கணினி புழுக்கள்

வைரஸ்கள் போலல்லாமல் புழுக்களுக்கென்று உயிர் உண்டு! தானே இயங்கி நெளிந்து கலக்கும் வல்லமை உடையது புழு ஆகும்! இவை இணையத்தில் கணினிகளுக்கிடையேயான தகவல் போக்குவரத்தில் பரிமாறிக் கொள்ளப் படுகின்றன. அதிக அளவில் பாட்டை அகலத்தை (Bandwidth) ஏப்பமிடும் புழுக்கள் தானாகவே இயங்குவதுடன், தன்னைத் தானே நகலெடுத்துக் கொண்டு பிணையத்திலும் இணையத்திலும் வலம் வருகின்றன!

தானாகவே இயங்க முடிவதால், வைரஸ்களைக் காட்டிலும் புழுக்கள் பயங்கரமானவையே!



புழுக்கள் பெரும்பாலும் இயங்குதள மென்பொருட்களில் இருக்கும் ஊடுருவ முடிகின்ற(Vulnerability) பி(இ)ழைகளின் வழியாக உள் நுழைகின்றன. எனவே அடிக்கடி மென்பொருள் வழங்குபவர் தரும் துளை மூடிகள் அல்லது ஒட்டுப் போடும் மென் பொருட்களைத் (Security Patches) தரவிறக்கி நிறுவிக் கொள்தல் வேண்டும்.



மென்பொருட்கள் எழுதப்படும் போது பிழைகள் நேர வாய்ப்புண்டு. எடுத்துக்காட்டாக,

dim a(10)
dim max,i = 0
for i = 1 to 10
input a(i)
if a(i) > max then
max = a(i)
endif
next
print "Maximum is",max
end



மேலே கண்ட சிறு மென்பொருள் கொடுக்கப்படும் பத்து எண்களில் எது பெரியது என்பதைக் கண்டறிய எழுதப்பட்டது ஆகும். மேலோட்டமாகக் காண்பதற்குச் சரியானதாகவே தெரியும் இந்த மென்பொருளில் ஒரு பிழை இருக்கின்றது. அதாவது அனைத்து எண்களுமே பூஜ்ஜியத்துக்கும் குறைவானதாக இருக்கின்றது என்று வைத்துக் கொள்வோம். எடுத்துக்காட்டாக -2,-3,-4 ... என்று இருந்தால் இந்த மென்பொருள் 0 தான் மிகப்பெரிய எண் என்று பத்து எண்களில் இல்லாத ஒரு எண்ணை வழங்கக் கூடும்! ஆக, இது ஒரு மென்பொருள் பிழை.

இதையே,



dim a(10)
dim max,i = 0
input a(1)
max = a(1)
for i = 2 to 10
input a(i)
if a(i) > max then
max = a(i)
endif
next
print "Maximum is",max
end



என்று மாற்றிவிட்டால் சரியாகி விடும்.

எந்த ஒரு புது மென்பொருள் வந்தாலும் அதிலிருக்கும் பாதுகாப்புத் துளைகளைத் தேடுவதே பலரின் பொழுதுபோக்காகும்!

புழுக்களைக் கண்டறியும் ஒரு எளிய வழி, நாம் இணையத்தை உபயோகிக்கவே செய்யாவிட்டால் கூட, நமது கணினி இணையத்தைத் தொடர்பு கொண்டே இருக்குமானால், அது நிச்சயமாகப் புழுவின் கைங்கரியம் தான் என்று அறிந்து கொள்ளலாம். ஏனெனில், புழுக்கள் அடிக்கடி இணையத்தில் இன்னொரு கணினியைத் தாக்குவதற்காகத் தேடிக் கொண்டே இருக்கும்.

கணினி புழுக்கள் (Computer worm ), இதுவும் ஒரு வகையான் கணினி வைரஸ். இது உயிரின புழுக்களை போல ஊர்ந்து ஊர்ந்து எதனுள்ளும் நுழைய முயற்சிக்கும்.
உதாரணமாக Worm உங்களது கணினியில் உள்ள outlook மின்னஞ்சல் முகவரிகளை படித்து அணைத்து முகவரிகளுக்கும் மின்னஞ்சல் அனுப்பி விடும், அதனை படிப்பவர் அது நீங்களாக அனுப்பியது என எண்ணி அதனுடன் வரும் Worm அவர் தரவிறக்கம் செய்தால் அவர் கணினியும் பாதிக்க படும்.