ஈகுவேடரில் கலவரம் : இராணுவத்தினரால் நாட்டு அதிபர் சிறைபிடிப்பு

தென்அமெரிக்க நாடான ஈகுவேடரில் ரபேல் கொரேயா (வயது 47) அதிபராக உள்ளார். சமீபத்தில் அவர் புதிதாக ஒரு சட்டம் கொண்டு வந்து நிறைவேற்றினார். இதற்கு அரசு ஊழியர்கள் மத்தியில் எதிர்ப்பு கிளம்பியது. குறிப்பாக இந்த சட்டத்தை போலீசார் கடுமையாக எதிர்த்தனர்.
இதனால் தங்களுக்கு போதிய சலுகை கிடைக்காது என தெரிவித்து போராட்டத்தில் ஈடுபட்டு வந்தனர். இந்த நிலையில் நேற்று அனைத்து போலீசாரும் திடீரென கலவரத்தில் ஈடுபட்டனர்.

இதில், போலீஸ் துறையை சேர்ந்த உயர் அதிகாரிகள் முதல் கடைநிலை போலீசார் வரை ஈடுபட்டனர். வேலை நிறுத்தத்தில் ஈடுபட்ட அனைவரும் கொய்டொ நகரில் உள்ள விமான நிலையத்தை கைப்பற்றி அதை இயங்க விடாமல் முடக்கி வைத்தனர்.

மேலும் நெடுஞ்சாலைகளையும் கைப்பற்றி போக்குவரத்தை தடுத்து நிறுத்தினர். போலீஸ் தலைமையம் உள்ளிட்ட பல இடங்களில் போராட்டத்தில் ஈடுபட்டு வன்முறையில் இறங்கினர்.

இந்த நிலையில் அதிபர் ரபேல் கொரேயா உடல்நிலை பரிசோதனைக்காக ஆஸ்பத்திரிக்கு சென்று இருந்தார். அதை அறிந்த கலவரக்காரர்கள் ஆஸ்பத்திரியை முற்றுகையிட்டு அதிபர் கொரேயாவை சிறைபிடித்தனர்.

தகவல் அறிந்த அதிபர் போராட்டத்தில் ஈடுபட்ட போலீஸ் அதிகாரிகளுடன் பேச்சுவார்த்தை நடத்த முயன்றார். அதற்கு மறுத்த அவர்கள் கண்ணீர் புகை குண்டுகளை வீசி தங்கள் கோபத்தை வெளிப்படுத்தினர்.

மேலும் சிறைபிடிக்கப்பட்ட அதிபரை மிகவும் கீழ்தரமாக நடத்தினர். அவர் மீது தண்ணீரை பீய்ச்சி அடித்து துன்புறுத்தினர். எனவே கலவரத்தை அடக்கும் பொறுப்பு ராணுவத்திடம் விடப்பட்டது. அவர்கள் விரைந்து வந்து அதிபர் கொரேயாவை சிறைபிடித்து வைத்திருந்த ஆஸ்பத்திரியை சுற்றி முற்றுகையிட்டனர்.

இதைத்தொடர்ந்து ராணு வத்துக்கும், போலீசாருக்கும் இடையே கடுமையான துப்பாக்கி சண்டை நடந்தது. இதற்கிடையே அதிபரின் ஆதரவாளர்களும், பொது மக்களும் போலீசாருக்கு எதிரான நடவடிக்கையில் ஈடுபட்டனர். போராட்டத்தில் ஈடுபட்ட போலீசாரை கல்லால் அடித்து விரட்டினர்.

இவற்றுக்கு இடையே 12 மணி நேர போராட்டத்துக்கு பிறகு அதிபர் ரபேல் கொரேயா மீட்கப்பட்டார். பின்னர் அவர் பத்திரமாக அரண்மனைக்கு அழைத்து செல்லப்பட்டார். இதைத்தொடர்ந்து கலவரம் அடக்கப்பட்டது.

இந்த துப்பாக்கி சண்டையில் அதிபர் கொரேயா சிறப்பு பாதுகாப்பு படையினர் 27 பேர் படுகாயம் அடைந்தனர். அரண்மனை திரும்பிய அதிபர் தன்னை மீட்ட ராணுவத்துக்கும், ஆதரவாளர்களுக்கும் நன்றி தெரிவித்தார்.

தன்னை பார்க்க வந்த ஆயிரக்கணக்கான மக்கள் மத்தியில் பேசினார். அப்போது, தனது வாழ்க்கையில் இது ஒரு மிகவும் சோகமான நாள் என தெரிவித்தார்.

விடுப்பு குழுமம்