மாணவர்களை பாதுகாப்பாக பள்ளிக்கு அழைத்துச் செல்ல என்ன செய்ய வேண்டும்?

சிவகங்கை: தமிழகத்தில் சமீபகாலமாக பள்ளி மாணவர்கள் கடத்தல் என்பது சர்வசாதாரணமாகிவிட்டது. கடந்த வாரம் அடுத்தடுத்து நடந்த கோவை முஸ்கின்(11), ரித்திக்(8) மற்றும் சென்னை கீர்த்திவாசன் கடத்தல் சம்பவங்கள் போலீசாரையும், பெற்றோரையும் அதிர்ச்சிக்குள்ளாக்கியது. இதனால் கார், ஆட்டோக்களில் செல்லும் மாணவர்களின் பாதுகாப்பு பற்றி கவலை கொள்ளும் கட்டாயம் ஏற்பட்டு விட்டது. பெற்றோர் நம்பிக்கையுடன் இருக்கும் வகையில், மாணவர்களை எப்படி பாதுகாப்பாக பள்ளிக்கு அழைத்துச் செல்கிறீர்கள், பாதுகாக்க என்ன செய்வீர்கள்? என கார், ஆட்டோ டிரைவர்களிடம் கேட்டோம்.

எம்.குட்டி (வேன் டிரைவர், சிவகங்கை) : மாணவர்களின் பாதுகாப்பிற்காக முதலுதவி பெட்டி உள்ளது. லைசென்சை புதுப்பித்து வருகிறேன். பாதுகாப்பு சாதனங்கள் வைத்துள்ளோம். பெற்றோர் எங்கள் மீது நம்பிக்கை வைத்துள்ளனர். எனவே வீட்டிற்கே சென்று மாணவர்களை அழைத்து வருவோம். சில பெற்றோர் வேன் நிற்கும் இடத்திற்கே மாணவர்களை அழைத்து வந்துவிடுவர். நான் செல்ல முடியாத நாட்களில் நாட்களில் நம்பிக்கையான மாற்று டிரைவரை அனுப்புவேன். அவரும் பொறுப்புடன் நடந்து கொள்வார். இருவரும் நற்பெயர் எடுக்கவேண்டும் என்ற நோக்கோடு நடந்து கொள்வோம்.

எம். சுந்தரலிங்கம் (ஆட்டோ டிரைவர், காரைக்குடி): ஐந்து ஆண்டுகளாக மாணவர்களை அழைத்து செல்கிறேன். மாற்றுத்திறனாளி மாணவர்களும் வருவதால், கவனமுடன் ஓட்டுகிறேன். இது வரை எவ்வித அசம்பாவிதமும் நடக்கவில்லை. பெற்றோர், என் மீது நம்பிக்கையுடன் உள்ளனர். அந்த நம்பிக்கைக்கு மாறாக செயல்பட மாட்டேன். மோட்டார் வாகன சட்டத்தை பின்பற்றி வாகனம் ஓட்டுகிறேன். மாணவர்களுக்கு எவ்வித பாதிப்பும் இன்றி, பாதுகாப்பாக கொண்டு செல்கிறேன். ஒரு நாள் கூட விடுமுறை எடுக்காமல், நானே சென்று அழைத்து வருகிறேன்.

எம்.சரவணன் (வேன் டிரைவர், தேவகோட்டை): வீட்டு வாசலில் நின்று பெற்றோர்களே குழந்தைகளை வாகனத்தில் ஏற்றிவிடுகின்றனர். எங்கள் மீது நம்பிக்கை வைத்துள்ளனர். நாங்களும் நம்பிக்கைக்கு சிறிதும் குறைவின்றி நடக்கிறோம். குழந்தைகளே வாகனங்களில் ஏறி அமர்கின்றனர். சிறு குழந்தைகளாக இருப்பின் பள்ளி வாசல் வரை சென்று அழைத்து வருவோம்.

ராமகிருஷ்ணன், (ஆட்டோ டிரைவர், மானாமதுரை): ஒன்பது ஆண்டாக பாதுகாப்புடன் பள்ளி குழந்தைகளை அழைத்து செல்கிறேன். இதனால், பெற்றோர் நம்பிக்கை வைத்துள்ளனர். நான் செல்ல முடியாத பட்சத்தில், எனது தம்பி செல்வார். அதை பெற்றோரிடம் முன்பே தெரிவித்து விடுவேன். குழந்தைகளின் பாதுகாப்பு கருதி மெதுவாகவே ஓட்டுவேன்.

ஆர்.சிவக்குமார் ( ஆட்டோ டிரைவர், திருப்புத்தூர்) : பள்ளி, கல்லூரி மாணவர்களை அழைத்து செல்கிறேன். ஒவ்வொரு "டிரிப்' க்கும் நான்கு பேர் மட்டுமே. குழந்தைகளை ஆட்டோ நிற்கும் இடத்திற்கே பெற்றோர் அழைத்து வருவர். நான் செல்லாவிட்டால், மாற்று ஏற்பாடு செய்து கொள்ள சொல்வேன்.

தினமலர்!