மலையக யுவதிகளின் மரணத்தில் சந்தேகம் வலுக்கிறது

பௌத்தலோகா மாவத்தை கால்வாயில் இருந்த இரு பெண்களும் தற்கொலை செய்யவில்லை என உறவினர்கள் கூறுவதால் சந்தேகம் எழுந்துள்ளது.

கடந்த சனிக்கிழமை காலையில் பௌத்தலோகா மாவத்தை கால்வாயில் சடலங்களாகக் கண்டெடுக்கப்பட்ட இரு பெண்களும் தற்கொலை செய்து கொண்டதாக போலீசார் கூறினர். ஆனால் அது தற்கொலை அல்ல என்ற சந்தேகம் வலுத்துள்ளது. இறந்த ஜீவராணி (15), சுமதி (16) ஆகிய இருவரின் பெற்றோர், உறவினர்கள் இந்த மரணத்தில் சந்தேகம் இருப்பதை டெய்லி மிரர் பத்திரிகைக்குத் தெரிவித்துள்ளனர். இறந்தவர் ஒருவரின் சகோதரி கூறும்போது, தமது சகோதரியின் எழுதியதாகக் காண்பிக்கப்பட்ட கடிதம் அவருடைய கையெழுத்தில் இல்லை என்கிறார்.

ஜீவராணியின் தாயார் இதுபற்றிக் கூறியபோது, கடந்த வெள்ளிக்கிகிழமை தமது மகளையும் சுமதியையும் பார்க்கச் சென்றதாகவும், வழமையாக அவர்கள் வேலை செய்யும் வீட்டுக்குச் சென்றால் வீட்டின் வெளியில் தங்கும் அவருக்கு அன்றைய தினம் வீட்டு உரிமையாளர் தேனீரும், பிஸ்கட்டும் வழங்க தாம் அதை வெளியில் இருந்தே அருந்திவிட்டு மகள் கொடுத்த 3000 ரூபா பணத்தைப் பெற்றுக்கொண்டு கிளம்பியதாகவும் கூறினார்.

இதேவேளை அவர்கள் இருவரும் இரு மாதங்களின் பின்னர் வரும் தீபாவளிப் பண்டிகைக்கு வீடு வருவதாகவும் உறுதிதந்ததாகக் கூறியுள்ளார்.

சடலங்களை கால்வாயில் இருந்து வெளியே எடுக்கஉதவிய தொழிலாளி ஒருவர் தமது கருத்தைக் கூறும்போது, இரு பெண்களின் உடல்களும் கால்வாய்க்கு 5 மீற்றர் தள்ளியே இருந்ததாகவும், அவர்கள் இருவரும் தற்கொலை செய்ய குதித்திருந்தால் அவை தூரத்தில் நீருக்குள் மூழ்கியபடி இருந்திருக்கும் எனக் கூறியுள்ளமையும் சந்தேகத்தை மேலும் வலுப்படுத்துகிறது.

சுமதியும், ஜீவராணியும் நல்ல நண்பிகள், கடந்த வெள்ளிக்கிழமை இரவு தொலைபேசியில் பேசியபோது கூட ஒன்றுமே அவர்கள் கூறவில்லை. ஆனால் சனி காலை 5.30 மணிக்கு அவர்கள் இருவரும் காணாமல் போய் விட்டதாகவும், பின்னர் 10.30 அளவுல் அவர்களிருவரின் உடல்கள் கண்டெடுக்கப்பட்டதாகவும் செய்தி வந்ததாக சுமதியின் அம்மா கூறியுள்ளார். சுமதியின் அப்பா மகளின் இறப்பை ஏற்கவோ, போலீசார் கொடுக்கும் விளக்கத்தைக் கேட்கும் நிலமையிலோ இல்லை. வருகின்ற 21 ஆம் திகதி நீதிமன்ற விசாரணைகளுக்காக கொழும்பு வர வேண்டும் என்று கூறினார் அவர்.

இச்சம்பவங்கள் பற்றி பௌத்தலோகா வீட்டு உரிமையாளர்களிடம் அணுகினால் அவர்கள் இதுபற்றித் தாம் ஒரு கருத்தும் கூறமுடியாது என்றும் தேவையானவற்றை போலீசாரிடம் கேட்குமாறும் முகத்தில் அடித்தாற்போலக் கூறியதாக டெய்லி மிரர் எழுதியுள்ளது. குடியரசு ஐக்கிய முன்னணி மனோ கணேசனைக் கேட்டபோது, தமக்கும் இந்தக் கொலைகளில் சந்தேகம் இருப்பதாகக் கருத்துக் கூறியுள்ளார்.

இரு உடல்களும் இன்று காலை கொழும்பிலிருந்து மஸ்கெலியா வந்துள்ளன. இறுதிச் சடங்குகள் இன்று நடைபெறும் என எதிர்பார்க்கப்படுகிறது.