சிவசக்தி ஐக்கியம்! - வழிபாட்டு முறை

சித்தம் சிவமாக்கி எனை ஆண்ட அத்தன் என்ற இறை அடியாரின் பொன்மொழியிலிருந்து. சித்தத்தை சிவமாக்குதலே மனித வாழ்வின் உன்னதமான லட்சியம் என்பதும்; அதுவே இறைவழிபாடு என்பதையும் உணரமுடிகிறது. பஞ்சபூதங்களால் உருவாக்கப்பட்ட இவ்வுலகில் பஞ்சபூத சுழற்சி முறையில் உலக இயக்கங்கள் நடைபெற்று வருகின்றன.

மனிதன் தனக்குள் இருக்கும் பஞ்சபூத சக்திகளை தனது சுயமுயற்சியால் பஞ்ச பூத சுழற்சிவிதிக்கு ஆட்படுத்தி, தனது ஆகாயத்தன்மையுடன் இணைத்திடும் பொழுது சித்தம் சிவமாக்கப்படும் நிகழ்வு சாத்தியமாகிறது. இந்நிகழ்வானது சிவசக்தி ஐக்கிய நிலையை உணர்த்துவதாய் அமைகிறது. சித்தம் உருவாக நீர்பூதம் முக்கிய காரணமாக அமைகிறது. மேலும் இது சக்தியின் அம்சமாகக் கருதப்படுகிறது. இச்சத்தியானது மூலாதாரத்தில் தோன்றி சுவாதிட்டானத்தில் நிலைத்து நின்று பின் ஒவ்வொரு ஆதாரகமலங்களாக உயர்ந்து, முடிவில் ஆகாய வெளியான சிவத்துடன் ஒன்றிக்கலக்கிறது.

நமது உடம்பில் சிவத்தை விட்டு சக்தி விலகி இருக்கும் தூரம், நமது கட்டை விரலின் நாற்பத்தெட்டு விரல் அளவு தூரம் என சான்றோர் கூறுகின்றனர்.

பிரிந்திருக்கும் சக்தியையும் சிவத்தையும் இணையச் செய்திடும் பொருட்டு நமது திருவிழாக்கள் ஒரு மண்டலம், அதாவது நாற்பத்தெட்டு நாட்கள் என அமைக்கப்பட்டிருக்க வேண்டும். சிவத்தை விட்டு விலகி இருக்கும் சக்தியை இணையச் செய்வதற்காக திருக்கோயில்களில் திருக்கல்யாண உற்சவங்கள் நடத்தப்படுகின்றன. சிவசக்தி ஐக்கியத்தின் வெளிப்படாக பேராற்றல்கள் கிடைக்கப்பெறுகின்றன. இந்த சிவசக்தி ஐக்கிய நிலைக்கு மனம் ஒன்றுபடுதல் அவசியமாவதால் மந்திரங்கள், பக்திப் பாசுரங்கள், பதிகங்கள், தீபாராதனை, ஸ்ரீ சக்ரவழிபாடு, ஹோம வழிபாடு, கலச வழிபாடு, தியான வழிபாடு போன்ற பல வழிபாட்டு முறைகளை சான்றோர் வகுத்துத்தந்துள்ளார்கள்.

-பி.கலைவாணி, வளசரவாக்கம்.