ஸ்பெக்ட்ரம் முறைகேட்டை திசை திருப்புவதா? தலித் அமைப்புகள் கண்டனம்

**சிவா** · **சிவா** Sun Dec 12, 2010 4:20 pm

"2ஜி ஸ்பெக்ட்ரம் முறைகேட்டை, ஆதிதிராவிடர் மீதான தாக்குதல் என, தி.மு.க., பிரசாரம் செய்வது, மக்களை திசை திருப்பும் முயற்சி' என, ஆதிதிராவிடர் அமைப்புகள் கண்டனம் தெரிவித்துள்ளன.

"2ஜி' ஸ்பெக்ட்ரம் ஒதுக்கீட்டில், 1.76 லட்சம் கோடி ரூபாய் அரசுக்கு இழப்பு ஏற்பட்டதாக, நாடு முழுவதும் பரபரப்பு ஏற்பட்டுள்ளது. இந்த விவகாரத்தில் அத்துறை அமைச்சர் ராஜா ராஜினாமா செய்தார். முறைகேடு தொடர்பாக கூட்டுக்குழு விசாரணை கோரி, எதிர்க் கட்சிகள் நடத்தும் போராட்டத்தால், பார்லிமென்ட் முடங்கியுள்ளது. "ஆதிதிராவிடர் என்பதால், ராஜா மீது தாக்குதல் நடத்தப்படுகிறது' என, முதல்வர் கருணாநிதியும், தி.மு.க.,வினரும் பேசி வருகின்றனர்.

இதுகுறித்து ஆதிதிராவிடர் அமைப்பு தலைவர்கள் தெரிவித்த கருத்துகள்:

சமூக சமத்துவப்படை தலைவர் சிவகாமி (ஓய்வு பெற்ற ஐ.ஏ.எஸ்., அதிகாரி): ராஜாவை, முதல்வர், அமைச் சராக பார்க்கிறாரா, ஆதிதிராவிடராக பார்க்கிறாரா என தெரியவில்லை. "ஸ்பெக்ட்ரம்' ஒதுக்கீட்டில் தாழ்த்தப்பட்டோர் யாரும் பயன்பெறவில்லை. ராஜாவை பத்திரிகைகள் ஆதிதிராவிடர் என்று எழுதவில்லை; அவரை ஆதிதிராவிடர் என அடையாளம் காட்டியதே தி.மு.க., தான். இது கேவலமான செயல். சிறப்பு உட்கூடு திட்டத்தை முறையாக அமல்படுத்துவது குறித்து, எஸ்.சி., எஸ்.டி., ஆணையம் பயனாளிகள் பட்டியலை கேட்டும், அரசு தரவில்லை. பஞ்சமி நிலம் 12 லட்சம் ஏக்கர் பறிபோயுள்ளதை மீட்க முடியவில்லை. உமாசங்கர் விவகாரம் எல்லாருக்கும் தெரியும். நிலைமை இப்படி இருக்க, விவகாரத்தில் பயனடைந்துள்ளதாக கூறப்படும் குடும்ப உறுப்பினர்களை காப்பாற்றவும், மக்களை திசை திருப்பவுமே முதல்வர், "ஆதிதிராவிடர்' என்ற பிரசாரத்தை கையில் எடுத்துள்ளார்.

புதிய தமிழகம் கட்சித் தலைவர் கிருஷ்ணசாமி: "ஸ்பெக்ட்ரம்' ஊழல் இந்தியாவை உலுக்கும் சம்பவம். இதில், ஆதிதிராவிடர், பிற்படுத்தப்பட்டோர் என்றெல்லாம் கூற முடியாது. யார், யாருக்கு தொடர்பு, எவ்வளவு பயன் பெற்றனர் என்ற உண்மையை கொண்டு வர வேண்டிய கடமை மத்திய அரசுக்கு உண்டு. இதன் மூலம் பயன் பெற்றுள்ள 200க்கும் மேலான நிறுவனங்களையும், கட்சியினரையும் ஜாதியை சொல்லி காப்பாற்ற முயல்வதும், ஊழலை மறைக்க முயல்வதும் கண்டனத்துக்குரியது. ஊழலில் ஆதிதிராவிடர், திராவிடம், ஆரியம் என்றெல்லாம் பேசுவதை முதல்வர் நிறுத்தாவிட்டால், நாங்கள் வேறு மாதியான நடவடிக்கைகளில் இறங்க வேண்டியிருக்கும்.

