சாமியே சரணம்!

**சிவா** · **சிவா** Tue Nov 02, 2010 8:58 pm

சாமியே சரணம்!

உருஎடுத்தாடியே ஊர்க்குறை தீர்த்திடும்
கருமாரி அம்மனைக் காணவே பக்தரும்
அருகிலே வருமென அன்னையின் ஆசியும்
பெரிதுமே பூசைகள் தானமும் நாள் தினம்.

சேருது பணமென செவ்வனே கண்டதும்
பாரது கோயிலில் தர்மகர்த்தாக்களும்
போட்டிடும் நூலுக்கும் பொறுக்கிடும் பூவுக்கும்
போட்டிடு பணமென சீட்டுக்கள் நீட்டுவர்.

தானமும் வழங்கியே தெண்டிய பணமது
ஏனிது கேட்கவோ பக்தியும் தடுக்குது
ஊரது பணத்திலே கோயில்நிர் வாகமும்
சேர்ந்தொரு பாதியை சேர்த்துமே வைக்குது.

கட்டிடம் கட்டிட காசுகள் தா என
பக்திபோல் ஆடியே பணத்தினைக் கேட்குது
அம்மனும் நாள்தினம் அழுகிறாள் பார்த்ததும்
எம் சனம் ஓடுது எள்ளுகள் பொதியுடன்.

பக்திகள் தேவைதான் பாமரன் வாழ்வினில்
சத்தியம் சாமியோ சல்லியும் கேட்டிடார்
பக்தியின் பெயரினில் சாமியை விற்றிட
எத்தனை பேரிங்கு எழுப்புறார் கோயிலை.

மரக்கறி பலவுடன் மளிகைப் பொருட்களும்
தரத்தினை மறந்துமே வாங்கலாம் கோயிலில்
சாமியே விற்குது சத்தான மரக்கறி
ஓடியே வாங்குவீர் கோயிலை நாடியே.

நல்லவர் ஒருசிலர் நடத்துறார் கோயிலை
எல்லையிற் பக்தியும் இன்பமும் பொங்கவே
கல்லிலே கதிபெறக் கடவுளைக் காட்டிடும்
வல்லவர் வழியினை நாடிடில் புண்ணியம்.

த.சு.மணியம்!