ஆஸி.க்கு எதிரான 2-ம் டெஸ்ட்டிலும் வெற்றி: கோப்பையை தக்க வைத்தது இந்தியா

பெங்களூரு, அக்.13,2010 : ஆஸ்திரேலியாவுக்கு எதிரான 2-வது மற்றும் கடைசி டெஸ்ட் போட்டியிலும் அபாரமாக வெற்றி பெற்று, 'பார்டர் - கவாஸ்கர் கோப்பை'யைத் தக்கவைத்துக் கொண்டது, இந்திய அணி!

இது, டெஸ்ட் கிரிக்கெட்டில் இந்திய அணியின் மகத்தான சாதனையாக கருதப்படுகிறது.

இந்த வெற்றியின் மூலம், 3 புள்ளிகள் அதிகம் பெற்று சர்வதேச டெஸ்ட் கிரிக்கெட் தரவரிசையில் இந்திய அணி தொடர்ந்து முதல் இடத்தில் நீடிக்கிறது.

இந்தியாவிடம் தோல்வியுற்ற ஆஸ்திரேலிய அணி 3 புள்ளிகள் சரிந்து, தரவரிசையில் ஐந்தாம் இடத்துக்கு தள்ளப்பட்டது.

பெங்களூரில் இன்று நடந்து முடிந்த கடைசி டெஸ்டில், ஆஸ்திரேலிய அணியை 7 விக்கெட்டுகள் வித்தியாசத்தில் இந்தியா வீழ்த்தியது.

ஆட்டத்தின் கடைசி நாளில், 207 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணி, 45 ஒவர்களில் 3 விக்கெட்டுகளை மட்டுமே இழந்து இலக்கை எட்டி வெற்றி பெற்றது.

துவக்க ஆட்டக்காரர்களில் சேவாக் 7 ரன்களில் ஆட்டமிழக்க, முரளி விஜய் 37 ரன்கள் சேர்த்தார். அவருடன் இணைந்த அறிமுக வீரர் புஜாரா அற்புதமான ஆட்டத்தை வெளிப்படுத்தினார். அவர் 89 பந்துகளில் 72 ரன்களைக் குவித்து ஆட்டமிழந்தார்.

அதைத் தொடர்ந்து, சச்சின் - திராவிட் இணை நிதானமாக விளையாடி வெற்றிக்கு அழைத்துச் சென்றது. சச்சின் 53 ரன்களும், திராவிட் 21 ரன்களும் எடுத்து கடைசி வரை ஆட்டமிழக்காமல் இருந்தனர்.

ஆஸ்திரேலியா தரப்பில் ஹில்ஃபென்ஹாஸ், ஹவுரிட்ஸ் மற்றும் வாட்சன் ஆகியோர் தலா ஒரு விக்கெட்டுகளைக் கைப்பற்றினர்.

முன்னதாக, ஆஸ்திரேலிய அணி தனது முதல் இன்னிங்ஸில் 478 ரன்கள் குவித்தது. (நோர்த் - 128, பான்டிங் 77).

அதைத் தொடர்ந்து முதல் இன்னிங்ஸை விளையாடிய இந்திய அணி 495 ரன்கள் குவித்து பதிலடி கொடுத்தது. (சச்சின் - 214, முரளி விஜய் - 139)

பின்னர் இரண்டாவது இன்னிங்ஸை ஆடிய ஆஸ்திரேலிய அணி, இந்திய சுழற்பந்துவீச்சில் 223 ரன்களுக்கு சுருண்டது. (பான்டிங் - 72)

இந்த டெஸ்டில் இரு இன்னிங்ஸையும் சேர்த்து ஹர்பஜன் சிங் மற்றும் ஓஜா ஆகியோர் தலா 6 விக்கெட்டுகளையும், ஜாகீர் கான் 4 விக்கெட்டுகளையும், ஸ்ரீசாந்த் 2 விக்கெட்டுகளையும் 2 விக்கெட்டுகளையும் வீழ்த்தினர்.

இந்தத் தொடரின் நாயகனாகவும், ஆட்ட நாயகனாகவும் சச்சின் டெண்டுல்கரே தேர்வு செய்யப்பட்டார்.