2 ஜி ஸ்பெக்ட்ரம் விவகாரம்: தி.மு.க.விடம் சரணடைந்தாரா பிரதமர் மன்மோகன் நிதின் கட்காரி கேள்வி?

2 ஜி அலைக்கற்றை ஒதுக்கீடு விவகாரத்தில் பிரதமர் மன்மோகன்சிங்கும், காங்கிரஸ் கட்சியும் தோழமை கட்சியான தி.மு.கவிடம் சரண் அடைந்து விட்டனர் என்று பா.ஜ.க தலைவர் நிதின் கட்காரி குற்றம் சாட்டியுள்ளார்.

பா.ஜ.கவை சேர்ந்த மேயர்கள் பங்கேற்ற மாநாட்டில் கலந்து கொள்ள உத்தர பிரதேச மாநிலம் லக்னோவுக்கு சென்ற அவர் அங்கு நடந்த நிருபர்கள் சந்திப்பின் போது இவ்வாறு தெரிவித்தார். அப்போது அவர் மேலும் கூறுகையில்,

2 ஜி அலைக்கற்றை ஒதுக்கீடு விவகாரத்தில் நடைமுறைகளில் செய்த திடீர் மாறுதல்களால் ஊழல் நடந்திருக்கிறது என்பதை தலைமை கணக்கு தணிக்கையாளரின் அறிக்கை தெளிவாக சுட்டிக் காட்டுகிறது.

ஒதுக்கீடு செய்வது தொடர்பாக மத்திய அமைச்சர்கள் சிலர் அடங்கிய குழுவை பிரதமர் ஏற்பாடு செய்திருந்தார். ஆனால் அமைச்சரே முடிவு செய்வார் என்ற தி.மு.க அரசின் வற்புறுத்தலை தொடர்ந்து அந்த உரிமையை அந்த துறை அமைச்சருக்கே விட்டுக் கொடுத்து விட்டார் பிரதமர். நடந்துள்ள முறைகேட்டில் தங்களுக்கு பங்கு கிடையாது என்று பிரதமரோ, காங்கிரஸ் கட்சி தலைவரோ ஒதுங்கி விட முடியாது. 2 ஜி அலைக்கற்றை ஒதுக்கீடு எப்படி நடந்தது. யார் அதில் பலன் பெற்றார்கள் என்பதெல்லாம் பிரதமருக்கும் காங்கிரஸ் தலைமைக்கும் தெரிந்தே இருந்தது.

2 ஜி அலைக்கற்றை ஒதுக்கீட்டை முறையாக அனைத்து போட்டியாளர்களையும் அழைத்து ஏல முறையில் விற்றிருந்தால் அரசுக்கு சுமார் 1,76 ஆயிரம் கோடி ரூபாய் கிடைத்திருக்கும் என்று தலைமை கணக்கு தணிக்கையாளர் அறிக்கையில் குறிப்பிட்டிருக்கிறார்.

இவையெல்லாம் எனக்கு தெரியாமல் நடந்தவை. இதற்கு நான் பொறுப்பேற்க முடியாது என்று பிரதமர் எப்படி கூற முடியும். இவ்வாறு கட்காரி கூறினார்.