பீகாரில் மூன்றாவது கட்டத்தேர்தல் : உ.பி., மற்றும் நேபாள எல்லைகளுக்கு "சீல்'

பீகார் மாநிலத்தில் இன்று மூன்றாவது கட்ட சட்டசபைத் தேர்தல் நடக்கிறது. 48 தொகுதிகளில் நடக்கும் ஓட்டுப்பதிவுக்காக, நேபாளம் மற்றும் உத்தரபிரதேச மாநில எல்லைகள், "சீல்' வைக்கப்பட்டதோடு, விரிவான பாதுகாப்பு ஏற்பாடுகளும் செய்யப்பட்டுள்ளன.


பீகார் மாநிலத்தில் ஆறு கட்டமாக சட்டசபை தேர்தல் நடக்கிறது. இரண்டு கட்ட தேர்தல்கள் முடிந்துள்ளன. மூன்றாவது கட்டமாக, 48 சட்டசபை தொகுதிகளில் இன்று ஓட்டுப்பதிவு நடக்கிறது. இவற்றில் ராம்நகர், ரகோபூர், பதேபூர் மற்றும் வால்மீகி நகர் ஆகிய தொகுதிகள், நக்சலைட்கள் ஆதிக்கம் நிறைந்தவை என்பதால், இங்கு மட்டும், காலை 7 முதல் மாலை 3 மணி வரை ஓட்டுப்பதிவு நடக்கிறது.


ஓட்டுப் பதிவுக்காக செய்யப்பட்டுள்ள விரிவான பாதுகாப்பு ஏற்பாடுகள் குறித்து, மாநில போலீஸ் டி.ஜி.பி., நீல்மணி கூறியதாவது: ரக்சால் மற்றும் பால்மீக நகரை ஒட்டிய இந்திய - நேபாள எல்லைப் பகுதிகள், கிழக்கு மற்றும் மேற்கு சம்ப்ரான் மாவட்டங்கள், உ.பி., மாநில எல்லையை ஒட்டிய பகுதிகள், "சீல்' வைக்கப்பட்டுள்ளன. சிறப்பு பாதுகாப்புப் படையினர் இங்கு தீவிர கண்காணிப்பில் ஈடுபட்டுள்ளனர்.


பாதுகாப்புப் படையினருக்கு உதவியாக மோப்ப நாய்களும் பணியில் ஈடுபடுத்தப்படும். ஓட்டுச் சாவடிகளை பீகார் போலீசின் சிறப்பு அதிரடிப் படை கமாண்டோக்கள், வான் வழியாகவும் கண்காணிப்பர். இதுதவிர தீவிர ரோந்துப் பணிகளும் மேற்கொள்ளப்படும்.


இன்று ஓட்டுப்பதிவு நடைபெற உள்ள, 48 சட்டசபைத் தொகுதிகளில், பெரும்பாலானவை கிழக்கு மற்றும் மேற்கு சம்ப்ரான், கோபல்கஞ்ச், சிவான், சரண் மற்றும் வைசாலி மாவட்டங்களில் இடம் பெற்றுள்ளதால், மத்திய துணை ராணுவப் படையினரும், மாநில ஆயுதப் படையினரும் இங்கு தீவிர கண்காணிப்பில் ஈடுபடுவர். இவ்வாறு நீல்மணி கூறினார்.


பீகார் தலைமை தேர்தல் அதிகாரி ராகேஷ் கூறியதாவது: தேர்தல் சுமுகமாக நடைபெறும் வகையில், விரிவான பாதுகாப்பு ஏற்பாடுகள் செய்யப்பட்டுள்ளன. உடல் ஊனமுற்றோர் மற்றும் பார்வையற்றோர், தங்களின் ஓட்டுகளை சிரமமின்றி பதிவு செய்யவும் ஏற்பாடுகள் செய்யப்பட்டுள்ளன. தேர்தல் பணியில், 48 ஆயிரம் பேர் ஈடுபடுகின்றனர்.


மூன்றாவது கட்டமாக ஓட்டுப்பதிவு நடக்க உள்ள, 48 தொகுதிகளில் லாலுவின் ராஷ்டிரிய ஜனதா தளம், 35 இடங்களிலும், லோக் ஜனசக்தி, 13 இடங்களிலும் போட்டியிடுகின்றன. ஆளும் கூட்டணியில் ஐக்கிய ஜனதா தளமும், பாரதிய ஜனதாவும் தலா 24 தொகுதிகளில் போட்டியிடுகின்றன. காங்கிரஸ், 48 தொகுதிகளிலும் போட்டியிடுகிறது. அதேபோல், பகுஜன் சமாஜ் கட்சியும் அதிக இடங்களில் போட்டியிடுகிறது.


இன்றைய தேர்தலில், 47.56 லட்சம் பெண்கள் உட்பட, 1.03 கோடி வாக்காளர்கள் ஓட்டளிக்க உள்ளனர். இதற்காக, 10 ஆயிரத்து 804 ஓட்டுச் சாவடிகள் அமைக்கப்பட்டுள்ளன. 48 தொகுதிகளிலும், 65 பெண்கள் உட்பட, 785 வேட்பாளர்கள் போட்டியிடுகின்றனர். இவர்களில், பீகார் சட்டசபை எதிர்க்கட்சித் தலைவரான ரப்ரி தேவியும் ஒருவர். அவர் வைசாலி மாவட்டம் ரகோபூர் தொகுதியிலும், சரண் மாவட்டம் சோனேபூர் தொகுதியிலும் போட்டியிடுகிறார். இவ்வாறு ராகேஷ் கூறினார்.