தில்லையாடியில் 2500 ஆண்டுகள் பழமையான முதுமக்கள் தாழி கண்டெடுப்பு

நாகை மாவட்டம், தரங்கம்பாடி தாலுகா, தில்லையாடி சவுக்கடி தெருவை சேர்ந்தவர் நலபூபதி. வெளிநாட்டில் வேலை பார்த்து வருகிறார். புதிதாக கட்டப்பட்டு வரும் இவரது வீட்டின் பின்புறம் செப்டிக் டேங் அமைக்க நேற்று எட்டு அடி ஆழம் குழி தோண்டப்பட்டது.அதில், முதுமக்கள் தாழி இருப்பதை பார்த்த நலபூபதியின் மனைவி நிமா கொடுத்த தகவலையடுத்து, தரங்கம்பாடி தாசில்தார் ரெங்கராஜன், ஆர்.ஐ., சரவணன் ஆகியோர் முதுமக்கள் தாழியை மூடியிருந்த மணலை அகற்றி பார்த்தனர்.

தாழிக்குள் சிவப்பு, கறுப்பு நிற கலயங்கள் 4, அரையடி அகலமுள்ள தட்டு 2, கிண்ணம் 6, கெட்டியாகி கல்லான மனிதனின் பல் வரிசை ஒன்று இருந்தது. தாழியின் மீது மூன்று துண்டுகளாக உடைந்த 3.5 அடி நீளமுள்ள போர் வாள் ஒன்று சாத்தி வைக்கப்பட்டிருந்ததும் கண்டுபிடிக்கப்பட்டது.

கண்டெடுக்கப்பட்ட முதுமக்கள் தாழி 5 அடி உயரமும், மேல் வாய் விட்டம் 2.5 அடியும், சுற்றளவு 5 அடியும் இருந்தது. இதை நாகை மாவட்ட கலெக்டர் முனியநாதன், தரங்கம்பாடி டேனிஷ் கோட்டை தொல்லியல் துறை காப்பாட்சியர் முத்துசாமி ஆகியோர் பார்வையிட்டனர்.

பின், நிருபர்களை சந்தித்த தொல்லியல் துறை காப்பாட்சியர் முத்துசாமி கூறுகையில்," இந்த பகுதியில் வாழ்ந்த போர்ப்படை தளபதியின் தாழியாக இருக்கலாம். கிராமங்களில் இந்த முதுமக்கள் தாழியை மதமதக்காசால் என்றும், ஆய்வாளர்கள் பெருங்கற்கால ஈமச் சின்னம் எனவும் குறிப்பிடுவர்.
இந்த தாழி 2,500 ஆண்டுகள் பழமையானது. கடந்த இரண்டு மாதங்களுக்கு முன், இதே போல திருமங்கலத்திலும் தாழி கிடைத்துள்ளது. இந்த தாழியை வேதிப்பொருட்களால் சுத்தம் செய்து தரங்கம்பாடி டேனிஷ் கோட்டை அருங்காட்சியகத்தில் வைக்க கலெக்டர் அனுமதி அளித்துள்ளார்' என்றார்.

vaanga vaanga pitchai -