தங்கமழை

சேது, மாது என்ற இரு இளைஞர்களும் தங்கள் நாட்டில் மழை பொய்த்ததால், பிழைக்க வழிதேடி பக்கத்து நாட்டிற்கு சென்று கொண்டிருந்தனர். அப்போது ஓடையில் நீந்தி விளையாடிக் கொண்டிருந்த அழகிய மீனை, நரி பாய்ந்து பிடித்துக் கொண்டது. உயிர் பயத்தில், ``என்னை காப்பாத்துங்க... காப்பாத்துங்க...'' என்று இருவரையும் பார்த்துக் கெஞ்சியது மீன்.

இருவரும் தங்கள் கையில் வைத்திருந்த தடிகளால் நரியை அடித்து, "உயிர்மீது ஆசை இருந்தால் மீனை விடு. இல்லை உயிரை விடு'' என்றனர். உயிர் பிழைத்தால் போதும் என்று மீனை நீரில் போட்டு விட்டு ஓடியது நரி.

தன்னை மீட்ட இருவருக்கும் நன்றி சொன்ன மீன், இருவருடைய கதையையும் கேட்டது. தங்கள் நாட்டில் மழை பெய்யாததால், பஞ்சம் பிழைக்க பக்கத்து நாட்டுக்குச் செல்வதாகக் கூறினர்.

அவர்களிடம், ``உழவுத்தொழில் நடத்த வேண்டிய போதெல்லாம் மழை வரம் வேண்டுமா? ஒரே முறை தங்க மழை வரம் வேண்டுமா?'' என்று கேட்டது மீன்.

சேது, மழையால் பயிர் வளம் தொடர வரம் கேட்டான். மாது, தங்க மழை வரம் கேட்டான். இருவருக்கும் கேட்ட வரத்தைத் தந்த மீன், நீருக்குள் மறைந்தது.

இருவரும் தங்கள் வரங்களைப் பயன்படுத் தினர். தேவையான போது மழை பெய்ததால் சேதுவின் நிலங்கள் அமோக விளைச்சல் பெற்றன. மூட்டை, மூட்டையாகத் தானியங்கள் வீட்டில் குவிந்தன. ஆனால், மாதுவின் வீட்டில் தங்கக்காசு மூட்டைகளே இருந்தன.

மக்கள் மத்தியில் பணப்புழக்கம் இருந்தும், தானியங்கள் கிடைக்காமல் அவதிப்பட்டனர். சேதுவிடம் தானியங்கள் நிறைய இருப்பதை அறிந்து, பணத்தைக் கொடுத்து தானியங் களை வாங்கிச் சென்றனர். மாதுவும் தங்கக் காசுகள் இருந்தும், உணவின்றி வாடினான். வேறுவழியின்றி அவனும் சேதுவிடம் தங்கக் காசுகளைக் கொடுத்து தானியங்களை வாங்கிச் சென்றான்.

பஞ்சத்தால் பொருட்கள் பல மடங்கு விலைக்கு விற்கப்பட்டதாலும், ஆடம்பரமாகச் செலவு செய்ததாலும் விரைவில் மாதுவின் தங்கக் காசுகள் கரைந்தன. ஒருவேளை உணவுக்கே வழியின்றி சேதுவிடம் வந்து மாது அழுதான்.

``நாம் கேட்கும் வரமானது நம் உழைப்போடு தொடர்புடையதாக இருக்க வேண்டும். உழைப்பு நிலையானது. பணம் கரையக் கூடியது. குந்தித்தின்றால் குன்றும் மாளும்'' என்று அறிவுரை சொல்லி, தன் நிலத்தில் வந்து உழைக்கச் சொன்னான். சில மாதங்களில் நல்ல மழை பெய்ததால் மாதுவும் தன் நிலத்தில் உழுது நல்ல நிலைக்கு வந்தான்.


தா. ஆறுமுகம்

நல்ல நீதிக்கதை.. நன்றி சிவா.. சிறுவர்களுக்கும் நம் தளம் நல்ல பொழுது போக்காக இருக்கும்.