பர்மா, கம்போடியா ஆகிய நாடுகளின் நிலையை அடைந்துள்ளது சிறீலங்கா: ஆசிய மனித உரிமைகள் ஆணைக்குழு

நிசாந்தன் · நிசாந்தன் Mon 13 Dec 2010 - 6:18

சிறீலங்காவில் மனித உரிமைகளும், ஊடக சுதந்திரமும், ஜனநாயகச் செயற்பாடுகளும் மறுக்கப்படுகின்றன. இந்த நிலையில் அது தற்போது பர்மா மற்றும் கம்போடியா ஆகிய நாடுகளின் நிலையை அண்மித்துள்ளது என கொங்கொங்கை தளமாக கொண்ட ஆசிய மனித உரிமைகள் ஆணைக்குழு விடுத்துள்ள அறிக்கையில் தெரிவித்துள்ளது.
அதன் 2010 ஆம் ஆண்டுக்கான அறிக்கையில் மேலும் தெரிவிக்கப்பட்டுள்ளதாவது:
சிறீலங்காவில் அரச தலைவரின் அதிகாரங்கள் நீதித்துறைக்கு மேல் உள்ளதால், அங்கு நீதித்துறை முடங்கிப்போயுள்ளது. 2006 ஆம் ஆண்டில் இருந்து 14 ஊடகவியலாளர்கள் கொல்லப்பட்டுள்ளனர். பெருமளவான ஊடகவியலாளர்கள் அச்சுறுத்தப்பட்டுள்ளதுடன், தாக்குதலுக்கும் உள்ளாகியுள்ளனர்.
ஊடக சுதந்திரத்தில், உலகில் உள்ள 175 நாடுகளில் சிறீலங்கா 162 ஆவது இடத்தில் உள்ளதாக எல்லைகள் அற்ற ஊடகவியலாளர் அமைப்பு கடந்த வருடம் வெளியிட்ட அறிக்கையில் தெரிவித்துள்ளது.
சிறீலங்கா அரசின் தடுப்புக்காவலில் 8,000 தொடக்கம் 10,000 விடுதலைப்புலிகளின் முன்னாள் உறுப்பினர்கள் உள்ளனர். போர் நிறைவுபெற்று ஒரு வருடம் கடந்த நிலையிலும் அவர்கள் நீதிமன்றத்தில் நிறுத்தப்படவில்லை. அவர்களை பார்வையிட அனைத்துலக செஞ்சிலுவைச்சங்கத்திற்கும் அனுமதி மறுக்கப்பட்டுள்ளது. இது அனைத்துலக சட்டத்தை மீறும் செயலாகும்.
பின்வரும் பரிந்துரைகளை நாம் சிறீலங்கா அரசுக்கு முன்வைக்கிறோம்:
சிறீலங்காவில் மனித உரிமைகள் மேம்பட வேண்டும். அனைத்துலக மனித உரிமை அமைப்புக்களுடன் இணைந்த செயற்பாடுகள் முன்னெடுக்கப்பட வேண்டும்.
மனித உரிமை அமைப்புக்களை சுதந்திரமாக செயற்பட சிறீலங்கா அரசு அனுமதிக்க வேண்டும்.
அனைத்துலகத்தின் விதிகளை அரசு மதிக்க வேண்டும் என்பதுடன், அதனை மீறியவர்கள் தண்டிக்கப்பட வேண்டும்.
சிறீலங்காவில் மேற்கொள்ளப்பட்ட மனித உரிமை மீறல்கள் குறித்த அனைத்துலக விசாரணைகளுக்கு அரசு ஒத்துழைப்புக்களை வழங்க முன்வரவேண்டும்.
சிறீலங்காவில் கொல்லப்பட்ட உதவி நிறுவனப்பணியாளர்கள் தொடர்பில் முழுமையான விசாரணைகள் மேற்கொள்ளப்பட வேண்டும்.
மனித உரிமை செயற்பாட்டாளர்களின் பாதுகாப்பை அரசு உறுதிப்படுத்துவதுடன், அவர்கள் சுதந்திரமாக செயற்பட அனுமதிக்க வேண்டும்.
பாதிக்கப்பட்ட மக்களுக்கு மனிதாபிமான உதவிகள் கிடைப்பதற்கு அனுமதிகள் வழங்கப்பட வேண்டும்.
கடத்தல்கள், காணாமல்போதல் மற்றும் நீதிக்குப்புறம்பான படுகொலைகளை அரசு தடுக்க வேண்டும்.
தடுப்புக்காவலில் உள்ளவர்கள் மீதான துன்புறுத்தல்கள் நிறுத்தப்பட வேண்டும் என அதில் தெரிவிக்கப்பட்டுள்ளது.
முழுமையான அறிக்கையை பார்வையிட இங்கே அழுத்தவும்: http://www.humanrights.asia/resources/hrreport/2010/AHRC-SPR-010-2010.pdf

பர்மா, கம்போடியா ஆகிய நாடுகளின் நிலையை அடைந்துள்ளது சிறீலங்கா: ஆசிய மனித உரிமைகள் ஆணைக்குழு

பர்மா, கம்போடியா ஆகிய நாடுகளின் நிலையை அடைந்துள்ளது சிறீலங்கா: ஆசிய மனித உரிமைகள் ஆணைக்குழு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக