வங்கிகளில் உரிமை கோராத பணம் ரூ.1,400 கோடி

வங்கிகளில் உரிமை கோராத பணம் ரூ.1,400 கோடி உள்ளது. அரசு வங்கிகளில் 10 ஆண்டுகளுக்கும் மேலாக உரிமை கோராமல் இந்த தொகை உள்ளது. இதை வங்கி முதலீட்டாளர்கள் விழிப்புணர்வுக்கு பயன்படுத்தப் போவதாக மத்திய நிதி அமைச்சர் பிரணாப் முகர்ஜி தெரிவித்தார்.

இதன்படி 10 ஆண்டுகளுக்கு மேலாக உரிமை கோராத பணம் வாடிக்கையாளர் விழிப்புணர்வு நிதியத்தில் சேர்க்கப்படும் என்று அவர் தெரிவித்தார். 1949-ம் ஆண்டு வங்கி சீரமைப்பு சட்டத்தில் உள்ளபடி வங்கி வாடிக்கையாளர்கள் விழிப்புணர்வு நிதி ஏற்படுத்தப்பட்டுள்ளது. இந்த நிதியை எவ்விதம் பயன்படுத்துவது என்பது குறித்து ரிசர்வ் வங்கியுடன் ஆலோசனை செய்து முடிவெடுக்கப்படும் என்று கூறினார்.

பின்னாளில் முதலீட்டாளர்கள் தங்களது சேமிப்பு குறித்து உரிய ஆவணத்தை அளித்து கோரினால் அத்தொகை வட்டியுடன் அளிக்கப்படும் என்று ரிசர்வ் வங்கி தெரிவித்துள்ளது.

தற்போது வங்கிகளில் உரிமை கோராத சேமிப்புத் தொகையும் சேமிப்பாகவே கணக்கிடப்படுகிறது. 2009-ம் ஆண்டு டிசம்பர் 31-ம் தேதி நிலவரப்படி வங்கிகளில் உரிமை கோராத தொகை ரூ.1,360 கோடியாகும்.

இதில் கனரா வங்கியில் மிக அதிகபட்சமாக ரூ.218 கோடியும், பஞ்சாப் நேஷனல் வங்கியில் ரூ.160 கோடியும், யூனியன் பாங்க் ஆப் இந்தியாவில் ரூ.100 கோடியும் உள்ளது.

முதலீட்டாளர் விழிப்புணர்வு நிதியத்தில் உள்ள பணத்தை நிர்வகிப்பதற்கு தனி குழுவை ரிசர்வ் வங்கி ஏற்படுத்தும். இக்குழுவினர் இந்த நிதியை நிர்வகிப்பர்.

வங்கிகள் தங்களிடம் 10 ஆண்டுகளுக்கும் மேலாக உரிமை கோராத தொகையை அடுத்த மூன்று மாதங்களுக்குள் இந்த நிதியத்தில் சேர்க்க வேண்டும் என்று ரிசர்வ் வங்கி அறிவுறுத்தியுள்ளது.

இதன் மூலம் வங்கிகளில் உரிமை கோராத தொகையை நிர்வகிப்பதில் உள்ள சிரமம் குறையும். அத்துடன் தவறாக பயன்படுத்துவதையும் தடுக்க முடியும். 2009-ம் ஆண்டு நிலவரப்படி அனைத்து வங்கிகளிலும் சுமார் ஒரு கோடி கணக்குகள் செயல்படுத்தப்படாமல் உள்ளன.

சமீபத்தில் தொழிலாளர் வருங்கால வைப்பு நிதிக் கணக்கில் மூன்று ஆண்டுகளுக்கும் மேலாக எவ்வித தொகையும் போடாமலிருந்தால், அதற்கு வட்டி அளிப்பதை நிறுத்தி வைத்துள்ளது. இதன் மூலம் தொழில்நிறுவனங்கள் தொகையை உரிய காலத்தில் செலுத்தும் என்பதால் இத்தகைய உத்தரவை பிறப்பித்துள்ளது குறிப்பிடத்தக்கது.