சர்வதேச குற்றவியல் நீதிமன்றத்தின் கீழ் கோஹனவை நிறுத்த சந்தர்ப்பம்

நிசாந்தன் · நிசாந்தன் Fri Dec 10, 2010 3:31 am

ஐக்கிய நாடுகளுக்கான இலங்கையின் நிரந்தரப் பிரதிநிதியாக இருந்த டாக்டர் பாலித கோஹன சர்வதேச குற்றவியல் நீதிமன்றில் விசாரணைக்கு உட்படுத்தப்படலாம் எனத் தெரியவந்துள்ளது. ரோம் சட்டக் கோவைக்கான கட்சிக் கூட்டத்தின் 9 ஆவது அமர்வில் உரையாற்றிய சர்வதேச குற்றவியல் நீதிமன்றுக்கான அரசு வழக்கறிஞரான மரினோ ஓ'கம்போ, ரோம் சட்டக் கோவைக்கு உட்பட்ட நாட்டின் பிரஜாவுரிமை உள்ளவர்கள் குற்றங்களைப் புரிந்தார்கள் என்பது தெளிவானால், அவர்கள் சர்வதேச குற்றவியல் நீதிமன்றின் நடவடிக்கைக்கு ஆளாகக் கூடிய சாத்தியம் உள்ளது எனத் தெரிவித்தார். எனவே சர்வதேச நீதிமன்றின் ரோம் சட்டக் கோவையின் ஆட்சிக்கு உட்பட்ட நாடான அவுஸ்திரேலியாவின் பிரஜாவுரிமையையும் வைத்துள்ள கோஹனவை விசாரிக்கக்கூடிய அதிகாரம் உள்ளது.

செவ்வாய்க்கிழமை அன்று ஐக்கிய நாடுகள் சபையில் வைத்து நடந்த இவ்வுரையிலேயே ஓ'கம்போ மேற்படி தகவலைத் தெரிவித்தார். அங்கு கூடியிருந்த இன்னர்சிற்றி பிரெஸ் அவரிடம் இலங்கையில் நடந்த படுகொலைகள் பற்றியும், சர்வதேச குற்றவியல் நீதிமன்றம் இதற்கு நடவடிக்கை எடுக்குமா? எப்போது அந்த நடவடிக்கையை எடுக்கும்? எனக் கேள்வி தொடுத்தது.

இலங்கை அரசானது சர்வதேச குற்றவியல் நீதிமன்றின் ரோம் சட்டக் கோவைக்கு உட்பட்ட நாடு அல்ல என்று ஓ'கம்போ பதிலளிக்கத் தொடங்கினார். ஆனால் இலங்கையில் போர்க் குற்றம் புரிந்தவர்கள் எனக் குற்றம் சாட்டப்படும் பலருக்கும் இரு நாடுகளின் பிரஜாவுரிமை உள்ளது. அவர்களில் சிலர் சர்வதேச குற்றவியல் நீதிமன்றில் உறுப்புரிமை உடைய நாடுகளின் பிரஜாவுரிமையைக் கொண்டுள்ளனர் என்று இன்னர்சிற்றி பிரெஸ் சுட்டிக்காட்டியது.

இறுதிக்கட்டப் போரில் சரணடைந்த விடுதலைப் புலிகள் இயக்க உறுப்பினர்கள் கொல்லப்பட்டதில் பாலித கோஹனவும் உடந்தையாக இருந்தார் என பரவலாக நம்பப்படுகிறது.

இருப்பினும், ஒரு நாட்டின் இறைமையைக் காக்க சர்வதேச குற்றவியல் நீதிமன்றுக்கான ஐ.நா இன் ரோம் சட்டக்கோவையானது தமது கொள்கையின்படி ஆதரவு வழங்குகிறது. எனவே ஒரு குற்றச்சாட்டானது தற்பொழுது அந்நாட்டில் விசாரணைக்கு உட்படுத்தப்பட்டிருக்கிறது என்றால், இக்கொள்கைக்கு ஏற்ப அக்குற்றச்சாட்டை சர்வதேச நீதிமன்றின் முன்னிலையில் கொண்டுசெல்ல முடியாது. ஆனால் ஒரு நாடு அவ்விசாரணையை நடத்த அல்லது தொடர்ந்து கொண்டுசெல்ல முடியாதிருக்கும் பட்சத்தில் அல்லது குறித்த குற்றம் சாட்டப்பட்ட நபரை குற்றச்சாட்டிலிருந்து விடுவித்துப் பாதுகாக்கும் விதத்தில் நம்பிக்கையில்லாத ஒரு விசாரணையை அந்நாடு நடத்தும் பட்சத்தில் சர்வதேச நீதிமன்றில் இவ்வழக்கைக் கொண்டு செல்லலாம்.

எனவே, அவுஸ்திரேலிய குடியுரிமை உடைய பாலித கோஹனவை அவுஸ்திரேலியாவானது விசாரணைக்கு உட்படுத்தும் நிலையில் இல்லை என்பதை முதலில் அங்குள்ள சட்ட வல்லுநர்கள் எடுத்துக்காட்டுவது அவசியமாகும். இதன் பின்னர் மட்டுமே பாலித கோஹனவை சர்வதேச குற்றவியல் நீதிமன்றில் முன்னிலையில் நிறுத்தும் நிலையைக் கொண்டுவரலாம்.

சர்வதேச குற்றவியல் நீதிமன்றத்தின் கீழ் கோஹனவை நிறுத்த சந்தர்ப்பம்

சர்வதேச குற்றவியல் நீதிமன்றத்தின் கீழ் கோஹனவை நிறுத்த சந்தர்ப்பம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக