தீபாவளி

Guest · Guest Mon Nov 01, 2010 1:15 am

தீபாவளி வந்தால் தான் நம்மில் பலருக்கு எண்ணெய் தேய்த்துக் குளிக்க வேண்டும் என்று தோன்றும். இன்னும் சிலரோ ஏதோ இதை சம்பிரதாயம் என நினைத்து தலையில் எண்ணெய் தொட்டு வைத்துக் குளிப்பார்கள். இதுதான் இன்றைய நாகரீக மனிதர்களின் நிலை.

தீபாவளிக்கு மட்டும் எண்ணெய் தேய்த்துக் குளிக்கச் சொல்லவில்லை நம் முன்னோர்கள். வாரம் இருமுறை எண்ணெய் தேய்த்துக் குளிக்கச் சொன்னார்கள். ஆண்கள் புதன், சனி கிழமைகளிலும், பெண்கள் செவ்வாய், வெள்ளிக் கிழமைகளிலும் எண்ணெய் தேய்த்துக் குளிக்க வேண்டும் என்று சொன்னார்கள்.

இளம் வயது முதலே எண்ணெய் தேய்த்துக் குளிப்பவர்கள் முதுமையிலும் இளமையாக காணப்படுவார்கள். சருமம் பளபளக்கும். தலைமுடி நரைக்காமல் கருமையாக இருக்கும். இன்றும் நம் பெரியோர்கள் 70 வயதை தாண்டியும் கூட கருமையான முடியுடன் திடகாத்திரமாக வலம் வருவதை நாம் காண முடியும்.

இன்றும் கூட தென் மாவட்ட மக்கள் தலையில் எண்ணெய் வைத்துத்தான் குளிப்பார்கள். ஆனால் நகரத்தில் வாழும் 20 வயது இளைஞர் கூட தலைமுடி நரைத்து முகத்தில் சுருக்கம் விழுந்து நோஞ்சான் போல் காணப்படுகிறான்.

ஒரு காருக்கு ரேடியேட்டர் எவ்வளவு முக்கியமோ அதுபோல் மனிதன் செயல்பட அவன் சிரசும் முக்கியம். ரேடியேட்டருக்கு தண்ணீர் ஊற்றி அதன் உஷ்ணத்தைக் குறைத்து காரை சீராக செயல்பட வைப்பது போல் தான் சிரசும். எண்ணெய் தேய்த்துக் குளிப்பதால் தலை முதல் கால்வரை உடலெங்கும் பரவியிருக்கும் அதிக உஷ்ணம் குறையும்.

மேற்கத்திய நாடுகளின் சீதோஷ்ண நிலைகளினால் அங்கு வசிப்பவர்கள் எண்ணெய் தேய்த்துக் குளிக்கத் தேவையில்லை. அவர்களின் நாகரீகத்தை பின் தொடரும் நம் நாட்டின் அரைகுறை ஞானம் கொண்ட நபர்கள் எண்ணெய் தேய்த்துக் குளிப்பதால் என்ன பயன் கிடைக்கும் என்று மெத்தனப் பேச்சு பேசுகின்றனர். இந்தியா போன்ற நாடுகளில் வருடம் 365 நாட்களும் சூரிய உதயத்தைக் காணலாம். இதனால் இது உஷ்ண நாடாகும். உடலின் உஷ்ணத்தை சீர் படுத்தினால் தான் உடல் நோயின்றி ஆரோக்கியமாக இருக்க முடியும்.

எண்ணெய் தேய்த்துக் குளிப்பதால் உண்டாகும் பயன்கள்

· எண்ணெய் ஸ்நானம் செய்யும் போது உடலின் உஷ்ணம் குறைந்து சீராகிறது.

· உடலின் பித்த அதிகரிப்பை குறைத்து முக்குற்றமான வாத, பித்த, கபத்தை அதனதன் நிலையில் வைக்கிறது.

· சருமம் வறட்சியால் உண்டாகும் பாதிப்புகளைப் போக்குகிறது. வியர்வை சுரப்பிகள் வழியாக எண்ணெய் உள் இறங்குவதால் சருமம் பலமடையும்.

