காசி குண்டு வெடிப்பு இந்தியன் முஜாகிதீன் அமைப்பு பொறுப்பேற்றது

லக்னோ : வாரணாசி குண்டு வெடிப்பில் ஈடுபட்ட குற்றவாளிகளை கண்டுபிடிக்க, பல்வேறு கோணங்களில் விசாரணை தீவிரப்படுத்தப்பட்டுள்ளது. இந்த விசாரணைக்கு உதவுவதற்காக குஜராத்திலிருந்து தடயவியல் நிபுணர்கள் வரவழைக்கப்பட்டுள்ளனர்.

காசி என்றழைக்கப்படும் வாரணாசியில் உள்ள தச அஸ்வமேத் காட் பகுதியில் கடந்த செவ்வாய் கிழமை குண்டு வெடிப்பு நிகழ்ந்தது. இதில், இரண்டு வயது குழந்தை பலியானது; மேலும் 37 பேர் காயமடைந்தனர். இந்த குண்டு வெடிப்புக்கு இந்தியன் முஜாகிதீன் அமைப்பு பொறுப்பேற்றது.இது தொடர்பாக, உத்தர பிரதேச பயங்கரவாத தடுப்பு போலீசார் (ஏ.டி.எஸ்.,) விசாரணை நடத்தி வருகின்றனர். குண்டு வெடிப்பு நடந்த பகுதியில் கைப்பற்றப்பட்ட பொருட்கள், ஆக்ராவிலுள்ள தடய அறிவியல் சோதனை மையத்துக்கு அனுப்பப்பட்டு ஆய்வு செய்யப்பட்டு வருகின்றன.குண்டு வெடிப்பு நடந்து மூன்று நாட்கள் ஆகியும், குற்றவாளிகள் குறித்த எந்த துப்பும் கிடைக்காததால், விசாரணையில் தொய்வு ஏற்பட்டுள்ளது.

பலத்த பாதுகாப்புக்கு மத்தியிலும் குண்டு வெடிப்பு நடந்துள்ளதால், இந்தியன் முஜாகிதீன் பயங்கரவாத அமைப்பு புதிய யுக்தியை பயன்படுத்தி குண்டு வெடிப்பை நிகழ்த்தியதாகக் கருதப்படுகிறது.அவர்கள் எந்த யுக்தியை பயன்படுத்தி குண்டு வெடிப்பை நிகழ்த்தினர் என்பதை கண்டுபிடிக்க போலீசார் தீவிர முயற்சி மேற்கொண்டுள்ளனர். எனவே, விசாரணையை துரிதப்படுத்துவதற்காக, குஜராத்திலிருந்து தடயவியல் நிபுணர்கள் காசிக்கு வரவழைக்கப்பட்டுள்ளனர். அவர்கள் குண்டு வெடிப்பு நடந்த இடத்தில் ஆய்வுகள் நடத்த உள்ளனர்.

மேலும், குண்டு வெடிப்பு நடப்பதற்கு சற்று முன்பும், அதன் பின்னரும், ஊடகங்களுக்கு பயங்கரவாதிகளிடமிருந்து அனுப்பப்பட்ட இ-மெயில்கள் குறித்து பயங்கரவாத தடுப்பு போலீசாரும், புலனாய்வு அமைப்புகளும் தீவிரமாக விசாரணை மேற்கொண்டுள்ளன.இது தொடர்பாக, 15 ஆயிரம் போன் இணைப்புகளை அவர்கள் ஆய்வு செய்து வருகின்றனர். இதன் மூலம், குற்றவாளிகள் பற்றிய முக்கிய துப்பு கிடைக்கும் என அவர்கள் நம்புகின்றனர்.தவிர, ஜான்பூர் மற்றும் அசாம்கர் மாவட்டங்களிலிருந்து செயல்படும் பயங்கரவாத அமைப்புகளுக்கு இதில் தொடர்பிருக்கலாம் என்ற சந்தேகம் எழுந்துள்ளதால், சந்தேகிக்கப்படும் நபர்களை போலீசார் தீவிரமாக கண்காணித்து வருகின்றனர்.மேலும், குண்டு வெடிப்பில் மூளையாகச் செயல்பட்டதாகக் கருதப்படும், பட்கல் சகோதரர்கள் மற்றும் ஷா நவாஸ் ஆகியோருக்கு எதிராக சர்வதேச போலீஸ்(இண்டர்போல்) மூலம் ரெட் கார்னர் நோட்டீஸ் வெளியிடப்பட்டுள்ளது.

இருப்பினும், தடயவியல் சோதனை முடிவுகளை அடிப்படையாகக் கொண்டு விசாரணை நடத்தினால், விசாரணையில் குறிப்பிடத்தக்க முன்னேற்றம் ஏற்படும் என போலீசார் தெரிவித்துள்ளனர்.இதனிடையே, "குண்டு வெடிப்பில் தொடர்புடையதாகக் கருதப்படும் டாக்டர் ஷா நவாசுடன், காங்கிரஸ் பொதுச்செயலர் திக்விஜய் சிங்குக்கு நெருங்கிய தொடர்பு உள்ளது. அவரை உத்தர பிரதேச அரசு கைது செய்து விசாரணை நடத்தினால் உண்மைகள் வெளிவரும்' என, பா.ஜ., துணைத் தலைவர் வினய் கட்டியர் கூறியுள்ளார். தனது கருத்துக்கு ஆதரவாக அசம்கார் மாவட்டத்தில் ஏற்கனவே புகார் கூறப்பட்ட ஷா நவாஸ் கான் வீட்டிற்கு சென்று மூன்று மணி நேரம் தங்கியது குறித்து கேள்வி எழுப்பியிருக்கிறார். இது, அரசியல் வட்டாரத்தில் பெரும் பரபரப்பை ஏற்படுத்தியுள்ளது.

நன்றி தினமலர்

இரண்டு வயசு குழந்தை உயிர எடுத்ததுல இவனுங்களுக்கு என்ன சந்தோஷம் கிடைக்க போகுது.........

எத்தனை இந்தியன் முஜாகிதின் வந்தாலும் இந்திய அரசாங்கம் வேடிக்கை பார்த்துட்டுதான் இருக்கும்.இதுவே அவர்கள் வீட்டில் எதாச்சும் உயிர் இந்த மாதிரி குண்டு வெடிப்பில் போனால் அப்பத்தான் தெரியும் இவர்களுக்கு உயிரின் மதிப்பு.
துப்பு கேட்ட அரசாங்கம்.