயை திறக்க செய்தனர்.

டாக்டர் வெங்கடாசலபதி கூறுகையில், "பான்பராக், ஹன்ஸ், புகையிலை, பாக்கை மெல்லும்போது, வெப்பம் ஏற்படும். இதனால் சதையில் ரத்தம் ஓட்டம் பாதித்து இறுகி, கட்டியாகி விடும். இது 90 சதவீதம் புற்றுநோயாக மாற வாய்ப்புள்ளது' என்றார்.

முடிவுக்கு வந்த 20 ஆண்டு போராட்டம்: உசிலம்பட்டியை சேர்ந்த மூக்கன் மகள் ஜெயகீதா (20). பிறந்தது முதலே இவரால் வாய் திறக்க முடியவில்லை. திரவ உணவுகளை மட்டுமே உட்கொண்டார். அவ்வப்போது ஒரு விரலால் மட்டும் லேசாக வாயை திறந்து சாப்பிட்டார். இவருக்கும் டாக்டர் குழு ஆபரேஷன் செய்து, வாயை திறக்க செய்துள்ளனர்.

அவர்கள் கூறுகையில், "சிக்கலான சுகப்பிரசவத்தின் போது, சிசுவை வெளியே கொண்டு வரும் முயற்சியில், வாய்மூட்டு தாடை பாதிக்கும். குழந்தை வளர வளர தசைக்குப் பதில், எலும்பு வளர்வதால் வாய் திறக்க முடியாது. ஜெயகீதாவுக்கு இவ்வகை பாதிப்பு தான்' என்றனர்.

தினமலர்