மாணவியை கிணற்றில் தள்ளி கொன்ற ஆசிரியர்

**சிவா** · **சிவா** Sun Nov 21, 2010 12:37 pm

கர்நாடக மாநிலம் ராய்ச்சூர் மாவட்டம் மான்வி தாலுகா நீரமான்வி கிராமத்தைச் சேர்ந்தவர் ராமண்ணா. இவர் அங்குள்ள அரசு தொடக்க பள்ளிக்கூடத்தில் ஆசிரியராக வேலை செய்து வருகிறார். இவரிடம் அதே ஊரைச் சேர்ந்த ககனா (6), பசவராஜ், இந்திரகுமார் ஆகியோர் படித்து வந்தனர்.

நேற்று பிற்பகல் 3.15 மணி அளவில் வகுப்பறையில் இருந்த மாணவி ககனா, மாணவர்கள் பசவராஜ், இந்திரகுமார் ஆகிய 3 பேரையும் ஆசிரியர் ராமண்ணா `தர தர' என்று வெளியே இழுத்துச் சென்றார்.

பள்ளிக்கு அருகே உள்ள கிணற்றுக்கு 3 பேரையும் கொண்டு போய் ஒவ்வொருவராக கிணற்றில் வீசி விட்டு வகுப்பறைக்கு ராமண்ணா திரும்பி வந்து விட்டார்.

இந்த தகவல் ஊருக்குள் காட்டுத் தீ போல பரவியது. கிராம மக்களும், கிணற்றில் வீசப்பட்ட குழந்தைகளின் பெற்றோர்களும் பள்ளிக்கூடத்துக்கு விரைந்து வந்தனர். குழந்தைகளை மீட்கும்படி அவர்களின் பெற்றோர் கதறி அழுதனர்.

இதற்கிடையே, கிணற்றில் வீசப்பட்ட மாணவி ககனா, மூச்சுத் திணறி பரிதாபமாக இறந்தாள். மற்ற இருவரையும் தீயணைப்பு படையினர் உயிருடன் மீட்டனர்.

இந்த சம்பவத்துக்கு காரணம் என்ன என்பது தெரியவில்லை. குழந்தைகளை கிணற்றில் வீசிய ஆசிரியர் ராமண்ணா மீது நடவடிக்கை எடுக்கக் கோரி கிராம மக்கள் போராட்டத்தில் ஈடுபட்டனர். இந்த சம்பவம் தொடர்பாக போலீசார் வழக்கு பதிவு செய்து விசாரணை நடத்தி வருகிறார்கள்.

நக்கீரன்