பெங்களூரில் நடந்த நெல்லை புதுப்பெண் கொலையில் கம்ப்யூட்டர் என்ஜினீயர் பிடிபட்டார்

பெங்களூரில் நடந்த நெல்லை புதுப்பெண் கொலையில் கம்ப்யூட்டர் என்ஜினீயர் பிடிபட்டார்
திருநெல்வேலி பாளையங்கோட்டையைச் சேர்ந்த ஜெயசெல்வன் மகள் மலர்விழி (வயது 24). இவருக்கும், விக்கிரமசிங்கபுரத்தை சேர்ந்த கந்தன் என்பவரின் மகன் பாலசுப்பிரமணியத்திற்கும் 2 மாதங்களுக்கு முன்பு திருமணம் நடந்தது.

கணவன்-மனைவி இருவரும் கம்ப்யூட்டர் என்ஜினீயர்கள். பாலசுப்பிரமணியம் பெங்களூரில் உள்ள தனியார் நிறுவனம் ஒன்றில் வேலை செய்து வருகிறார்.

திருமணத்திற்கு முன்பு வேலை செய்து வந்த மலர்விழி, பின்னர் வேலையை விட்டு விட்டு கணவர் பாலசுப்பிரமணியத்துடன் பெங்களூரில் குடியேறினார். அவர்கள் பெங்களூர் பி.டி.எம். லே-அவுட், 2-வது ஸ்டேஜில் உள்ள அடுக்குமாடி குடியிருப்பில் வசித்து வந்தனர். இந்த நிலையில், கடந்த 11-ந் தேதி வீட்டில் தனியாக இருந்த மலர்விழி கழுத்தை அறுத்து கொலை செய்யப்பட்டு கிடந்தார்.




இதுதொடர்பாக நடந்த விசாரணையில் கொலையாளி தன் பெற்றோருடன் மலர்விழி வீட்டிற்கு காலையில் வந்து இருப்பதும், பின்னர் மாலையில் தனியாக வந்து மலர்விழியை சந்தித்ததும் தெரிய வந்தது. மேலும் மலர்விழியின் செல்போனுக்கு வந்த அழைப்புகளை போலீசார் ஆராய்ந்தபோது கொலையாளி பற்றி மேலும் துப்பு துலங்கியது.

நாகர்கோவிலை சேர்ந்தவர்

தீவிர விசாரணைக்கு பிறகு கர்நாடக போலீசார் மலர்விழி கொலை தொடர்பாக அவரது உறவுக்கார வாலிபர் ஒருவரை பிடித்தனர். அந்த வாலிபர் நாகர்கோவிலை சேர்ந்தவர் என்பதும், ஐதராபாத்தில் கம்ப்ïட்டர் என்ஜினீயராக வேலை பார்த்து வருகிறார் என்பதும் தெரியவந்தது.

அவர், மலர்விழியின் உறவினர் என்பதால் அவருடன் நெருங்கி பழகியிருக்கிறார். ஆனால் இருவருக்கும் இடையே உறவு முறை சரியில்லை என்று கூறி அவர்கள் திருமணத்துக்கு பெற்றோர் எதிர்ப்பு தெரிவித்தனர்.

இதற்கிடையே மலர்வழிக்கும், பாலசுப்பிரமணியத்திற்கும் திருமணம் நடந்தது. அதன்பிறகு கணவன், மனைவி இருவரும் பெங்களூருக்கு வந்து விட்டார்கள்.

தேனிலவு படங்கள்

தான் காதலித்து வந்த பெண்ணுக்கு வேறு ஒருவருடன் திருமணம் முடிந்து விட்டதால் அந்த என்ஜினீயர் ஆத்திரமும், ஏமாற்றமும் அடைந்து இருந்தார். கடந்த 11-ந் தேதி தனது பெற்றோருடன் பெங்களூருக்கு சென்றார். முதலில் பெற்றோருடன் வந்து மலர்விழியை பார்த்து விட்டு சென்ற அவர், மலர்விழிக்கு திருமணத்திற்கு எந்த ஒரு பரிசு பொருளும் கொடுக்கவில்லை, அதனால் பரிசு பொருட்களை கொடுத்து வருகிறேன் என்று பெற்றோரிடம் கூறி விட்டு மலர்விழியின் வீட்டுக்கு வந்துள்ளார்.


அப்போது மலர்விழி தனது திருமண போட்டோ ஆல்பத்தை அவரிடம் காட்டியதாக தெரிகிறது. அதில் மலர்விழி மற்றும் அவரது கணவர் இருவரும் தேனிலவு சென்ற இடத்தில் எடுத்துக்கொண்ட படங்களும் இருந்தன. ஏற்கனவே மலர்விழி கிடைக்காத ஆத்திரம் மற்றும் ஏமாற்றத்துடனும் இருந்த அவருக்கு இது மேலும் ஆத்திரத்தை மூட்டியது. இந்த நிலையில், மலர்விழியிடம் அவர் தவறாக நடக்க முயன்றதாக தெரிகிறது. அப்போது ஏற்பட்ட பிரச்சினையில் மலர்விழி கொலை செய்யப்பட்டதாக தெரிய வந்து உள்ளது.

இதுதொடர்பாக அந்த என்ஜினீயரை பெங்களூர் போலீசார் பிடித்து மேலும் விசாரணை நடத்துவதாக தெரிகிறது.