திருமங்கலம் அருகே தீபாவளி வெடி வெடித்ததில் இருபிரிவினரிடையே மோதல் வீடுகள் நொறுக்கப்பட்டதால் பதட்டம்

திருமங்கலம், நவ.7- திருமங்கலம் அருகே தீபாவளி வெடி பெண் மீது பட்டதையடுத்து இருபிரிவினரிடையே மோதல் ஏற்பட்டது இதில் 8 பேர் மீது போலீசார் வழக்குப்பதிவு செய்துள்ளனர்.

தீபாவளி வெடி

திருமங்கலம் அருகே உள்ளது சாத்தங்குடி கிராமம். இந்த கிராமத்தில் உள்ள காலனி பகுதியில் தீபாவளியன்று மாலை வெடி வைத்துள்ளனர். அப்போது சக்திவேல் தரப்பினர் வைத்த வெடி, அந்த வழியாக நடந்து சென்ற நடுப்பாண்டியம்மாள் என்பவர் மீது விழுந்தது.

இதுகுறித்து சக்திவேல் தரப்பினருக்கும் நடுப்பாண்டியம்மாளுக்கும் வாக்குவாதம் ஏற்பட்டுள்ளது. அங்கிருந்து சென்ற நடுப்பாண்டியம்மாள் தனது உறவினர்கள், பாலு குணசேகரன் ஆகியோரிடம் நடந்த பிரச்சினை குறித்து சொன்னார்.

மோதல்

இதையடுத்து நடுப்பாண்டியம்மாளுக்கு ஆதரவாக பாலு, குணசேகரன், அன்பு, அலெக்ஸ், விக்னேஷ், மாயாண்டி, அழகுபாண்டி ஆகியோர் காலனி பகுதிக்கு சென்று சக்திவேல் தரப்பினரை தட்டி கேட்டுள்ளனர்.

அப்போது சக்திவேல், ராமர், முத்துப்பாண்டி ஆகியோருக்கும் எதிர் தரப்பிற்கும் இடையே மோதல் ஏற்பட்டது. எதிர் தரப்பினர் செங்கல், கம்புகளை எறிந்ததில் நடுப்பாண்டியம்மாள் தரப்பினர் சிலர் காயம் அடைந்தனர். இதனால் ஆத்திரமடைந்த அவர்கள், துரைப்பாண்டி, அருணாசலம், கவியரசன், அழகுபாண்டி, சக்திவேல் ஆகியோர் வீடுகளின் கதவு, ஜன்னல்களை உடைத்து சேதப்படுத்தினர்.

இரு தரப்பினரும் வெவ்வேறு சமூகத்தை சேர்ந்தவர்கள் என்பதால், அந்த பகுதியில் பதட்டம் நிலவுகிறது. காயமடைந்த 3 பேரும் திருமங்கலம் அரசு ஆஸ்பத்திரியில் முதலுதவி சிகிச்சை பெற்று, மதுரை பெரிய ஆஸ்பத்திரிக்கு கொண்டு செல்லப்பட்டனர்.

இதுகுறித்து சக்திவேல் கொடுத்த புகாரின் பேரில் நடுப்பாண்டியம்மாள், பாலு உள்ளிட்ட 8 பேர் மீது சப்-இன்ஸ்பெக்டர் அழகர்சாமி வழக்குப்பதிவு செய்துள்ளார். மேலும் அசம்பாவிதம் ஏற்படாமல் தடுக்கும் விதத்தில் அந்த பகுதியில் பலத்த போலீஸ் பாதுகாப்பு போடப்பட்டுள்ளது.