இலவசங்களால் வறுமை ஒழியாது : முன்னாள் ஐ.ஏ.எஸ்., அதிகாரி பேச்சு

ஈரோடு : ""இலவசங்களை கொடுப்பதால் வறுமை, வேலைவாய்ப்பு பிரச்னை தீராது; மாறாக, வேலைவாய்ப்பு திண்டாட்டம் தான் அதிகரிக்கும்,'' என, முன்னாள் ஐ.ஏ.எஸ்., அதிகாரி சிவகாமி கூறினார். உலக மயமாக்கல் மூலம், ஒடுக்கப்பட்ட மக்களை மேன்மைபடுத்தும் நோக்கத்துடன், பல்கலை மானியக் குழு சார்பில் தேசிய கருத்தரங்கம், ஈரோடு வேளாளர் மகளிர் கல்லூரியில் நடந்தது.

முன்னாள் ஐ.ஏ.எஸ்., அதிகாரி சிவகாமி பேசியதாவது: உலகமயமாதலால் பொருளாதார ரீதியாகவும், பிற வசதிகள் மூலமாகவும் வளர்ச்சி பெற்றிருந்தாலும், ஒவ்வொரு நாடும் ஒடுக்கப்பட்ட மக்களை மேம்படுத்த, பல்வேறு வழிகளில் உதவி புரிகிறது. தற்போது நம் நாடு 8.01 சதவீதம் வளர்ச்சி பெற்றிருப்பது பாராட்டுக்குரியது. அதே சமயம், சமுதாயத்தில் ஒடுக்கப்பட்ட, பழங்குடி மக்களை அவர்கள் நிலையில் பாதுகாப்பது மிகவும் அவசியம். அரசு அதற்கான பணியில் ஈடுபட வேண்டும். தொழில் ரீதியாக வளர்ச்சி பெறும் வாய்ப்பை, அவர்களுக்கு உருவாக்கி கொடுக்க வேண்டும். இதையெல்லாம் வறுமை ஒழிப்பின் மூலமும், வேலை வாய்ப்பை உருவாக்கி கொடுப்பதால் மட்டுமே முடியும். அதைவிட்டு இலவசங்களை கொடுப்பதால் வறுமை ஒழியாது; வேலைவாய்ப்பு பிரச்னையும் தீராது; மாறாக, வேலைவாய்ப்பு திண்டாட்டம் தான் அதிகரிக்கும். உலகமயமாக்கல் மூலம் பொருளாதார ரீதியாக உயர்வு இருந்தாலும், கட்டுப்படுத்த முடியாத விலைவாசி உயர்வு, வேலைவாய்ப்பு குறைதல், வேலைப்பளு அதிகரித்தாலும் குறைவான சம்பளம் பெறும் அவலம் நீடிக்கிறது. இது தீர்க்கப்பட வேண்டும். தற்போதுள்ள சூழ்நிலையில், இரண்டு வழிகள் உள்ளன. அரசு நிலத்தை ஏழை பெண்களுக்கு கொடுப்பது மற்றும் கிராமங்களில் தொழிற்சாலைகளை துவங்கி, வேலைவாய்ப்பை உருவாக்குவதன் மூலம் மட்டுமே, ஒடுக்கப்பட்ட மக்களை பாதுகாக்க முடியும். அமைப்பு சாரா தொழிலாளர் நல வாரியம் அமைத்து, அவர்களுக்கு நிவாரணம் வழங்குவதை விட, தொழில் துவங்க அவர்களுக்கு பயிற்சி, கல்வி அளிக்க வேண்டும். அரசு நிலங்களை, மகளிர் குழுக்கள் வசம் கூட ஒப்படைக்கலாம். கிராம வளர்ச்சியில் இன்று, மகளிர் குழுக்களின் சேவை நல்ல வளர்ச்சியை கண்டுள்ளது. இவ்வாறு சிவகாமி பேசினார்.

தினமலர்