பணம் கொடுத்தால் வாக்காளர்களுக்கு உணர்வுகள் பொங்க வேண்டும்-சரத்குமார்

**சிவா** · **சிவா** Mon Nov 29, 2010 12:50 pm

கோவை: வாக்காளர்களுக்கு யாராவது பணம் கொடுத்து ஓட்டு கேட்டால் உணர்வுகள் பொங்க வேண்டும். அதை வாங்கக் கூடாது என்று சமத்துவ மக்கள் கட்சித் தலைவர் சரத்குமார் கூறியுள்ளார்.

கோவையில் கொங்கு மண்டல சமத்துவ மக்கள் கட்சியின் பொதுக் கூட்டம் நடைபெற்றது. இதில் கலந்து கொண்டு சரத்குமார் பேசுகையில்,

தமிழகத்தில் பல கட்சிகள் தொடங்கப்படுகின்றன. புதிய கட்சிகளை வரவேற்க வேண்டும். நல்லவர்கள், வல்லவர்கள் ஆகியோரை கொண்டு தொடங்கப்படும் கட்சிகளை நீங்கள் ஆதரிக்க வேண்டும்.

ஊழலற்ற, ஒளிவு மறைவில்லாமல் செயல்படும் தலைவர்களை உருவாக்கும் கட்சியை கொண்டது சமத்துவ மக்கள் கட்சி. ஆட்சியாளர்கள் கொண்டு வரும் நல்ல திட்டங்களை நாங்கள் வரவேற்கிறோம். அதே நேரத்தில் தவறு செய்தால் அதை சுட்டிக் காட்டுவோம்.

எங்கள் கட்சி தொடங்கி 3 ஆண்டுகள் தான் ஆகிறது. எங்கள் கட்சியில் அறிஞர்களை வைத்துள்ளோம்.

அவர்களுடைய ஆலோசனைகளை கேட்டு தான் கட்சி நடத்துகிறோம். 2-ம் தலைமுறை தலைவர்களை உருவாக்கும் கட்சி தான் சமத்துவ மக்கள் கட்சி.

நீங்கள் நினைத்து கூட பார்க்க முடியாத கட்சியாக சமத்துவ மக்கள் கட்சி வளரும். நாளைய சமுதாயத்தினரை, இளைய சமுதாயத்தினரை சிந்திக்க வைக்கும் கட்சியாக எங்கள் கட்சி வளரும். 2020-ம் ஆண்டில் இந்தியா அதிக இளைஞர்களை கொண்ட நாடாக விளங்கும். அப்போது அவர்களை வழி நடத்தும் பொறுப்பு நம்மிடம் உள்ளது.

நீங்கள் விஜயகாந்த் கட்சியுடன் கூட்டணி வைப்பீர்களா? என்று கேட்கிறார்கள். நல்லவர்கள் சேர்ந்து கூட்டணி அமைத்தால் அதை வெற்றி பெற செய்யுங்கள். அப்படி வெற்றி பெற்றால் முதலமைச்சருக்கோ, துணை முதலமைச்சர் பதவிக்கோ அடி தடி நடக்காது. நல்லவர்கள் கூட்டணியை மக்கள் வரவேற்க வேண்டும்.

தேர்தலில் பணம் கொடுக்கும் போது உங்களுக்கு உணர்வு பொங்க வேண்டும். அதை வாங்க கூடாது. யார் ஆட்சிக்கு வர வேண்டும் என்று சிந்திக்க வேண்டும் எங்களுக்கும் ஒரு காலம் வரும், தேர்தல் வரும். மக்கள் மனம் மாறும். அப்போது எங்களுக்கு வெற்றிகள் வரும் என்றார் அவர்.

தட்ஸ்தமிழ்!