குரங்கு சேட்டை

**சிவா** · **சிவா** Sun 28 Nov 2010 - 22:05

உச்சிமாகாளி அம்மன் கோவில் அருகே நின்ற அந்த விரிந்து படர்ந்த ஆலமரம் தான், பறவை இனங்களுக்குத் தாய் வீடு. காலங்காலமாக பறவைகள் இந்த ஆலமரத்தில் தான் கூடு கட்டி மகிழ்ச்சியோடு வசித்து வந்தன. கோவில் ஆலமரம் என்பதால் இங்கு வசிக்கும் பறவைகளை மக்கள் வேட்டையாடாமல் பாதுகாத்து வந்தனர்.

ஒருநாள் குரங்கு ஒன்று எப்படியோ வழி தவறி அந்தப்பக்கம் வந்தது. பெரிய ஆலமரத்தைக் கண்டதும், தான் தங்குவதற்கு வசதியான இடம் இதுதான் என்று நினைத்தது. கொத்துக் கொத்தாய் சிவப்பு நிற ஆலம்பழங்களை பறித்துத் தின்று பசியாறியதும், ஆலமர விழுதுகளில் ஊஞ்சலாடி மகிழ்ந்தது. பகலெல்லாம் இப்படிப் பொழுதைக் கழித்துவிட்டு, இரவு ஆலமரப்பொந்தில் தங்கிக் கொண்டது. குரங்கின் வருகை பறவைகளுக்கு அச்சத்தைத் தந்தாலும், தங்களுக்கு தொந்தரவு தராததால் பயமின்றி வாழ்ந்தன.

நாட்கள் நகர்ந்தன. குரங்கு தன் சேட்டையை காட்டத் தொடங்கியது.

``ஏ... சிவப்பு மூக்குக்காரி. உன் மூக்கை எனக்கு கொஞ்சம் இரவல் தாயேன்'' என கிளியைக் கிண்டலடித்தது. ``உடம்புதான் வெண்மை, உள்ளம் அப்படியா?'' என கொக்குகளைச் சீண்டி விளையாடியது. "அடுப்புக்கரியை பூசிக் கொண்டீர்களா? கறுப்புதான் எனக்குப் பிடிக்காத கலரு'' என பாட்டு பாடி காக்கைகளை நையாண்டி செய்தது.

குரங்கின் இந்தச் செயலால் பறவைகள் கவலை கொண்டன. `இந்த குரங்குப்பயல் ரொம்பத்தான் படுத்துறாம்பா' என பறவைகள் மனம் நொந்து கொண்டன. குரங்கின் தொந்தரவால் பறவைகள் நேரம் கழித்தே கூடு திரும்பின. அடிக்கடி குஞ்சுகளுக்கு உணவு ஊட்ட முடியாமல் தவித்தன. இதனால் பறவைக் குஞ்சுகள் பசியால் வாடின. வேறு இடம் சென்று விடலாமா என்று யோசிக்கத் தொடங்கின.

ஆலமரத்தில் இருந்த வயதான கழுகு ஒன்று குரங்கின் தொல்லையை ஒழிக்க யோசனை சொன்னது. அதன்படி பெரிய கழுகு ஒன்று எங்கிருந்தோ அந்தப் பொருளை பார்சலாக கட்டிக் கொண்டு வந்து, மரக்கிளையில் பத்திர மாக வைத்து விட்டது. பார்சலைக் கண்ட குரங்கு, தின்பண்டமாக இருக்கும் என எண்ணி அவசர அவசரமாகப் பிரித்து, அதனுள் இருந்த பொருளை அப்படியும் இப்படியுமாகப் பார்த்தது.

`கிளி எவ்வளவு அழகாக இருக்கிறது? காகம் கறுப்பு என்றாலும், அதுவும் ஒரு விதத்தில் அழகுதான். கொக்கு வெண்மை நிறத்தில் அழகோ அழகு... ஆனால், தான் மட்டும் ஏன் இப்படி இருக்கிறேன்?' என்று தன் உருவத்தின் மீதே அதற்கு வெறுப்பு வந்தது. `இனிமேல் அழகான பறவைகளை லட்சணமில்லாத நான் கிண்டல் பண்ணலாமா? கூடாது... கூடவே கூடாது. அது மிகப்பெரிய தவறு' என்பதை உணர்ந்து கொண்ட குரங்கு, பறவைகளைக் கிண்டல் செய்ததற்காக மன்னிப்பு கோரியது. கழுகு கொண்டுவந்த அந்தப்பொருள் வேறொன்றுமில்லை, முகம் பார்க்கும் கண்ணாடி தான். குரங்கு இப்போது பறவைகளின் நண்பன்.

எஸ். டேனியல் ஜுலியட்