சிறீலங்கா துடுப்பாட்டக்குழு அனைத்துலக மட்டத்தில் தடை செய்யப்பட வேண்டும்: பேராசிரியர் ஜேக் லின்ச்

சிறீலங்கா அரசு மேற்கொண்டு வரும் மனித உரிமை மீறல்களை கருத்தில் கொண்டு சிறீலங்கா துடுப்பாட்டக் குழுவினருக்கு அனைத்துலக மட்டத்தில் தடை கொண்டுவரப்பட வேண்டும் என அவுஸ்திரேலியாவின் சிட்னி பல்கலைக்கழகத்தின், அமைதிக்கும், மோதல்களுக்குமான கற்கை நெறியின் திணைக்களத் தலைவர் பேராசிரியர் ஜேக் லின்ச் தெரிவித்துள்ளார்.

அவுஸ்திரேலியா சென்றுள்ள சிறீலங்கா துடுப்பாட்ட அணியினர் ஒரு நாள் துடுப்பாட்ட போட்டியில் கலந்துகொண்டுள்ள நிலையில் பேராசிரியரின் இந்த கருத்து வெளிவந்துள்ளது.

இது தொடர்பில் அவர் மேலும் தெரிவித்துள்ளதாவது:

சிறீலங்காவில் தொடர்ந்து மனித உரிமைகள் மீறப்படுவதாலும், அங்கு மேற்கொள்ளப்பட்ட மனித உரிமை மீறல்களை விசாரணை செய்வதற்கு அனைத்துலக சுயாதீன விசாரணைக்குழுக்களை அனுமதிக்க சிறீலங்கா அரசு மறுத்து வருவதாலும், சிறீலங்கா துடுப்பாட்டக்குழுவுக்கு, அனைத்துலக துடுப்பாட்ட சபை தடை விதிக்க வேண்டும்.

சிறீலங்காவில் இடம்பெற்ற இறுதிக்கட்ட மோல்களில் 40,000 பொதுமக்கள் கொல்லப்பட்டுள்ளதாக தகவல்கள் தெரிவிக்கின்றன. 300,000 மக்கள் முட்கம்பி வேலிக்குள் அடைக்கப்பட்டிருந்தனர். அவர்களில் 26,000 பேர் தற்போதும் முகாம்களிலேயே உள்ளனர்.

சிம்பாபேயில் மனித உரிமை மீறல்கள் மேற்கொள்ளப்பட்டபோது, அந்த நாட்டின் துடுப்பாட்ட அணியை தடைசெய்யுமாறு பிரித்தானியா 2009 ஆம் ஆண்டு கோரியிருந்தது. அதனை கருத்தில் எடுப்பதாக துடுப்பாட்ட சபையும் தெரிவித்திருந்தது.

அவுஸ்திரேலியாவை பொறுத்தவரையில் துடுப்பாட்டம் ஒரு முக்கிய விளையாட்டு, ஆனால் சிறீலங்கா அரசு தொடர்ந்து மனித உரிமை மீறல்களில் ஈடுபட்டு வருகின்றது. அங்கு ஊடகவியலாளர்கள் மிரட்டப்படுகின்றனர், உதவிப் பணியாளர்கள் துரத்தப்படுகின்றனர். எனவே சிறீலங்கா துடுப்பாட்ட அணியை எந்த நாடும் வரவேற்கக்கூடாது என அவர் மேலும் தெரிவித்துள்ளார்.

சிறீலங்கா துடுப்பாட்ட அணியில் இடம்பெற்றுள்ள அஜந்தா மென்டிஸ் என்பவர் சிறீலங்கா இராணுவத்தின் பீரங்கி படையணியில் முன்னர் பணியாற்றியவர் என்பதும் இங்கு குறிப்பிடத்தக்கது