மைனா - திரைப்பட விமர்சனம்

மைனா வெளியாவதற்கு சில மாதங்களுக்கு முன்பே படுபயங்கர எதிர்பார்ப்பை கிளப்பி விட்டு, அதில் ஓரளவு பூர்த்தியும் செய்திருக்கிறது.

குடித்து குடித்து இறந்து போன அப்பாவால் சின்ன வயதிலேயே குடியிருக்கும் வீடு உள்ளிட்ட சொத்துபத்துகளையும், சொந்தபந்தங்களையும் இழந்து நடுத்தெருவில் நிற்கும் நாயகிக்கும், அவரது அம்மாவிற்கும் அடைக்கலம் கொடுக்கிறான் சிறுவயது ஹீரோ. பனியாரம் சுட்டு விற்று வயிற்றை கழுவும் நாயகியின் அம்மாவால் நன்றாக படித்தும், நாயகியை படிக்க வைக்க முடுியாத சூழல். அதனால் நாயகியை தானே கூலி வேலையெல்லாம் செய்து படிக்க வைக்கும் நாயகனுக்கு, இனம் புரியாத வயதில் இருந்தே நாயகி மீது காதல்! நாயகிக்கும் நாயகன் மீது அதே ரக காதல்! இது நாயகியின் அம்மாவிற்கு தெரியவருகிறது.அதுவரை வாய்திறந்து ஹீரோவை மருமகனே.. மருமகனே... என அழைத்து வந்த அவர், அதன் பின் காட்டும் ஆக்ஷனும், ஆக்ரோஷமும், அதற்கு ஹீரோ பண்ணும் ரீயாக்ஷனும், அதனால் எழும் பிரச்னைகளும்தான் மைனா படத்தின் மீதிக்கதை!

க்ளைமாக்ஸில் சந்தர்ப்பத்தாலும், சூழ்நிலையாலும் அந்த ஜோடிக்கு ஏற்படும் கொடூரம், படம் முடிந்து நீண்ட நேரமாகியும் நம் நெஞ்சை விட்டு நீங்க மறுப்பது படத்தின் வெற்றிக்கு கட்டியம் கூறும் ப்ளஸ் பாயிண்ட்.

மைனாவின் நாயகராக சுருளி எனும் பாத்திரத்தில் தொட்டுப்பார் விதார்த் நம் மனதை தொடுகிறார். காட்டான் மாதிரி தலைமுடியும், தாடி மீசையுமாக இருந்தாலும், ரசிகர்கள் நெஞ்சை உலுக்கும் நடிப்பில் ஜூனியர் ராஜ்கிரண் என்று பட்டமே தரலாம் இவருக்கு. அதுவும் தன் காதலுக்காகவும், காதலிக்காகவும் பெற்ற தாய் - தந்தையையே அடிக்க பாயும் இடத்தில் விதார்த் சிறப்பான நடிப்பை விதைத்திருக்கிறார். அதேமாதிரி, விபத்துக்குள்ளான பேருந்தில் தன்னையும், தன் காதலையும் குழி தோண்டி புதைக்க நினைக்கும் சிறைக்காவலர்களை காப்பாற்றும் இடத்திலும் சபாஷ் வாங்கி விடுகிறார் விதார்த்.

மைனாவாகவே வாழ்ந்திருக்கும் அமலா பால், சிந்து சமவெளியில் விட்டதை இங்கே பிடித்து விட்டார். இவர் அழகான பெண்பால் மட்டுமல்ல... அருமையான நடிப்பாலும் நம்டம தன்வசப்படுத்தி விடுகிறார். க்ளைமாக்ஸில் அவருக்கு நிகழும் கொடூரம் கல் நெஞ்சக்காரர்களையும் கரைய வைக்கும்.

விதார்த் - அமலா பால் மாதிரியே ஜெயிலர் பாஸ்கராக வரும் சேது, தம்பி ராமையா, செவ்வாளை, கார்த்திக், பூவிதா, மீனாட்சி உள்ளிட்ட சகலரும் தங்கள் பங்கை சரியாய் செய்திருக்கிறார்கள். அதிலும் மைனாவின் சாவிற்கு காரணமான தன் மனைவி உள்ளிட்ட சொந்தபந்தங்களை போட்டுத் தள்ளும் ஜெயிலர் பாஸ்கராக வரும் சேதுவும், சுருளியின் அன்பில் உருகிப் போகும் தம்பிராமையாவும் பிரமாதம்.

