கின்னஸ் சாதனைக்கு முயற்சிக்கும் சாகச வாலிபர் : மூக்கு வழியாக குளிர்பானம் பருகி அசத்தல்

தர்மபுரி: தர்மபுரி அருகே கின்னஸ் சாதனைக்காக பல்வேறு சாகசங்கள் செய்யும் வாலிபர், மூக்கு வழியாக குளிர்பானம் பருகி அசத்தி வருகிறார்.

தர்மபுரி அடுத்த மொரப்பூர், கோபிநாதம்பட்டியை சேர்ந்தவர் விவசாயி ஆதிமூலம். இவரது ஒரே மகன் வீரமணி (20). பெயரில் மட்டும் வீரம் இல்லாமல் புதிய சகாசங்களை தினம் அரங்கேற்றம் செய்வதில் வீரமுள்ளவராக உள்ளார்.அரூர் இ.ஆர்.கே., பள்ளியில் எஸ்.எஸ்.எல்.ஸி., வரை படித்து விட்டு, பாலக்கோடில் உள்ள தனியார் கல்லூரியில் டிப்ளமா ஹோட்டல் மேனேஜ்மென்ட் படிக்கிறார்.பள்ளி பருவத்தில் இருந்து மாவட்ட அளவிலான விளையாட்டுப் போட்டிகளில் ஆர்வமுடன் பங்கேற்றுள்ளார். விளையாடும் போதே மற்றவர்களை விட விளையாட்டில் உடல் வருத்தி சாகசங்கள் செய்வார். ஒன்பதாம் வகுப்பு படிக்கும் போது கின்னஸ் சாதனைகள் பற்றி தெரிந்து கொண்ட வீரமணி, ஏதாவது ஒரு கின்னஸ் சாதனை செய்ய வேண்டும் என்ற முயற்சியில் இறங்கினார்.

இதற்கு வீட்டில் அதிக எதிர்ப்பு இருந்ததால், தனியாக வாடகை வீடு எடுத்து தனிமையில் சாகசங்களை செய்ய துவங்கினார். ஆரம்பத்தில் செங்கல்லை தலையில் உடைப்பது, கருங்கல்லை வயிற்றில் வைத்து உடைப்பது என சாசகங்கள் செய்தார். இவரது நண்பர்கள் எல்லாரும் செய்வதுதானே என அலட்சியப்படுத்தியதால் மனமுடைந்த வீரமணி, புதிய சாகசங்கள் செய்ய முயற்சித்தார்.புதிய முயற்சியாக மூக்கு வழியாக எலக்ட்ரிக் ஒயரை விட்டு வாய் வழியாக இழுத்து மின்சாரத்தின் மூலம் பல்புகளை எரிய விட்டார். ஆச்சரியத்துடன் பார்த்த இவரது நண்பர்கள் ஊக்கம் அளித்ததையடுத்து, தன் சாகசங்களை புதுமைபடுத்த துவங்கினார்.வாழை பழத்தில் பெட்ரோல் ஊற்றி சாப்பிடுவது, கத்தியை தொண்டைக் குழியில் வைத்து வளைப்பது, ஓடும் பேனை நாக்கால் நிறுத்துவது, மூக்கில் எலக்ட்ரிக் ஒயர் விட்டு வாய் வழியாக எடுத்து அதன் மூலம் ஒரு குடம் தண்ணீரை தூக்குவது, இரண்டு நிமிடங்கள் தூக்கில் தொங்குவது உட்பட 22 புதிய சாகசங்களை செய்துள்ளார்.

இந்த சாகசங்களை பார்த்த பொதுமக்கள் மற்றும் முக்கிய பிரமுகர்கள் இவரை கின்னஸ் சாதனைக்கு வலியுறுத்தி வருகின்றனர். தொடர்ந்து வெளிநாடுகளில் இவரது சாதனை நிகழ்ச்சிகள் அரங்கேறுகிறது.சாகச பட்டியிலில் புதிய முயற்சியாக டியூப் மூலம் மூக்கு வழியாக கூல்ட்ரிங்ஸ் குடிப்பது, டபுள் பார் அடியில் நூறு கத்திகளை வைத்துவிட்டு பார் மீது சக்ராஷனத்தில் உள்ள வீரமணியின் உடல் மீது 130 எடையுள்ள பொருள்வைப்பது மற்றும் வாயில் பெட்ரோலை ஊற்றி 3.85 மீட்டருக்கு நெருப்பு ஜுவாலையை ஊதி கின்னஸ் ரெக்கார்டை முறியடிக்கும் புதிய முயற்சியில் இறங்கியுள்ளார்.""இந்த சாகசங்களால் உடல் ரீதியாக பெரிய அளவு எவ்வித பாதிப்பும் ஏற்படவில்லை,'' என, கூறும் வீரமணியின் உடலில் பல இடங்களில் பெரிய அளவுக்கு தீக்காயங்களும் வடுக்களும் உள்ளன. மனம் தளராமல் தொடர்ந்து கின்னஸில் இடம் பெற முயற்சிக்கும் கிராமத்து இளைஞனின் சாகசத்தை அனைவரும் பாராட்டி செல்கின்றனர்.

தினமலர்