மலேசியா: கம்போங் புவா பாலாவுக்குள் புல்டோசர்களும் போலீசும் நுழைந்துள்ளன

கம்போங் புவா பாலாவில் கடுமையான தகராற்றுக்கு இடையில் சிக்கிக் கொண்டிருக்கும் நிலத்தின் மீது கட்டப்பட்டிருக்கும் வீடுகளை இடிப்பதற்கு புல்டோசர்கள் நுழைந்துள்ளன.

ஒரு கட்டத்தில் மனிதத் தடையை ஏற்படுத்திய கிராம மக்களுடன் போலீசார் போராட்டம் நடத்தினர்.

கலகத் தடுப்புப் போலீசார் தங்களைத் தாக்கியதாக சில கிராமவாசிகள் கூறிக் கொண்டனர்.

அங்கு ஏற்பட்ட குழப்பத்தில் ஒரு மாது மயக்கமடைந்தார்.

தொழிலாளர்களுக்கு எதிராகப் பயன்படுத்தப்படுவதற்காக அங்கு ஓர் இடத்தில் மாட்டுச் சாணம் குவித்து வைக்கப்பட்டுள்ளதாக ஸ்டார் இணையத் தளம் கூறியது.

வீடுகளை இடிப்பதற்கு மேம்பாட்டாளர் திட்டமிடுவதாக கிராம மக்களுக்கு காலை 9 மணிக்குத் தகவல் கிடைத்தது.

அதைத் தொடர்ந்து பெண்களும் குழந்தைகளும் உட்பட கிராமவாசிகள் மனிதத் தடையை ஏற்படுத்தினர்.

வீடுகளை இடிக்கும் பொருட்டு 50 தொழிலாளர்கள் பின்புற நுழைவாயில் வழியாக நுழைய முயன்றனர். ஆனால் அவர்களை கிராமவாசிகள் கண்டு பிடித்து விரட்டி விட்டனர்.

அந்தக் கிராமத்திற்குள் ஊடகவியலாளர்கள் நுழைவதை போலீஸ் தடுத்து விட்டது. என்றாலும் சிலர் உள்ளே சென்று விட்டனர்.

கிராம மக்களைக் கலைப்பதற்கு போலீஸ் “வன்முறையில்” ஈடுபடுவதாக கிராமக் குடியிருப்பாளர் சங்கத் துணைச் செயலாளர் சி தர்மராஜ் கூறினார்.

“பல பெண்கள் தாக்கப்பட்டதாக”, அவர் கூறிக் கொண்டார்.

“இடிக்கப்படுவதற்கான ஆணை குடியிருப்பாளர் சங்கச் செயலாளர் ஜோசப் ஸ்டீபன் திரவியம் வீட்டில் ஒட்டப்பட்டதாகவும் 15 நிமிடங்களில் வெளியேறுமாறும் அதில் கூறப்பட்டிருந்ததாகவும்”, அவர் சொன்னார்.

ஏற்கனவே அந்த நிலம் தொடர்பாக கூட்டரசு நீதி மன்றத்தில் சமர்பிக்கப்பட்டுள்ள விண்ணப்பத்தை விசாரிக்கும் வரையில் காத்திருப்பது என்று மேம்பாட்டாளரும் கிராம வாசிகளும் உடன்பாடு கண்டிருப்பதாக அறிவிக்கப்பட்டிருந்தது.

இது தமிழர்கள் வாழும் பகுதியா?

ஆம் விஜய்!