ஊட்டச்சத்து உணவுகள்

சேமியா இட்லி


தேவையான பொருட்கள்:

சேமியா - 150 கிராம்
பாலாடை அல்லது தயிர் - 150 மி.லி.
பச்சை மிளகாய் - 2
இஞ்சி - சிறிதளவு
கடுகு - கால் தேக்கரண்டி
சீரகம் - கால் தேக்கரண்டி
பெருங்காயத்தூள் - 1 சிட்டிகை
உப்பு - தேவையான அளவு
கறிவேப்பிலை - தேவையான அளவு
கொத்தமல்லித்தழை - அலங்கரிப்பதற்கு
எண்ணை - தேவையான அளவு

செய்முறை:

ஒரு அகண்ட பாத்திரத்தில் சேமியா, பாலாடை (அ) தயிர் மற்றும் உப்பு சேர்த்து நன்கு கலக்கி வைத்துக் கொள்ளவும். வாணலியில் எண்ணை ஊற்றி, கடுகு, சீரகம், பெருங் காயத்தூள் மற்றும் கறிவேப்பிலை போட்டு தாளிக்கவும். இத்துடன் பொடியாக நறுக்கிய இஞ்சி மற்றும் பச்சைமிளகாயைச் சேர்த்து வதக்கவும். இதனை சேமியா கலவையில் சேர்த்து கலக்கவும். இத்துடன் சிறிதளவு தண்ணீர் சேர்த்து 15 நிமிடங்கள் வரை ஊற வைக்கவும். பிறகு இக்கலவையினை இட்லி தட்டில் ஊற்றி வேக விடவும். வெந்ததும் இட்லியின் மேல் கொத்தமல்லித்தழை வைத்து அலங்கரித்து, குழந்தைகளுக்குப் பிடித்த சட்னி வைத்துப் பரிமாறலாம்.

ஊட்டச்சத்து விவரங்கள்:

வீட்டில் எப்பொழுதும் சேமியா உப்புமா அல்லது பாயாசம் மட்டுமே சாப்பிட்டு வந்த குழந்தைகளுக்கு, இது புதுவிதமாக இருப்பதால் விரும்பிச் சாப்பிடுவர். சேமியா, உடம்பிற்குத் தேவையான சக்தி மற்றும் வளர்ச்சியைக் கொடுக்கிறது. பாலாடை (அ) தயிரில் புரோப யோடிக்ஸ் என்ற வேதிப்பொருள் இருப்பதால், ஜீரண சக்தி மற்றும் உடல் வளர்ச்சிக்குத் தேவையான புரதத்தையும் கொடுக்கிறது. இந்த இட்லியை காலை அல்லது இரவு உணவாக 3 வயதிலிருந்து குழந்தைகளுக்கு கொடுக்கலாம்.



தேங்காய் கேக்


தேவையான பொருட்கள்:

அனைத்து வகையான தானியங்கள் கலந்த மாவு - 100 கிராம்
தேங்காய்த் துருவல் - 100 கிராம்
ஏலக்காய்த்தூள் - 3 தேக்கரண்டி
முட்டை - 1
பால் - 150 மி.லி.
சர்க்கரை - 4 மேஜைக்கரண்டி
எண்ணை - தேவையான அளவு

செய்முறை:

ஒரு பாத்திரத்தில் சர்க்கரை, தேங்காய்த் துருவல் மற்றும் ஏலக்காய்த்தூள் சேர்த்து நன்கு கலக்கி வைத்துக் கொள்ளவும். தானிய மாவுடன் உப்பு சேர்த்து சலித்து வைத்துக் கொள்ளவும். இன் னொரு பாத்திரத்தில் முட்டையுடன் பாலைக் கலந்து நுரை வரும்வரை அடித்து வைத்துக் கொள்ளவும். இதை மாவுடன் சேர்த்துக் கலந்து 30 நிமிடங்கள் வரை அப்படியே வைத்திருக்கவும். தோசைக்கல்லில் எண்ணை தடவி இக் கலவையினை தடிமனாக ஊற்றி, இரண்டு பக்கமும் வெந்து பொன்னிறமானவுடன் எடுக்கவும். இதன்மேல் தேங்காய்த் துருவல் கலவையை வைத்து நான்கு பக்கமும் மடித்து, சிறிது நேரம் குளிர்பதனப்பெட்டியில் வைத்து, பிறகு பரிமாறலாம்.

ஊட்டச்சத்து விவரங்கள்:

அனைத்து வகையான தானியங்கள் கலந்த மாவு, உடம்பிற்கு வலுவைத் தரும். மேலும், மலச்சிக்கலையும் தடுக்கக் கூடிய தன்மை கொண்டது. பால், முட்டை மற்றும் தேங்காய் ஆகியவை புரதத்தினைக் கொடுப்பதால், இது குழந்தைகளின் வளர்ச்சிக்கு மிகவும் உறு துணையாக இருக்கும். இதனை மாலைநேரச் சிற்றுண்டியாக 3 வயதிலிருந்து குழந்தை களுக்கு கொடுக்கலாம்.

`டயட்டீசியன்' சு. சிவகாமிசுந்தரி, சிவகங்கை.