ஸ்ரீரங்கம் ராஜ கோபுரம் மண்ணில் புதைகிறது ஆய்வுக் குழுவின் அறிக்கையில் அதிர்ச்சித் தகவல்

ஸ்ரீரங்கம்: ஸ்ரீரங்கம் ராஜகோபுரத்தில் கீழ்புறம் உள்ள கல்காரம் 13.5 செ.மீ.மண்ணில் புதைந்திருப்பதாக ராஜகோபுரத்தை ஆய்வு செய்த முதல் குழுவினரின் அறிக்கை தெரிவித்துள்ளது பெரும் பரபரப்பை ஏற்படுத்தியுள்ளது.

ஸ்ரீரங்கம் ரெங்கநாதர் சுவாமி கோவில் 108 வைணவ திருத்தலங்களில் முதன்மையானதும் பூலோக வைகுண்டம் என்று போற்றுதலுக்குரிய திருத்தலமும் ஆகும். 156 ஏக்கர் பரப்பளவில் சப்த எனப்படும் ஏழு பிகாரங்கள் மற்றும் 21 கோபுரங்களுடன் கோவில் அமைந்துள்ளது.கடந்த மே மாதம் ஸ்ரீரங்கம் ராஜகோபுரத்தில் விரிசலை கண்டறிய ஒட்டப்பட்டிருந்த பெரும்பாலான கண்ணாடித் துண்டுகள் உடைந்துள்ளதை புகைப்பட ஆதாரமாகக் கொண்டு "ராஜகோபுரத்தில் விரிசல்%27 என்று பெரிய அளவில் செய்தி வெளியானது.

அதற்குப் பதிலளிக்கும் வகையில் இந்துசமய அறநிலையத்துறை ஆணையர் மற்றும் ஸ்ரீரங்கம் கோவில் இணை ஆணையர் ஜெயராமன் விளக்க அறிக்கை வெளியிட்டனர். அதில் ராஜகோபுரத்தில் வடகிழக்கு பகுதியில் ஆக்கிரமித்து கட்டப்பட்டுள்ள கட்டிடப் பணியின்போது பயன்படுத்திய மரக்கம்பு இரும்பு பட்டையால் விரிசலை கண்டறிய ஒட்டப்பட்ட கண்ணாடித்துண்டு உடைந்திருக்கலாம் என்று தெரிவிக்கப்பட்டது.அதே அறிக்கையில் வடகிழக்கு மூலையில் வடக்கு பகுதியிலும் தென்மேற்கு தெற்கு பகுதியிலும் கல்காரத்தின் சிற்ப பகுதியிலும் புதியதாக விரிசல் ஏற்கனவே ஏற்பட்டுள்ளன என்றும் விபரமாக தெரிவிக்கப்பட்டுள்ளது. இதே அறிக்கையில் மூலம்தான் கோபுரம் புதைகிறது.கோபுரம் உச்சி நகர்கிறது போன்ற பூதாகரமான விடயமும் அம்பலமாகியுள்ளது.

ராஜகோபுரம் கட்டி முடிக்கப்பட்ட 1984 ஆம் ஆண்டே முதல் நிலையில் வெடிப்பும் கல்காரம் வடமேற்கு தென்கிழக்கு மற்றும் அருகிலுள்ள கட்டிடங்களில் வெடிப்பும் ஏற்பட்டது. வெடிப்பை ஆய்வு செய்ய இந்து சமய அறநிலையத்துறை சார்பில் 1986 ஜனவரி 8 இல் முதல் ஆய்வுக்குழு அமைக்கப்பட்டது.

இக்குழு ராஜகோபுரத்தை ஆய்வு செய்து அக்கௌஸ்டிக் எமிசன் டெஸ்ட் ஆய்வின் முடிவில் கல்காரம் கட்டப்பட்டு 300 ஆண்டு ஆனதால் 13.5 செ.மீ. நிலத்தில் கட்டிட கல்காரம் இறங்கி இறங்கலாம் என்று தெரிவித்தனர். அதை உறுதி செய்வதற்கும் பராமரிப்பு பணி மேற்கொள்ளவும் இரண்டாவதாக ஒரு நிபுணர் குழு அமைக்கப்பட்டது.

தொழில்நுட்ப ஆய்வாக நெடுஞ்சாலைத்துறையினரால் மண் பரிசோதனை செய்யப்பட்டு கோபுரம் அருகே துளையிடப்பட்டு மண்ணின் நிலை பரிசோதிக்கப்பட்டது. கோபுரம் கட்டி முடித்து மூன்று ஆண்டு 8 மாதம் கழித்து 18 செ.மீ. மண்ணில் இறங்கி இருப்பதாகக் கூறப்பட்டுள்ளது.

கோபுரத்தில் 29 இடத்தில் டெமெக் ஸ்டடி ஆய்வு செய்யப்பட்டு வெடிப்பு 1 மில்லி மீற்றரில் இருந்து 3 மில்லி மீற்றர் வரை சென்றுள்ளதாக கூறப்பட்டது. சென்னை அண்ணா பல்கலையின் ரிமோட் சென்சிங் (நகர்வு மின்னணுவியல்) ஆய்வின் மூலம் கோபுர உச்சி சுமார் 0.6 அங்குலம் முதல் 7.1 அங்குலம் வரை நகர்வு ஏற்பட்டுள்ளதாக கூறப்பட்டது. சென்னை மண்வளப்பாதுகாப்பு ஆராய்ச்சி நடத்திய “அக்கௌஸ்டிக்’ பொது ஆய்வின் படி மண்ணில் எவ்வித நகர்வும் இல்லை எனப்பட்டது.

அஸ்திபாரத்தில் கோபுர கட்டிடம் இறங்கும் தன்மை முடிவுக்கு வந்துள்ளது. அஸ்திபாரத்தின் மண் நிலைத்தன்மை ஏற்பட்டுள்து. வெடிப்பின் அளவு மற்றும் கட்டிடத்தின் தன்மையில் பயப்படும் படியாக இனி இல்லை. தொடர்ந்து ஏற்பட்ட வெடிப்பு கெட்டிப்படுத்தவேண்டும் என்பதை 2 ஆம் நிபுணர் குழு ஆய்வின் முடிவாக தெரிவித்தனர்.

தினமலர்