சுகுமாரின் ஒளிப்பதிவும், டி.இமானின் இசையும் இதுவரை காணாத தமிழ்சினிமாவை கண் முன் நிறுத்துகிறது. இதுதான் க்ளைமாக்ஸோ, அதுதான் க்ளைமாக்ஸா இருக்குமோ... என எக்கச்சக்கமாக யோசிக்க விட்டு, யாருமே யோசிக்காத கோணத்தில் மைனாவுக்கும், சுருளிக்கும் முடிவு கட்டும் க்ளைமாக்ஸில் டைரக்டர் பிரபு சாலமன் வித்தியாசமாகத் தெரிகிறார்.

மைனா - தரமான தமிழ்ப்படம்தான் நைனா!

தினமலர் விமர்சனம்

மைனா - மாலைமலர் விமர்சனம்!


சிறு வயதில் ஆதரவின்றி நிற்கும் மைனா குடும்பத்துக்கு சுருளி உதவுகிறான். வளர்ந்த பிறகும் குடும்ப செலவுகளை ஏற்று பள்ளியில் படிக்க வைக்கிறான். அவர்கள் நட்பு காதலாக மலர்கிறது.

மைனாவை படித்த பையனுக்கு மணமுடிக்க அவள் தாய் சதி செய்கிறாள். தடுக்கும் சுருளியை போலீசில் சிக்க வைக்கிறாள். ஜெயிலில் இருந்து தப்பி மைனாவை அழைத்து கொண்டு ஓடுகிறான். போலீஸ் வளைத்து பிடிக்கிறது. கைவிலங்குடன் போலீஸ் நிலையம் அழைத்து போகின்றனர். மைனாவும் உடன் செல்கிறாள். அங்கு நடக்கும் சம்பவங்கள் இதயத்தை உலுக்கும் கிளைமாக்ஸ்...

காடு, மலை, அங்கு வசிக்கும் கிராம மக்களை கதைக்களமாக வைத்து காட்சி படுத்தியுள்ளார் இயக்குனர் பிரபுசாலமன். கேரக்டர்களை யதார்த்தங்களாய் மனதில் நடமாட விட்டுள்ளார்.

சுருளியாக விதார்த்தும், மைனாவாக அமலாபாலும் வாழ்கின்றனர்.

மைனாவை தன் உயிராய் நினைக்கும் விதார்த் அவளை வேறொருவனுக்கு திருமணம் செய்து வைக்க முடிவானதும் முகத்தில் வெறி காட்டுகிறார்.

கைதியாக காடு, மலை கடந்து போகும்போது உடன் வரும் மைனாவை பத்திரமாய் பாதுகாத்து அழைத்து போவது அவள் காலில் ஆணி குத்தியதும் தோளில் தூக்கி கொண்டு ஓடி ஆஸ்பத்திரியில் சேர்ப்பது... இருட்டில் படிக்கும் மைனாவுக்கு பெடல் சுற்றி சைக்கிள் லைட்டை எரிய வைப்பது என காதல் கோட்டை கட்டியுள்ளார்.

அமலாபால் கிராமத்து தேவதையாய் பளிச்சிடுகிறார். காதலனுடன் சேர்த்து வைக்க மறுக்கும் தாயிடம் செத்துப்போ என ஆவசேமாவது வித்தார்த் மேல் காதல் பார்வை வீசுவது அழுத்தம் பதிக்கிறார்.

அடங்காப்பிடாரி மனைவியின் தொல்லை ஒரு புறம், கைதி தப்பித்ததால் கோபம் இன்னொரு புறம் என இருதலைகொள்ளி எறும்பாய் போலீஸ் அதிகாரியாக வரும் சேது கவனிக்க வைக்கிறார்.

காமெடி, குணசித்திர கேரக்டரில் தம்பி ராமையா மனதில் நிற்கிறார்.

பஸ் விபத்தில் சக பயணிகளையும் போலீசாரையும் விதார்த் காப்பாற்றும் சீன்கள் சீட் நுனிக்கு இழுக்கின்றன.

சேது மனைவி குடும்பத்தினர் தீர விசாரிக்காமல் செய்யும் படுபாதக செயல் யதார்த்த மீறலாக இருந்தாலும் உலுக்கி போடுகிறது. காதல் ஜோடி, போலீஸ் அதிகாரிகளின் நீண்ட காடுமேடு பயணம் வேகத்தடை போடுகிறது.

இமான் இசையில் பாடல்கள் இதம். சுகுமார் கேமரா காட்டின் பசுமையை கண்ணில் பதிக்கிறது.