அயோத்தி தீர்ப்பு சரியான தீர்ப்பு அல்ல; ராமர் பிறந்ததற்கான எந்த ஆதாரமும் இல்லை: திருமாவளவன்

விடுதலை சிறுத்தைகள் கட்சி சார்பில் தலித், பிற்படுத்தப்பட்ட, சிறுபான்மை மக்கள் விழிப்புணர்வு கருத்தரங்கு பெங்களூரில் உள்ள அம்பேத்கார் பவனில் நடந்தது. விடுதலை சிறுத்தைகள் கட்சி கர்நாடக மாநில தலைவர் தலித் நாகராஜ் தலைமை தாங்கினார்.


கருத்தரங்கில் விடுதலை சிறுத்தைகள் கட்சியின் தேசிய தலைவர் தொல்.திருமாவளவன் கலந்து கொண்டு, கருத்தரங்கை தொடங்கி வைத்து பேசினார்.


அவர், ‘’எனக்கு என் மொழி என் தாயை போன்றது. அதே சமயம், மற்ற மொழி இழிவானது என்று பொருள் அல்ல. அதுவும் எனது தாய்மார்களை போன்றது. நாட்டில் உள்ள எந்த மொழியும் தாழ்வானது இல்லை.


கன்னட மொழியை மதிக்கிறேன், நேசிக்கிறேன். எல்லா மக்களும் எல்லா மொழியையும் மதிக்க வேண்டும். கன்னட மொழியை கற்றுக்கொள்ள வேண்டும் என்ற ஆர்வம் எனக்கு இருக்கிறது.

அதிக பணிச்சுமை காரணத்தால் கன்னடத்தை என்னால் கற்க முடியவில்லை. எல்லா மொழிகளையும் தெரிந்து வைத்துக்கொள்ள வேண்டும். அடுத்த தடவை பெங்களூர் வரும்போது, கன்னடம் கற்றுக்கொண்டு உங்களிடத்தில் பேசுவேன்.


நம்மிடம் ஒற்றுமை இல்லாவிட்டால் நமது உரிமைகள் பறிபோய்விடும். ஒற்றுமை இல்லாததால் நமது நாடே முற்காலத்தில் வேறு ஒரு ஆதிக்கத்தின் கீழ் சென்றது. தலித் மக்கள், சிறுபான்மையின மக்கள், ஒடுக்கப்பட்ட, நசுக்கப்பட்ட மக்கள் அனைவரும் ஒன்றுபட வேண்டும்.


ஒன்றுபட்டால் அடக்குமுறையில் இருந்து நாம் எல்லாம் விடுபட முடியும்.


பதவிக்கோ, புகழுக்கோ ஆசைப்பட்டு கட்சியில் இணைய வேண்டாம். ஒடுக்கப்பட்ட மக்களை பாதுகாக்க நீங்கள் போராட வேண்டும்.அப்படிப்பட்டவர்களுக்காக உருவாக்கப்பட்டது தான் தலித் அரசியல் களம்.


எந்த பிரதிபலனையும் எதிர்பார்க்கக்கூடாது. அம்பேத்காரின் கனவை நனவாக்க நாம் எல்லோரும் கைகோர்த்து செயலாற்ற வேண்டும். அகில இந்திய அளவில் கிறிஸ்தவர்கள், முஸ்லிம்கள், தலித் மக்கள், ஒடுக்கப்பட்ட மக்கள் எல்லோரும் ஒன்றாக இணைந்தால், இவர்களில் ஒருவர் தான் நாட்டின் பிரதமராக வரமுடியும்.


நம்மிடம் ஒற்றுமை இல்லாததால் நம்மால் அந்த பதவியை அடைய முடியவில்லை. மக்கள் தொகையில் 3 சதவீதம் மட்டுமே உள்ள ஒரு சமுதாயத்தை சேர்ந்தவர்களில் ஒருவர் பிரதமர் ஆகிறார். அதற்கு அவர்கள் நம்மை எல்லாம் அடக்கி ஆள்வது தான் காரணம்.


தலித் மக்கள் வெறும் ஓட்டுபோடும் எந்திரங்களாக மட்டுமே பயன்படுத்தப்படுகிறார்கள்.


நகரத்தை தூய்மை செய்கிறோம் என்ற பெயரில் தாழ்த்தப்பட்ட மக்களை அரசுகள் அவர்களை விரட்டி அடிக்கிறது. கர்நாடகத்தில் தலித் மக்களுக்கு ஏற்படும் அநீதியை எதிர்த்து எங்கள் கட்சி போராடும். தலித் மக்களுக்கு எங்காவது கொடுமை ஏற்பட்டால் கொதித்து எழ வேண்டும்.


ராமஜென்மபூமி - பாபர் மசூதி வழக்கில் வழக்கு போட்ட 3 பேருக்கும் சரிசமமாக நிலத்தை பங்கு போட்டு கொள்ள வேண்டும் என்று நீதிபதிகள் தீர்ப்பு கூறி இருக்கிறார்கள்.


இது சரியான தீர்ப்பு அல்ல. அப்படி என்றால் 10 பேர் வழக்கு போட்டு இருந்தால் 10 பேருக்கும் சரிசமமாக அந்த நிலத்தை பங்கு போட்டு கொள்ள தீர்ப்பு வழங்கப்பட்டு இருக்குமா?. இந்த வழக்கில் நீதிமன்ற மரபே மீறப்பட்டு இருக்கிறது.


ஆனால் அந்த தீர்ப்பு அனைவரும் ஏற்றுக்கொள்ளக் கூடியது, வரவேற்கத்தக்க தீர்ப்பு என்று எல்லா அரசியல் கட்சி தலைவர்களும் அறிக்கை வெளியிட்டு இருக்கிறார்கள்.


கலவரம் ஏற்படக்கூடாது என்பதற்காக இவ்வாறு அவர்கள் அறிக்கை வெளியிடுகிறார்கள். ராமர் பிறந்ததற்கான எந்த ஆதாரமோ, ஆவணங்களோ கிடையாது. ஆனால் பாபர் ஒரு வரலாற்று நாயகன் என்பதை வரலாறு கூறுகிறது’’என்று பேசினார்.