பாக்., வீரர்கள் விமர்சனம்: இந்தியா பதிலடி

புதுடில்லி: "காமன்வெல்த் தொடரில் இந்தியாவிடம் தோற்றதுக்கு, பாகிஸ்தான் அணியினர் தெரிவித்துள்ள காரணங்கள் முட்டாள்தனமானது,' என, இந்திய அணியின் முன்னாள் மற்றும் தற்போதைய வீரர்கள் கண்டனம் தெரிவித்துள்ளனர். காமன்வெல்த், ஹாக்கி போட்டியில் இந்திய அணியிடம் பாகிஸ்தான் படுதோல்வி அடைந்து, ஆறாவது இடத்தை பெற்றது. இந்த தோல்விக்கு, இந்திய ரசிகர்கள் அவமானப் படுத்தியதால் ஏற்பட்ட நெருக்கடி தான் காரணம் என பாகிஸ்தான் அணியினர் தெரிவித்து இருந்தனர். இதற்கு இந்திய தரப்பில் இருந்து கடும் எதிர்ப்பு தெரிவிக்கப்பட்டுள்ளது.

இதுகுறித்து இந்திய கேப்டன் ராஜ்பால் சிங் கூறுகையில்,""உலக கோப்பை தொடரில் தோல்வியடைந்த போது அவர்கள் எதுவும் கூறவில்லை. ஏன் காமன்வெல்த் தொடரின் போது கூட, இங்கு விருந்தோம்பல் சிறப்பாக இருப்பதாகத் தான் தெரிவித்தனர். ஆனால் ஹாக்கி தோல்வியால், பாகிஸ்தானில் அவர்கள் சில பிரச்னைகளை எதிர்கொள்ள வேண்டியுள்ளது என நினைக்கிறேன். இதனால் தான் இப்போது ரசிகர்களை காரணம் காட்டி நகைப்புக்குரிய காரணங்களை கூறுகிறார்கள்,'' என்றார்.

ஏற்றுக்கொள்ள முடியாது:தேசிய பயிற்சியாளர் ஹரேந்திரா சிங் கூறுகையில்,"" பாகிஸ்தான் அணி பங்கேற்ற போட்டிகளின் போது நானும் அங்கிருந்தேன். ஆஸ்திரேலியா மற்றும் மலேசியாவுக்கு எதிராக அவர்கள் விளையாடிய போது, இந்திய ரசிகர்கள் பாகிஸ்தானுக்கு ஆதரவாகத்தான் கோஷம் எழுப்பினர். ஏன், துவக்கவிழாவில் அவர்கள் அணிவகுத்து வந்தபோது, மைதானமே மிகப்பெரிய அளவில் கைதட்டி வரவேற்றது. ஒருபக்கம் இருதரப்பு ஒப்பந்தந்திற்கு முயற்சிக்கின்றனர். மறுபக்கம் நமது மக்கள் மீது குற்றம் சுமத்துகிறார்கள். இது துரதிருஷ்டவசமானது, ஏற்றுக் கொள்ளத்தக்கதும் அல்ல,'' என்றார்.

இது சகஜம்: இந்திய அணியின் முன்னாள் வீரர் அசோக் குமார் கூறியது:உள்ளூர் அணிக்கு ரசிகர்கள் ஆதரவு தருவது இயற்கைதான். ஆனால் இந்திய ரசிகர்கள் தகாத வார்த்தைகளால் திட்டினர் என்பது தவறு. நானும் போட்டியை நேரில் பார்த்தேன். அப்படி யாரும் கூறவில்லை. மாறாக, பாகிஸ்தான் அணி கோல் அடித்தபோது, கைதட்டி வரவேற்றனர்.சர்வதேச போட்டியில் இதுபோல நடப்பது புதிதல்ல. கடந்த 1973 உலக கோப்பை பைனலில், நெதர்லாந்து அணிக்கு எதிராக 2-0 என, நாங்கள் முன்னிலையில் இருந்தோம். ஆனால் அந்த அணிக்கு உள்ளூர் ரசிகர்கள் தந்த ஆதரவு காரணமாக, இறுதியில் தோல்வியடைந்தோம். இவ்வாறு அசோக் குமார் கூறினார்.

மற்றொரு வீரர் அஜித் பால் சிங் கூறுகையில்,"" போட்டியில் சிறப்பாக செயல்படாத நிலையில், சாக்குபோக்கு சொல்கிறார்கள். இது முட்டாள்தனமானது. ஏனெனில் இத்தொடர் முழுவதும் பாகிஸ்தான் வீரர்களுக்கு பெருமளவு வரவேற்பு கொடுக்கப்பட்டது,'' என்றார்.

தினமலர்!