தமிழ்சினிமாவில் எவ்வளவு பாடலாசிரியர்கள்...

இதுவரைக்கும் தமிழ்சினிமாவில் 1895 பேர் பாடலாசிரியர் ஆகியிருக்கிறார்கள். இன்று மாலைக்குள் அந்த எண்ணிக்கை இன்னும் கூடலாம் என்று கவிப்பேரரசு வைரமுத்து கூறியபோது, ஒரு லேசான 'திடுக்'குடன் கைதட்டி ஆர்ப்பரித்தனர் சத்யம் தியேட்டருக்குள்ளிருந்த ரசிகர்கள். பாலு தம்பி மனசுல என்ற படத்தின் பாடல் வெளியீட்டு விழாவில்தான் இப்படி ஒரு புள்ளி விபரத்தை கொடுத்து 'பேஸ்த்' அடிக்க வைத்தார் ரசிகர்களை.

இந்த படத்தில் நான் பாடல் ஏதும் புனையவில்லை. ஆனால் என் நண்பரும் காவல் துறை அதிகாரியுமான ரவி ஐபிஎஸ் இப்படத்தில் பாடல் எழுதியிருக்கிறார். அவரை வாழ்த்த வந்தேன் என்ற கவிஞர், அதன் பின் பேசியதெல்லாம் அப்ளாஸ் ரகம். ஐபிஎஸ் என்றால் இண்டியன் போலீஸ் சர்வீஸ். அதை இண்டியன் பாடல் சர்வீஸ் என்று அழைக்கும்படி செய்திருக்கிறார் ரவி. தெலுங்கில் ஒரு பழமொழி உண்டு. ரவி புகாத இடத்திலும் கவி புகுவான் என்று. ரவி என்றால் சூரியன். அதன் ஒளி கடலுக்குள் 350 மீட்டர் வரை செல்லுமாம். இந்த ரவி கவியாகவும் இருக்கிறார் என்பதால் இவரது வரிகள் மனசுக்குள் புகும் என்றார் வைரமுத்து. எங்களை விட மக்களின் கண்ணீர், வலி, துரோகம், நம்பிக்கை, வேதனை, சந்தோஷம் எல்லாவற்றையும் அறிகிற துறையில் இருப்பது உங்களை போன்றவர்கள்தான். எனவே காவல் துறை அதிகாரி பாடல் எழுத வந்ததை போல சமுதாயத்தின் உயர் மட்டத்திலிருக்கிற பலரும் திரைப்பட உலகிற்கு வர வேண்டும். நீதிபதிகளும் ஐஏஎஸ் அதிகாரிகள் கூட வசனம் எழுத வேண்டும் என்றார் கவிப்பேரரசு.

ஏராளமான படங்களுக்கு பைனான்சியராக இருந்த பியாரிலால் குந்தச்சாவின் மகன் நிர்மல்ஷா இப்படத்தில் ஹீரோவாக அறிமுகம் ஆகிறார். வேதம் புதிது படத்திற்கு இசையமைத்த தேவேந்திரன் இசையமைத்திருக்கிறார்.

நிகழ்ச்சியில் பேச வந்தவர்களை எல்லாம் 'சீக்கிரம் பேசி முடிங்க' என்று அன்புக்கட்டளையிட்ட தொகுப்பாளர் ஆதவன், அவர்கள் பேசுகிற நேரத்தையும் தானே பிடுங்கிக் கொண்டு 'அளந்தது'தான் பயங்கரம்

தமிழ்சினிமா இணையம்