இந்திய குடியரசு கட்சித் தலைவர் செ.கு.தமிழரசன்: 1.76 லட்சம் கோடி ரூபாய் ஊழல் விவகாரத்தில், ஆதிதிராவிடர் மீதான தாக்குதல் என ஒரு பொறுப்புள்ள முதல்வர் சொல்வது சரியல்ல; இது கடைந்தெடுத்த மோசடி. சபாநாயகர் மீரா குமார், ஆறு கேபினட் அமைச்சர்களும் ஆதிதிராவிடர் தான். அவர்கள் மீது குற்றச்சாட்டு ஏதும் இல்லையே; அப்புறம் எப்படி ஆதிதிராவிடர் மீதான தாக்குதல் என கூற முடியும். ஜாதி சாயத்தை பூசி, ஆட்சியை, கட்சியை, குடும்பத்தை காப்பாற்றிக் கொள்ள, இவ்வாறு பிரசாரம் நடக்கிறது. ஆதிதிராவிடர் என்பதால் குற்றச்சாட்டுகள் வந்துள்ளது என்றால், இந்த இழி செயலை ஏற்றுக் கொள்ள மாட்டோம் என கொதித்தெழுந்து, தி.மு.க., அமைச்சரவையிலிருந்து ஏன் வெளியேறவில்லை. இதை மக்கள் ஏற்க மாட்டர்.

காங்., எம்.எல்.ஏ., ஜெயக்குமார்: ஆதிதிராவிடர் என்பதால் தாக்குதல் என்ற நிலையை தி.மு.க., எடுத்துள்ளது சரியல்ல. இதுபோன்ற நிலை வரும்போது, குற்றச்சாட்டுகள் தவறு என்பதை நிரூபிக்கும் வகையில், கருத்துக்களை மக்கள் மன்றத்தில் வைக்க வேண்டுமே தவிர, ஆதிதிராவிடர் என்ற பிரச்னையை முன் வைக்கக் கூடாது. அதுவும் முதல்வர் அப்படி சொல்லக் கூடாது.

அம்பேத்கர் மக்கள் இயக்க தலைவர் வை.பாலசுந்தரம்: மடியில் கனமில்லை என்றால், கூட்டுக்குழு விசாரணைக்கு மத்திய அரசு உத்தரவிடாதது ஏன்? அவையை இவ்வளவு நாட்கள் முடக்கியது சரித்திரத்தில் ஒரு களங்கத்தை ஏற்படுத்தும் செயல். ராஜா ஒரு ஆதிதிராவிடர் என்பதால் தாக்குதல் நடத்துகின்றனர் என முதல்வர் கூறுகிறார். மாபெரும் ஊழல் விவகாரத்தில், ஜாதியை காரணம் காட்டி, ஆதிதிராவிட மக்களை இழுப்பது அறிவுக்கு அழகல்ல. திசை திருப்பும் முயற்சி மக்களிடம் எடுபடாது; உண்மை வெளிப்பட்டே தீரும்.

பகுஜன் சமாஜ் கட்சி மாநில தலைவர் ஆம்ஸ்ட்ராங்: நெல்லை துணைவேந்தர் காளியப்பன், டி.ஆர்.ஓ., ஜனார்த்தனம் ஆகியோரை தாக்கியோர் மீது, இதுவரை நடவடிக்கை எடுக்காத முதல்வர், தற்போது ஆதிதிராவிடர் என்று சொல்வது மக்களை திசை திருப்பும் முயற்சி. தங்களை பாதுகாத்துக் கொள்ள எடுக்கும் முயற்சி தான் என்பது மக்களுக்கு நன்றாக தெரியும்.

- தினமலர் சிறப்பு நிருபர் -