· மூலச்சூட்டைத் தணிக்கிறது. இதனால் குடல் புண், போன்ற பாதிப்புகள் ஏற்படாமல் தடுக்கப் படுகிறது.

· உடல் சூடேறி தாது விரயமாவதைத் தடுக்கும்.

· கண் நரம்புகள் குளிர்ச்சியடைவதால் கண் பார்வை தெளிவுபெறும்.

· நரம்புகள் புத்துணர்வு பெறுவதால் உடல் புத்துணர்ச்சியடைகிறது.

· உடல் உறுப்புகள் அதாவது கல்லீரல், மண்ணீரல், சிறுநீரகம், இதயம் சீராக செயல்பட வைக்கிறது.

· நல்ல தூக்கத்தைக் கொடுக்கிறது. ஆழ்ந்த தூக்கமே ஆரோக்கியத்திற்கான முதல் நிலையாகும்.

· தாதுவை விருத்தி செய்யவும்,ஆண்மைக் குறைவைப் போக்கவும் வாரம் இருமுறை எண்ணெய் தேய்த்துக் குளிப்பது அவசியம். இதன் மூலம் இழந்த ஆண்மை சக்தியைப் பெறலாம்

தலைக்கு எண்ணெய் தேய்த்துக் குளிப்பது பற்றி சித்தர்கள் அன்றே பல நூல்களில் குறிப்பிட்டுள்ளனர். சித்த மருத்துவத்தில் உள்ளது போல் ஆயுர்வேத மருத்துவத்திலும் எண்ணெய்க் குளியல் முக்கிய பங்கு வகிக்கிறது.

இதைப்பற்றி அகத்தியர், ஆரோக்கிய வாழ்வுக்கு அற்புத மருந்து, ஆச்சரியம் 1500 என்ற அற்புத வர்ம முறை நூலில் தெளிவாக குறிப்பிட்டுள்ளார்

எண்ணெய் தேய்த்துக் குளிக்க தேங்காய் எண்ணெய் அல்லது நல்லெண்ணெயைப் பயன்படுத்தலாம். உபயோகிக்கும் முன் எண்ணெயை நன்கு கொதிக்க வைக்க வேண்டும். கொதிநிலையில் கறிவேப்பிலையை போட்டு அவை சிவந்து எண்ணெயில் கீழே படியும்போது இறக்கி வைத்து அதனை தேய்க்க வேண்டும்.

எண்ணெயை உடல் முழுவதும் நன்கு தேய்க்க வேண்டும். தலையில் தேய்க்கும்போது மசாஜ் செய்வதுபோல் தேய்க்க வேண்டும்.

எண்ணெய் தேய்த்தபின் சுமார் 30 நிமிடங்கள் காத்திருந்து பின் குளிக்கச் செல்வது நல்லது. குளிக்கும்போது ஆண்கள் சிறிது வசம்புப் பொடிய தண்ணீரில் கலந்து தேய்த்து குளித்தால் சருமக் கிருமிகள் நீங்கும். பெண்கள் வசம்புப் பொடியுடன் சிறிது மஞ்சளும் சேர்த்து குளிப்பது நல்லது. இவ்வாறு செய்வதால், மனம் அமைதியடையும், சாந்தம் கிடைக்கும்.

எண்ணெய் தேய்த்து குளிக்கும் போது செய்யக்கூடாதவை.

· எண்ணெய் தேய்த்துக் குளித்த நாளன்று பகல் தூக்கத்தைத் தவிர்க்க வேண்டும்.

· அன்று மென்மையான உணவுகளை உண்ண வேண்டும்.

· சிறிது ஓய்வெடுக்க வேண்டும்.

· எண்ணெய் தேய்த்துக் குளித்த நாளன்று உடல் உறவு வைத்துக்கொள்ளக் கூடாது.

· சூரிய உதயத்தின் போது எண்ணெய் ஸ்நானம் செய்ய வேண்டும்.