மலேசிய பயங்கரவாதி நூர்டின் கொல்லப்பட்டார்

சந்தேகத்துக்குரிய மலேசிய பயங்கரவாதி நூர்டின் முகமட் டாப் இந்தோனிசியாவில் பயங்கரவாத எதிர்ப்பு போலீசார் மேற்கொண்ட தாக்குதலில் கொல்லப்பட்டார்.

அந்தத் தகவலை வெளியிட்ட இந்தோனிசியத் தொலைக்காட்சி நிலையம் அதற்கான ஆதாரங்களை வெளியிடவில்லை. மத்திய ஜாவாவில் 17 மணி நேரத்திற்கு மேல் நீடித்த கடுமையான துப்பாக்கிச் சண்டை மற்றும் குண்டு வெடிப்புக்களின் போது அவர் கொல்லப்பட்டதாக அது தெரிவித்தது.

மத்திய ஜாவாவில் ஒரு கிராமத்தில் உள்ள வீட்டை போலீசார் சுற்றி வளைத்துக் கொண்டு தாக்குதலை நடத்தியதாக அது கூறியது. இரண்டு சடலங்கள் அந்த வீட்டிலிருந்து வெளியில் கொண்டு வரப்பட்டன.

தலைநகர் ஜகார்த்தாவில் இரண்டு ஹோட்டல்களில் நிகழ்ந்த குண்டு வெடிப்புச் சம்பவங்களின் தொடர்பில் நடத்தப்படும் விசாரணையின் ஒரு பகுதியாக இந்தோனிசியப் போலீசார் அந்த வீட்டின் மீது தாக்குதல் நடத்தினர்.

அந்த வீட்டுக்குள் நான்கு அல்லது ஐந்து பேர் இருந்ததாக முதலில் கருதப்பட்டது. அவர்களில் நூர்டினும் ஒருவர் என்பதை அதிகாரிகள் உறுதி செய்ய மறுத்து விட்டனர்.

கொல்லப்பட்ட இருவரும் குண்டுகளை வீசுவதற்கு தயாராக இருந்த வேளையில் சுட்டுக் கொல்லப்பட்டதாக அதிகாரிகள் தெரிவித்தனர்.

அந்த வீட்டில் ஆயுதக் குவியல்களையும் வெடி மருந்துகளை வைப்பதற்கான ஒரு காரையும் போலீசார் அங்கு கைப்பற்றினர்.

அடுத்த இரண்டு வாரங்களில் குறிப்பிட்ட இலக்குகளைத் தாக்குவதற்கு அந்த இருவரும் தயாராகி வந்ததாக போலீசார் நம்புகின்றனர்.

அவர்கள் 2004 ஆண்டு ஜகார்த்தாவில் உள்ள இந்தோனிசிய தூதரகத்தின் மீது நடத்தப்பட்ட தற்கொலைத் தாக்குதலுக்கு உடந்தையாக இருந்தவர்கள் என்றும் அவர்கள் நம்புகின்றனர்.

100 கிலோகிராம் எடை கொண்ட குண்டு ஒன்ரையும் குண்டுகளைத் தயாரிப்பதற்குப் பயன்படுத்தப்படும் பிளாஸ்டிக் கலங்களையும் போலீசார் அங்கு கண்டு பிடித்தனர்.

நூர்டின் சில முறை தப்பித்துள்ளார்

மலேசியரான 40 வயது நூர்டின் ஆசியாவில் பெரிதும் தேடப்பட்டு வந்த பயங்கரவாதி ஆவார்.

இந்தோனிசியாவில் 2003 ம் ஆண்டு தொடக்கம் நிகழ்ந்த பல தற்கொலைத் தாக்குதல்களுக்கு அவர் காரணம் என்று குற்றம் சாட்டப்பட்டுள்ளது. அவற்றில் 40 க்கும் அதிகமானோர் கொல்லப்பட்டனர்.

நூர்டின் 2002 ம் ஆண்டு 200 க்கும் மேற்பட்டவர்கள் கொல்லப்பட்ட பாலி குண்டு வெடிப்புச் சம்பவங்களுக்கு பொறுப்பேற்றுக் கொண்டுள்ள ஜெமா இஸ்லாமியா அமைப்பின் உறுப்பினர் ஆவார்.

அவர் 2003 ம் ஆண்டு அந்த அமைப்பிலிருந்து பிரிந்து தமது சொந்த தீவிரவாத அமைப்பை தோற்றிவித்தார் என்று ஆய்வாளர்கள் கூறினர்.

2003 ம் ஆண்டு ஜகார்த்தாவில் உள்ள ஜே டபிள்யூஸ் மரியோட் ஹோட்டலிலும் 2004 ம் ஆண்டு ஆஸ்திரேலியத் தூதரகத்திலும் 2005 ம் ஆண்டு பாலியில் சுற்றுப் பயணிகளுக்கான உணவு விடுதிகளிலும் நிகழ்ந்த தற்கொலைத் தாக்குதல்களுக்காக நூர்டின் தேடப்பட்டு வந்தார்.

கடந்த ஜுலை மாதம் 17 ம் தேதி ஜகார்த்தாவில் உள்ள ஜே டபிள்யூஸ் மரியோட் ஹோட்டலிலும் அதற்கு அருகில் இருந்த ரிட்ஸ் கார்ல்டன் ஹோட்டலும் தற்கொலைத் தாக்குதலுக்கு இலக்காகின. அதில் எழுவர் கொல்லப்பட்டனர். அவர்களில் மூவர் ஆஸ்திரேலியர்கள்.

அந்தத் தாக்குதல்களுக்கு பொறுப்பேற்று நூர்டின் கையெழுத்திட்டிருப்பதாக கூறப்படும் கடிதம் ஒன்று இணையத்தில் வெளியிடப்பட்டது. ஆனால் அதன் நம்பகத்தன்மை உறுதி செய்யப்படவில்லை.

கடந்த காலத்தில் போலீசார் அவரைக் கைது செய்யும் கட்டத்தை எட்டிய வேளையில் நூர்டின் தப்பியுள்ளார். கடந்த ஆறு ஆண்டுகளாக இந்தோனிசியப் போலீசார் அவரைத் தேடி வருகின்றனர்.

ஜுலை 17 தாக்குதலுக்குப் பின்னர் அவருடைய மூன்றாவது மனைவி என்று நம்பப்படும் மாது ஒருவர் மத்திய ஜாவாவில் கைது செய்யப்பட்டார்.